ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ད་ལྟའི་བོད་པའི་སློབ་ཕྲུག་ཇེ་ཉུང་དུ་འགྲོ་བཞིན་ཡོད་ནའང་སློབ་ཕྲུག་ཡོད་པ་དེ་དག་གི་ཤེས་ཡོན་གྱི་སྤུས་ཚད་ཚད་དང་ལྡན་པ་ཞིག་སྤྲོད་དགོས་གལ་ཆེ་སྐོར་གསུངས་སོང་།
ཟླ་འདིའི་ཕྱི་ཚེས་ ༧ ནས་ཉིན་གྲངས་གསུམ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་བཙན་བྱོལ་བོད་མིའི་ཤེས་རིག་ཚོགས་ཆེན་ཐེངས་བརྒྱད་པ་འཚོགས་ཡོད་པ་ལྟར། དེ་རིང་ཕྱི་ཚེས་ ༩ ཉིན་ཚོགས་ཆེན་གྱི་མཇུག་སྡོམ་མཛད་སྒོའི་སྟེང་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། ཤེས་རིག་ལས་ཁུངས་ཀྱི་ལས་བྱེད་རྣམ་པ། དེ་བཞིན་སློབ་གྲྭ་ཁག་གི་སློབ་སྤྱི་དང་དགེ་རྒན་སོགས་ཁྱོན་མི་གྲངས་ ༢༡༠ ལྷག་ཚང་འཛོམས་གནང་འདུག
ད་ལན་གྱི་ཚོགས་ཆེན་གང་འདྲ་བྱུང་ཡོད་སྐོར་དང་འབྲེལ་ནས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། སྤྱི་ཡོངས་ནས་ཚོགས་ཆེན་འདི་འདྲ་ཚོགས་པ་དེ་གནད་འགག་ཆེན་པོ་རྩིས་ཀྱི་ཡོད་ལ། ད་ལན་གྱི་ཚོགས་ཆེན་དེ་ཡག་པོ་ཞེ་དྲགས་བྱུང་སོང་། ཚོགས་འདུ་ཚོགས་པ་དང་གྲོས་ཆོད་བཞག་པ་རེད། འོན་ཀྱང་དོན་དངོས་སུ་ཡག་པོ་ཞིག་ཡོང་བར་འགན་འཛིན་དང་སློབ་སྤྱི་སོགས་ས་གནས་ས་ཐོག་ལ་དངོས་སུ་ཕེབས་ཏེ་ཁྱད་པར་ཞིག་བཟོ་ཐུབ་ཚེ། གྲུབ་འབྲས་ཆེན་པོ་ཞིག་བྱུང་བ་ལ་ངོས་འཛིན་གྱི་ཡིན། ཞེས་དང་། ད་ལྟའི་ཆར་བོད་པའི་སློབ་ཕྲུག་ཉུང་ཉུང་ཡིན་པར་བརྟེན། སློབ་ཕྲུག་ཡོད་པ་དེ་དག་སྤུས་ཚད་ལྡན་པ་དང་། ཡ་རབས་བཟང་སྤྱོད་ལྡན་པ། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་མ་འགལ་བ་ཞིག་དང་། སོ་སོའི་སྤྱི་ཚོགས་ལ་ཕན་པ་སོགས་ཆགས་ཐུབ་པའི་དམིགས་ཡུལ་ཡོད་སྐོར་སོགས་གསུངས་སོང་།
འདི་གའི་གསར་འགོད་པས་ཤེས་རིག་བཀའ་བློན་མཆོག་ལ་ད་ལྟའི་ཆར་དམིགས་བསལ་དགོས་མཁོ་ཅན་ཇེ་མང་དུ་འགྲོ་མུས་ཡིན་པ་དེ་ལ་ཤེས་རིག་ལས་ཁུངས་ཀྱི་ངོས་ནས་མཐུན་རྐྱེན་ག་རེ་སྦྱོར་གྱི་ཡོད་སྐོར་དྲིས་པར། བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། ང་ཚོ་སྐོར་སྐྱོད་ཕྱིན་པའི་སྐབས་སུ་ཕྱོགས་ཡོངས་ནས་ཚང་མ་ལྟ་ཡི་ཡོད་པ་རེད། དམིགས་བསལ་དགོས་མཁོ་ཅན་མཐོང་བའི་སྐབས། ང་རང་ལ་ཚོར་བ་ཁྱད་མཚར་པོ་བྱུང་། དེ་ཡང་ངས་ལས་ཀ་བྱས་པའི་སྐབས་དམིགས་བསལ་དགོས་མཁོ་ཅན་དེ་འདྲ་མེད་ལབ་ནའང་འགྲིག་གི་ཡོད། ད་ལྟའི་ཆར་དེ་འདྲ་མང་དུ་འགྲོ་བཞིན་འདུག དེར་བརྟེན་གནད་དོན་དེའི་ཐོག་ལ་སེམས་འཚབ་བྱུང་ནས་སློབ་གྲྭའི་ནང་ཡོད་པའི་དམིགས་བསལ་དགོས་མཁོ་ཅན་དེ་དག་ལ་ཐབས་ལམ་གང་འདྲ་འཚོལ་དགོས་པ་དང་། དམིགས་བསལ་དགོས་མཁོ་ཅན་གྱི་ཐོག་ལ་དམིགས་པའི་སློབ་སྦྱོང་བྱེད་མཁན་ཞིག་ཡོད་པ་དེ་ལ་ལས་རོགས་ཤིག་བཞག་སྟེ། ལྷོ་ཕྱོགས་སུ་བཏང་ནས་དམིགས་བསལ་དགོས་མཁོ་ཅན་ངོ་རྟགས་ཆོད་པ་བྱ་རྒྱུ་དང་། དེ་དག་ལ་ཐབས་ལམ་ག་རེ་དགོས་པ་སོགས་མཐུན་རྐྱེན་སྦྱོར་རྒྱུ་དང་། མ་འོངས་པར་དམིགས་བསལ་དགོས་མཁོ་ཅན་གྱི་ཆེད་དུ་སློབ་སྦྱོང་གནང་མཁན་མི་གྲངས་བཞི་ཡོད་པ་དང་། དེ་དག་སློབ་ཐོན་བྱུང་རྗེས་དེ་དང་འབྲེལ་ནས་ཕྱག་ལས་གནང་མཁན་མང་པོ་འབྱུང་གི་ཡོད་སྐོར་སོགས་གསུངས་སོང་།
བོད་པའི་སློབ་ཕྲུག་ཇེ་ཉུང་དུ་འགྲོ་མུས་ཡིན་པས་ཤེས་རིག་ལས་ཁུངས་ཀྱིས་སློབ་གྲྭ་ཁག་ཟླ་སྒྲིལ་གཏང་རྒྱུའི་ཐད་དགོངས་པ་བཞེས་ཡོད་སྐོར་དང་འབྲེལ་ནས་ཤེས་རིག་བཀའ་བློན་མཆོག་གིས། ད་ལྟའི་ཆར་བོད་པའི་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་ཡོད་པས། སློབ་གྲྭ་ཁག་གིས་ཁུངས་སོ་སོ་ནས་ཟླ་སྒྲིལ་བཏང་དང་གཏོང་བཞིན་པ་རེད། ཅེས་གསུངས་བྱུང་།
ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་བསྟན་འཛིན་པ་སངས་ལགས་སུ་ཤེས་རིག་ཚོགས་ཆེན་ཐེངས་བརྒྱད་པའི་སྟེང་གླེང་སློང་གཙོ་བོ་ག་རེ་གནང་ཡོད་སྐོར་དྲིས་པར། ཁོང་གིས། ད་ལན་གྱི་ཚོགས་ཆེན་འདིའི་ནང་མི་གྲངས་ ༢༡༠ ལྷག་འཛོམས་ནས་སློབ་ཕྲུག་གི་སྤུས་ཚད་ཡག་ཏུ་གཏོང་དགོས་པ་དང་། བོད་ཡིག་དང་བོད་པའི་ངོ་བོ་སོགས་སྲུང་སྐྱོབ་བྱ་རྒྱུ་ནི་ང་ཚོའི་ལག་ཏུ་ཡོད་པས། དེའི་ཐད་ལ་གྲོས་འཆར་མང་པོ་ཞིག་བསླེབས་སོང་བསམ་གྱི་འདུག དེ་བཞིན་བོད་ནང་དུ་རྒྱ་ནག་གིས་དྲག་གནོན་ཤུགས་ཆེན་བྱེད་བཞིན་ཡོད་པའི་རྐྱེན་གྱིས་དཀའ་ངལ་འཕྲད་མུས་ཡིན་པ་དེ་དང་འབྲེལ་ནས་གྲོས་འཆར་མང་པོ་བཞག་ཡོད་པ་རེད། ཅེས་གསུངས་བྱུང་།
འདི་གའི་གསར་འགོད་པར་བོད་ཁྱིམ་གོ་པལ་པུར་སློབ་གྲྭའི་ཆབ་སྲིད་ཚན་རིག་གི་དགེ་རྒན་ཚེ་རིང་ཉི་མ་ལགས་ཀྱིས། ད་ལན་གྱི་ཤེས་རིག་ཚོགས་ཆེན་ཐེངས་བརྒྱད་པའི་ནང་འཛུལ་ཞུགས་བྱས་ཐུབ་པར་སྐལ་བ་བཟང་པོ་བྱུང་། ཚོགས་ཆེན་འདིའི་ནང་གཙོ་བོ་སློབ་གྲྭ་ཁག་གི་ནང་དུ་སློབ་ཕྲུག་ཉུང་དུ་འགྲོ་བཞིན་ཡོད་པའི་རྐྱེན་གྱིས་འགྱུར་བ་ཤུགས་ཆེན་པོ་འགྲོ་བཞིན་ཡོད་པ་རེད། འགྱུར་བ་ཤུགས་ཆེན་འགྲོ་མུས་ཡིན་ཡང་ཤེས་ཡོན་ལ་གནོད་མ་སྐྱེལ་བའི་ཐོག་ནས་ཡར་རྒྱས་གཏོང་ཕྱོགས་ཐད་གླེང་སློང་གནང་ཡོད་པ་དང་། ད་ལྟའི་བོད་པའི་སློབ་གྲྭ་ནང་དུ་དམིགས་བསལ་དགོས་མཁོ་ཅན་གྱི་སློབ་ཕྲུག་མང་དག་ཅིག་ཡོད་པ་དེ་དག་ལ་དོ་སྣང་ཤུགས་ཆེན་གནང་དགོས་པ་དང་། འཕྲུལ་ཆས་བེད་སྤྱོད་གཏོང་ཕྱོགས་དང་འབྲེལ་ནས་གོ་བསྡུར་མང་པོ་གནང་སོང་། མ་འོངས་པར་གྲོས་འཆར་དེ་དག་ལག་བསྟར་བྱེད་དེ་བོད་པའི་སློབ་གྲྭ་ཁག་གི་ནང་དུ་སློབ་ཕྲུག་ཉུང་ཉུང་ཡོད་རུང་། ཤེས་ཡོན་གྱི་སྤུས་ཚད་ལ་ཤུགས་སྣོན་རྒྱག་ཐུབ་རྒྱུའི་རེ་བ་བྱེད་བཞིན་ཡོད། ཅེས་འགྲེལ་བརྗོད་གནང་བྱུང།
མ་སུ་རི་སཾ་བྷོ་ཊ་གཏན་སློབ་ཀྱི་ལྟ་གྲུབ་སློབ་དཔོན་དགེ་བཤེས་བྱམས་པ་འཕྲིན་ལས་ལགས་ཀྱིས་འདི་གའི་གསར་འགོད་པར། ད་ལན་གྱི་ཚོགས་འདུའི་སྟེང་བོད་ནང་དུ་བོད་ཕྲུག་གི་ངོ་བོ་བསྒྱུར་གྱི་ཡོད་པའི་སྐོར་ལ་གྲོས་བསྡུར་བྱས་ཡོད་ལ། བོད་ཀྱི་ཆོས་དང་རིག་གཞུང་དེ་དག་དམིགས་བསལ་གྱིས་ཡར་རྒྱས་ཇི་ལྟར་གཏོང་དགོས་པ་དང་འབྲེལ་ནས་གླེང་སློང་གནང་སྟེ། གཙོ་བོ་བོད་ཀྱི་སྲོལ་རྒྱུན་གྱི་རིག་གཞུང་འགྲོ་སྟངས་ལྟར་ཐོས་བསམ་སྒོམ་གསུམ་གྱི་ཐོག་ནས་འགྲོ་བ་ཡིན་ན། དམིགས་བསལ་གྱིས་སློབ་སྦྱོང་གི་སྤུས་ཚད་ཡར་རྒྱས་གཏོང་བར་ཕན་ནུས་ཆེན་པོ་ཡོད་པའི་ཐོག་ལ་གོ་བསྡུར་མང་པོ་བྱས་ཡོད། ཅེས་དང་། ལྟ་གྲུབ་ཀྱི་སློབ་ཁྲིད་གནང་ཕྱོགས་དང་འབྲེལ་ནས་གོ་བསྡུར་དམིགས་བསལ་གནང་མ་སོང་། ཞེས་གསུངས་བྱུང་།
ཚོགས་ཆེན་དང་འབྲེལ་ནས་བལ་ཡུལ་རྣམ་རྒྱལ་མཐོ་སློབ་ཀྱི་སློབ་སྤྱི་ནོར་བུ་ཚེ་རིང་ལགས་ཀྱིས། བལ་ཡུལ་ནང་དུ་དམིགས་བསལ་དགོས་མཁོ་ཅན་ངོས་འཛིན་རྒྱུའི་ཐད་དཀའ་ངལ་འཕྲད་མུས་ཡིན་པ་དང་ལྟ་སྐྱོང་བྱེད་སྟངས་ཐད་འགྲིག་གི་མེད་པ་སོགས་འཐུས་ཤོར་འགྲོ་ཡི་ཡོད་པ་རེད། དེར་བརྟེན། དེ་རིང་ང་ཚོས་དམིགས་བསལ་དགོས་མཁོ་ཅན་གྱི་ཐོག་ལ་ཆེད་ལས་པ་དགོས་ཀྱི་འདུག་ཟེར་ནས་འབོད་སྐུལ་ཞུས་པ་ཡིན། ཞེས་དང་། གཞི་རྩའི་བལ་ཡུལ་ནང་དུ་བོད་པའི་སློབ་ཕྲུག་ཉུང་དུ་འགྲོ་བཞིན་ཡོད། རྣམ་རྒྱལ་མཐོ་སློབ་ཀྱི་ནང་དུ་དགེ་རྒན་དང་ཉལ་ཁང་མཐུན་རྐྱེན་སོགས་གང་ལ་གང་འཚམ་བསྐྲུན་ཡོད། ད་ལྟའི་ཆར་རྣམ་རྒྱལ་མཐོ་སློབ་ཏུ་སློབ་ཕྲུག་ ༣༧༠ ཡོད་པ་དང་། སློབ་ཕྲུག་ཉུང་དུ་འགྲོ་མེད། ཅེས་གསུངས་བྱུང་།
ཟླ་འདིའི་ཕྱི་ཚེས་ ༧ ནས་ ༩ བར་ཉིན་གྲངས་གསུམ་རིང་ཤེས་རིག་ལས་ཁུངས་ཀྱི་གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་བཙན་བྱོལ་བོད་མིའི་ཤེས་རིག་ཚོགས་ཆེན་ཐེངས་བརྒྱད་པ་འཚོགས་ཡོད་ཅིང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཆེས་མཐོའི་ཁྲིམ་ཞིབ་ཁང་གི་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག དེ་བཞིན་ལྷན་ཁང་ཁག་གི་དྲུང་ཆེ་དང་དྲུང་ཚབ་རྣམ་པ་དང་། སློབ་གྲྭ་ཁག་གི་འགན་འཛིན། མ་སུ་རི་བོད་ཁྱིམ་ནས་སློབ་གྲྭའི་སྐུ་ཚབ་གྲངས་ ༢༤ དང་། དྷ་སྟེང་བོད་ཁྱིམ་ཁྱབ་ཁོངས་ཀྱི་སྐུ་ཚབ་ ༦༠། སཾ་བྷོ་ཊ་ཁྱབ་ཁོངས་ཀྱི་སྐུ་ཚབ་ ༩༡། བལ་ཡུལ་གངས་ཅན་བདེ་རྩའི་ཁྱབ་ཁོངས་ཀྱི་སྐུ་ཚབ་ ༢༡། གཞན་ཡང་རང་སྐྱོང་སློབ་གྲྭའི་སྐུ་ཚབ་ ༡༠ བཅས་ཚོགས་བཅར་བ་ཁྱོན་ ༢༠༦ ཕེབས་ཡོད་འདུག དེ་རིང་བཙན་བྱོལ་བོད་མིའི་ཤེས་རིག་ཚོགས་ཆེན་ཐེངས་བརྒྱད་པའི་ཚོགས་བཅར་བ་ཐུན་མོང་གིས་གསར་འགོད་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་གིས་བོད་དུ་འཛིན་པའི་སྲིད་ཇུས་ཡོད་ཚད་བོད་མིའི་མངོན་འདོད་དང་མི་མཚུངས་པ་ཤ་སྟག་ཡིན་པ་མ་ཟད། བོད་ཕྲུག་རྣམས་ལ་མཐོ་རིམ་སློབ་སྦྱོང་དང་ལས་ཞུགས་ཀྱི་གོ་སྐབས་དང་ཐོབ་ཐང་མེད་པ་བཟོ་བ་དང་། སོ་སོའི་མི་རིགས་ཀྱི་ངོ་བོ་རྒྱུན་འཛིན་མི་ཐུབ་པ་བཟོ་བྱེད་པ་ནི་འགྲོ་བ་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་བའི་ཉེན་ཚབས་ཅན་གྱི་བྱ་སྤྱོད་ཅིག་ཡིན་པས། ཚོགས་ཆེན་འདི་བརྒྱུད་ནས་རྒྱ་གཞུང་གི་མཁྲེགས་བཟུང་སྲིད་ཇུས་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་སྐོར་སོགས་གསལ་འདུག
གསར་འགོད་པ། བསྟན་འཛིན་ཕུར་བུ།
