བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་སྲིད་འཛིན་ཊོམ་ཕུ་དང་ཕྱི་སྲིད་བློན་ཆེན་རའུ་བྷི་ཡོ་གཉིས་ལ་འཚམས་འཕྲིན་ཕུལ་ཏེ། ཨ་རིས་མུ་མཐུད་བོད་དང་བོད་མིར་རྒྱབ་སྐྱོར་སྔར་ལྷག་གནང་བའི་རེ་སྐུལ་ཞུས་འདུག
དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཨ་རིའི་སྲིད་འཛིན་ཌོ་ནལ་ཊོམ་ཕུ་མཆོག་དང་ཨ་རིའི་ཕྱི་སྲིད་བློན་ཆེན་གསར་པ་མཱར་ཁོ་རའུ་བྷི་ཡོ་གཉིས་ལ་འཚམས་འཕྲིན་གནང་འདུག་ཅིང་། འཕྲིན་ཡིག་གི་ནང་དོན་དུ་ཨ་རིས་མུ་མཐུད་བོད་དོན་ལ་རྒྱབ་སྐྱོར་གྱི་སྲིད་ཇུས་ཤུགས་ཆེ་རུ་བཏང་སྟེ་བོད་མིའི་སྒྲིག་འཛུགས་དང་ལྷན་དུ་མཉམ་ལས་རོགས་འདེགས་ཡོང་བའི་རེ་སྐུལ་ཞུས་འདུག
དེ་འབྲེལ་སྲིད་སྐྱོང་མཆོག་ནས་སྲིད་འཛིན་ཊོམ་ཕུར་ཕུལ་བའི་འཚམས་འཕྲིན་ནང་། ཊོམ་ཕུའི་དབུ་ཁྲིད་འོག་ཨ་རིས་འཛམ་གླིང་ནང་དམངས་གཙོའི་རིན་ཐང་སྲུང་སྐྱོབ་དང་སའི་གོ་ལར་འཕྲད་བཞིན་དཀའ་ངལ་གླེང་སློང་། དེ་བཞིན་ཨ་རི་ནི་མུ་མཐུད་རང་དབང་དང་དམངས་གཙོའི་འོད་སྣང་ཞིག་ཏུ་གནས་ཐུབ་པའི་རེ་བ་ཡོད།
ཨ་རིའི་གཞུང་འཛིན་རིམ་པས་བོད་དོན་ལ་རྒྱབ་སྐྱོར་གནང་ཞིང་། ཨ་རིས་བོད་མི་དམངས་ལ་དཀའ་ཚགས་ཇི་ཙམ་ཆེ་ཡང་གཡས་སྐྱོར་གཡོན་སྐྱོར་གྱིས་བོད་མི་རྣམས་ལ་རེ་བར་སྟོབས་ཤུགས་སྤྲད་གནང་བར་ཐུགས་རྗེ་ཆེ་ཞུས་འདུག་ལ། དམིགས་བསལ་ཊོམ་ཕུའི་ཐོག་དང་པོའི་འཛིན་སྐྱོང་སྐབས། ཁོང་གིས་ཕྱི་ལོ་ ༢༠༢༠ ལོའི་བོད་དོན་རྒྱབ་སྐྱོར་གྱི་སྲིད་ཇུས་ལ་མཚན་རྟགས་བསྐྱོན་ཏེ་བོད་དང་བོད་མིར་རྒྱབ་སྐྱོར་གནང་བར་བཀའ་དྲིན་ཞུས་འདུག
ཕྱི་སྲིད་བློན་ཆེན་གསར་བར་ཕུལ་བའི་འཕྲིན་ཡིག་ནང་། ཁྱེད་ཀྱིས་ཨ་རིའི་གྲོས་ཚོགས་ནང་བོད་རྒྱའི་དཀའ་རྙོག་ཐད་ཤེས་རྟོགས་ཟབ་མོ་ཡོད་པ་གསལ་འདོན་བྱས་སོང་ལ། དམིགས་བསལ་ཁྱེད་ནས་ཡུན་རིང་བོད་དོན་ལ་རྒྱབ་སྐྱོར་གནང་བར་བོད་མི་ཚང་མས་དུས་རྟག་ཏུ་སེམས་ཁོངས་ནས་བཀའ་དྲིན་ཞུ་བཞིན་ཡོད།
ད་ལྟ་ཁྱེད་ཀྱིས་གལ་གནད་ཆེ་བའི་ཨ་རིའི་ཕྱི་སྲིད་བློན་ཆེན་གྱི་ཐུགས་འགན་བཞེས་པ་དང་། ང་ཚོས་རེ་ལྟོས་དང་བཅས་ཁྱེད་ཀྱི་དབུ་ཁྲིད་འོག་ཨ་རིའི་བོད་དང་བོད་མིར་རྒྱབ་སྐྱོར་གྱི་སྲིད་ཇུས་ཁག་གོང་སྤེལ་དང་ཤུགས་ཇེ་ཆེར་གཏོང་བར་མུ་མཐུད་མཉམ་ལས་མཉམ་འདེགས་ཡོང་བར་རེ་བས་ཁེངས་ཡོད། མཐར་ང་ཚོས་ཁྱེད་ལ་བསྐྱར་དུ་འཚམས་འདྲི་ཞུ་བཞིན་ཡོད། ཅེས་གསུངས་འདུག
མཇུག་ཏུ་སྲིད་སྐྱོང་མཆོག་གིས། སྲིད་འཛིན་ཊོམ་ཕུ་དང་ཕྱི་སྲིད་བློན་ཆེན་རའུ་བྷི་ཡོ་གཉིས་ཀྱི་ཕྲག་ཏུ་བབས་པའི་ལས་དོན་ལམ་ལྷོངས་ཡོང་ཞིང་། རང་དབང་དང་དྲང་བདེན། འགྲོ་བ་མིའི་ཐོབ་ཐང་སོགས་ཐུན་མོང་གི་རིན་ཐང་གོང་སྤེལ་ཐད་མུ་མཐུད་མཉམ་ལས་གཞོལ་འདེགས་བྱེད་པའི་རེ་བ་ཡོད་སྐོར་གསུངས་འདུག
གསར་འགོད་པ། སྐལ་བཟང་སྦྱིན་པ།
