བོད་མི་ཚང་མས་བོད་དོན་འཐབ་རྩོད་ཀྱི་ཐོག་རྡོག་རྩ་གཅིག་སྒྲིལ་བྱ་རྒྱུ་གལ་ཆེན་ཡིན།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་ངོ་བོ་སྲུང་སྐྱོབ་དང་། ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་བྱ་རྒྱུ་གལ་ཆེན་ཡིན་སྐོར་སོགས་གསུངས་འདུག

Sikyong Penpa Tsering and Chief Minister of Arunachal, Shri Pema Khandu ji, attended the inaugural of a day-long seminar on “Environment and Security” at the Dorjee Khandu Auditorium Hall at Legislative Assembly, Itanagar, Arunachal Pradesh.

ཟླ་འདིའི་ཕྱི་ཚེས་ ༡༩ ནས་ཕྱི་ཟླ་ ༢ ཚེས་ ༥ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལི་དང་། བྱང་ཤར་ཁུལ་གྱི་ས་གནས་དྷི་མ་སྤུར། ཨི་ཊ་ན་གྷར། ཀྲུ་ཀྲིང་། མེའོ། ཏི་ཛུ། རྡོར་གླིང་ཁུལ་གྱི་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་གནང་མུས་ཡིན་པ་ལྟར། དེ་རིང་ཕྱི་ཚེས་ ༢༤ ཉིན་ཨ་རུ་ན་ཅལ་མངའ་སྡེའི་གྲོས་ཚོགས་ཀྱི་ཚོགས་ཁང་དུ་ཁོར་ཡུག་དང་བདེ་འཇགས་ (Environment and Security) ཞེས་པའི་བརྗོད་གཞིའི་ཐོག་བགྲོ་གླེང་འཚོགས་བཞིན་པའི་སྟེང་། སྲིད་སྐྱོང་སྤེན་པ་ཚེ་རིང་མཆོག་དང་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག དེ་བཞིན་རྒྱ་གར་གྲོས་ཚོགས་འོག་མའི་འཐུས་མི་ཏ་པིར་གྷའོ་ (Tapir Gao) ལགས་དང་། རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ (R. K. Krimey) ལགས། ཨ་རུ་ན་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ (Tarh Tarak) ལགས་སོགས་ཕེབས་ཡོད་འདུག

ཟླ་འདིའི་ཕྱི་ཚེས་ ༢༢ ཉིན་སྲིད་སྐྱོང་སྤེན་པ་ཚེ་རིང་མཆོག་དྷི་མ་སྤུར་གནམ་ཐང་དུ་ཕེབས་འབྱོར་བྱུང་རྗེས་སྲིད་སྐྱོང་མཆོག་གིས་མང་ཚོགས་ལ། རྒྱལ་སྤྱིའི་སྟེང་བོད་དོན་འཐབ་རྩོད་ཀྱི་གནས་སྟངས་དང་དཀའ་ངལ། དེ་བཞིན་བོད་མིའི་གཞིས་ཆགས་དང་ཚོགས་སྡེ་ཁག་གི་གནས་བབ་འགྱུར་བཞིན་པའི་ཁྲོད་བོད་མིའི་གཞིས་ཆགས་དང་སྒྲིག་འཛུགས་ཁག་རྒྱུན་གནས་ཐུབ་རྒྱུ་གལ་གནད་ཆེན་པོ་ཡིན་སྐོར་དང་། བཙན་བྱོལ་བོད་མིའི་འོས་འདེམས་བྱས་པའི་སྐུ་ཚབ་ཅིག་ཡིན་པའི་ཆ་ནས། བཙན་བྱོལ་བོད་མིའི་གཞིས་ཆགས་ཁག་དང་ཁ་འཐོར་ས་གནས་ཁག་ཏུ་ཡང་ཡང་ཕྱོགས་སྐྱོད་བྱས་ཏེ་མང་ཚོགས་ཀྱི་གནས་སྟངས་ལ་རྒྱུས་ལོན་དང་གཟིགས་ཞིབ་བྱས་པ་བརྒྱུད་བོད་མིའི་སྒྲིག་འཛུགས་དང་བོད་མི་བར་གྱི་འབྲེལ་ལམ་རྒྱུན་འཁྱོངས་དང་། བོད་དོན་འཐབ་རྩོད་ཀྱི་ནུས་པ་ཆེ་རུ་གཏོང་རྒྱུ་གལ་ཆེན་པོ་ཡིན་སྐོར་སོགས་གསུངས་འདུག

ཡང་སྲིད་སྐྱོང་མཆོག་གིས། རྒྱ་བལ་འབྲུག་གསུམ་ནང་གི་བོད་མིའི་གཞིས་ཆགས་ཁག་ཏུ་གནས་སྡོད་བོད་མི་མང་དག་ཅིག་གིས་སོ་སོའི་མ་འོངས་པའི་མདུན་ལམ་ཆེད་དུ་ཕྱི་རྒྱལ་ཡུལ་གྲུ་ཁག་ཏུ་གཞིས་སྤོས་ཀྱི་གནས་སྟངས་ཇེ་མང་དུ་འགྲོ་བཞིན་ཡོད་པ་དང་། བཙན་བྱོལ་བོད་མིའི་མི་འབོར་གྱི་གནས་སྟངས་ལ་དབྱེ་ཞིབ་བྱས་པ་བརྒྱུད་འཛམ་གླིང་གང་སར་གནས་པའི་བོད་མིའི་སྤྱི་ཚོགས་ཀྱི་ངོ་བོ་དང་། རིག་གཞུང་། སྐད་ཡིག་སོགས་སྲུང་སྐྱོབ་བྱེད་རྒྱུའི་ཐབས་ལམ་གསར་པ་དགོས་གལ་ཆེན་པོ་ཡིན་པ་མ་ཟད། བོད་མི་རྣམས་ཀྱིས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་བྱ་རྒྱུའི་གལ་ཆེན་པོ་ཡིན་པ་མ་ཟད། བོད་ཙམ་མིན་པར་བོད་ཀྱི་ཆོས་དང་རིག་གཞུང་གིས་ཧི་མ་ལ་ཡའི་རི་རྒྱུད་དང་། རྒྱལ་སྤྱིའི་ནང་པའི་སྤྱི་ཚོགས་ཁྲོད་དུ་ཤུགས་རྐྱེན་ཐེབས་བཞིན་ཡོད་པ་ནན་བརྗོད་གནང་ཡོད་འདུག

ཡང་ཁོང་གིས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མི་རིགས་ཀྱི་ངོ་བོ་རྩ་མེད་གཏོང་རྒྱུའི་སྲིད་ཇུས་ལག་བསྟར་བྱས་དང་བྱེད་མུས་ཡིན་པར་བརྟེན། བོད་མི་རྣམས་ཀྱིས་སོ་སོའི་ངོ་བོ་སྲུང་སྐྱོབ་བྱ་རྒྱུ་དང་། བོད་ཀྱི་སྐད་ཡིག་དང་། ལོ་རྒྱུས་སོགས་ཀྱི་གོ་རྟོགས་དགོས་གལ་ཆེན་པོ་ཡིན་སྐོར་དང་། རྒྱ་ནག་གཞུང་གིས་བོད་ནང་གི་བོད་ཕྲུག་ཚོར་རྒྱ་སྒྱུར་སློབ་གསོ་སྤྲོད་པ་སོགས་བོད་ནང་གི་བོད་མི་རྣམས་ལ་དམ་དྲག་ཤུགས་ཆེན་བྱས་དང་བྱེད་མུས་ཡིན་པའི་ཛ་དྲག་གི་གནས་སྟངས་སྐོར་འགྲེལ་བརྗོད་གནང་བའི་ཁར། ད་ལྟའི་དང་བླངས་བོད་དོན་ཞུ་གཏུག་ལས་འགུལ་གྱི་གནས་སྟངས་དང་། ཉེ་ལམ་ཨ་རིའི་སྲིད་གཞུང་གིས་གཏན་འབེབས་གནང་བའི་བོད་དོན་ཁྲིམས་འཆར་གྱི་གལ་གནད་སོགས་ངོ་སྤྲོད་གནང་ཞིང་། དམིགས་བསལ་བོད་དོན་འཐབ་རྩོད་ཀྱི་ནུས་པ་ཇེ་ཆེར་གཏོང་བར་སྒྲིག་འཛུགས་ཚགས་ཚུད་དགོས་པ་དང་། ལས་བྱེད་རྣམས་ཀྱི་ནུས་པ་གོང་སྤེལ་གཏོང་རྒྱུ་གལ་ཆེན་པོ་ཡིན་སྐོར། དེ་བཞིན་བོད་ཀྱི་གྲངས་འཛིན་དཔེ་མཛོད་ཀྱི་ལས་གཞི་དང་། ཁྱིམ་ཐོ་ཞིབ་བཤེར། སྲི་ཞུའི་ལས་བྱེད་རྣམས་ཀྱི་ནུས་པ་སྐྱེད་སྲིང་གི་ལས་གཞི་སོགས་བཀའ་ཤག་གི་ལས་འཆར་ཁག་གི་གནས་སྟངས་སོགས་ངོ་སྤྲོད་གནང་ཡོད་འདུག

Sikyong Penpa Tsering addressing the Dimapur Tibetan community during the second leg of his official visit to the region.

དབུ་མའི་ལམ་དང་འབྲེལ་ནས་སྲིད་སྐྱོང་མཆོག་གིས། བོད་རྒྱའི་དཀའ་རྙོག་སེལ་ཐབས་ཀྱི་ཐབས་ལམ་གཙོ་བོ་ནི་དབུ་མའི་ལམ་ཡིན་ཞིང་། བོད་མི་རྣམས་ཀྱིས་འཛམ་གླིང་གི་ཆབ་སྲིད་འགྱུར་ལྡོག་ལ་དོ་སྣང་བྱ་རྒྱུ་དང་། བོད་མི་རྣམས་ཀྱི་ཆབ་སྲིད་ཀྱི་ལྟ་བ་དང་ལངས་ཕྱོགས་མི་མཐུན་ཡང་། བོད་དོན་འཐབ་རྩོད་དང་། དྲང་བདེན། རང་དབང་སོགས་ཀྱི་ཆེད་དུ་རྡོག་རྩ་གཅིག་སྒྲིལ་དགོས་གལ་ཆེ་བ་དང་། དྷི་མ་སྤུར་བོད་མིའི་གཞིས་ཆགས་སུ་གནས་སྡོད་བོད་མི་རྣམས་ཀྱིས་རང་ཁ་རང་གསོའི་ཐོག་ནས་གནས་ཐུབ་པར་བསྔགས་བརྗོད་ཡོད། ཅེས་སོགས་གསུངས་འདུག

ཟླ་འདིིའི་ཕྱི་ཚེས་ ༢༡ ཉིན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་རྒྱལ་ས་ལྡི་ལིར་ཡོད་པའི་བོད་ཁྱིམ་སྡོད་ཁང་ (Tibetan Youth Hostel) དུ་འཚམས་གཟིགས་སུ་ཕེབས་ཏེ། བོད་པའི་གཞོན་སྐྱེས་རྣམས་ལ་ཐུག་འཕྲད་ཀྱིས་གསུང་བཤད་དང་དྲི་བ་དྲིས་ལན་སོགས་གནང་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།