རྩོམ་ཁུངས། བོད་ཀྱི་དུས་བབ།
རྩོམ་པ་པོ། ཆབ་མདོ་ངག་ཕུན།
དེ་རིང་ངས་གླེང་འདོད་པ་ནི། དེང་སྐབས་ང་ཚོའི་སྤྱི་ཚོགས་ནང་གི་གནད་དོན་འགའ་ཤས་ཀྱི་སྐོར་ཡིན་ཞིང་། རྒྱལ་སྲས་ཆེན་པོ་ཞི་བ་ལྷས་གསུངས་པ་ལྟར།
“སྔོན་ཆད་མ་བྱུང་བ་ལ་འདིར་བརྗོད་མེད། ། སྡེབ་སྦྱོར་མཁས་པའང་བདག་ལ་ཡོད་མིན་ཏེ། ། དེ་ཕྱིར་གཞན་དོན་བསམ་པའང་བདག་ལ་མེད། ། རང་གི་ཡིད་ལ་བསྒོམ་ཕྱིར་ངས་འདི་བརྩམས། །” ཞེས་གསུངས་དོན་ལྟར། མི་ཚོས་བཤད་མ་མྱོང་བ་ཞིག་དང་བསམ་མ་མྱོང་བ་ང་ལ་དམིགས་བསལ་བཤད་རྒྱུ་གང་ཡང་མེད་མོད། སྐབས་རེར་རང་ཉིད་གཅིག་པུའི་སྐབས་སུ་སྤྱི་ཚོགས་ཀྱི་གནས་སྟངས་འགའ་ཤས་མཐོང་ཡོང་དུས། རང་བཞིན་གྱིས་སེམས་ནང་བརྗོད་མི་ཤེས་པའི་ཚོར་སྣང་དེ་འདྲ་སྐྱེ་འོང་གི་འདུག
དེ་ཡང་། དང་ཐོག་བཙན་བྱོལ་དུ་སླེབས་དུས་མི་སྣ་འགའ་ཤས་ཀྱིས་མི་ཡུལ་ལུང་པར་དེ་འདྲའི་དུས་ཚོད་རིང་པོ་འགོར་གྱི་རེད་བསམ་པ་བསམ་བློའི་ནང་འཁོར་མྱོང་མེད། ཡིན་ནའང་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་༸རྒྱལ་བ་རིན་པོ་ཆེ་མཆོག་གིས་གྲ་སྒྲིག་སྡུག་ས་དང་། རེ་བ་བཟང་སར་རྒྱག་དགོས་པའི་བཀའ་སློབ་གནང་ནས། བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པ་འཆར་གཞི་གོ་རིམ་ལྡན་པ་གསར་འཛུགས་མཛད་པ་ཙམ་མ་ཟད། མ་འོངས་པའི་ཕུགས་རྒྱང་རིང་པོར་དགོངས་པ་རླབས་ཆེན་བཞེས་པའི་དྲིན་ལས། དེང་སྐབས་བོད་མི་རྣམས་འཛམ་གླིང་ཐོག་ཏུ་འཚོ་གནས་ཐུབ་པ་བྱུང་ཡོད་ལ། འཛམ་གླིང་ནང་དུ་སྐྱབས་བཅོལ་བ་མང་པོ་ཡོད་པའི་ནང་ནས་མི་འདྲ་བའི་ཐོག་ནས་གནས་ཐོབ་པ་བྱུང་ཡོད། ཡིན་ནའང་བོད་མི་རྣམས་མི་ཡུལ་ལུང་པར་བོད་ཀྱི་བདེན་མཐའ་ཇི་སྲིད་མ་གསལ་བར་དེ་སྲིད་བར་དུ་གནས་ཐུབ་དགོས་ངེས་རེད་སྙམ། རྒྱུ་མཚན་དེ་དག་ལ་བརྟེན་༸རྒྱལ་བ་རིན་པོ་ཆེས་དགོངས་པ་རླབས་ཆེན་བཞེས་གནང་མཛད་ནས་སློབ་གཞིས་ཁག་གསར་འཛུགས་མཛད་ཡོད།
དེང་སྐབས་བོད་མིའི་གཞིས་ཆགས་དང་སློབ་གྲྭའི་གནས་སྟངས་ཐད་ཀྱི་བསམ་ཚུལ་ཞིབ་ཕྲ་ཞིག་ཞུས་པ་ཡིན་ན། དེང་སྐབས་སློབ་གྲྭ་ཁག་ཏུ་སློབ་ཕྲུག་ཉུང་བའི་དཀའ་ངལ་དང་། གཞིས་ཆགས་ཁག་ཏུའང་གཞིས་མི་ཇེ་ཉུང་དུ་གྱུར་བཞིན་ཡོད་པའི་དཀའ་ངལ། གཞིས་ཆགས་ཁག་ཏུ་རྒན་འཁོགས་ལས་ལོ་ཆུང་བ་རྣམས་སློབ་མཐར་ཕྱིན་རྗེས་ས་གཞན་དུ་ལས་ཀ་འཚོལ་བ་ལས་གཞིས་ཆགས་ནང་བསྡད་ནས་ཞིང་ལས་བྱེད་བསམ་པའི་འདོད་པ་མེད་ཅིང་། གཞིས་མི་ལོ་ཆེ་བ་རྣམས་ཀྱང་གོང་ཞུས་ལྟར་རིམ་གྱིས་རྫོགས་འགྲོ་བཞིན་ཡོད། དེ་བཞིན་ལོ་ཆུང་མང་ཆེ་བ་ཕྱི་རྒྱལ་ཁག་ཏུ་འགྲོ་ཐབས་ལ་བརྩོན་པ་ལས་གཞིས་ཆགས་ནང་བསྡད་ནས་མི་ཚེའི་མཐའ་བསྐྱེལ་དགོས་བསམ་མཁན་ཉུང་ཉུང་ལས་མེད་ཅིང་། ལོ་ཆུང་མང་ཆེ་བ་འགྲོ་སོང་ཕོན་ཆེ་བཏང་ནས་ཕྱི་རྒྱལ་ཁག་ཏུ་སླེབས་ཐབས་ལ་བརྩོན་བཞིན་ཡོད།
ལྷག་དོན་སློབ་གྲྭ་ཁག་ཏུ་སློབ་ཕྲུག་ཇེ་ཉུང་དུ་འགྱུར་ནས་སློབ་གྲྭ་འགའ་ཤས་སྒོ་བརྒྱབ་དགོས་བྱུང་དང་འབྱུང་བཞིན་ཡོད། དེ་དག་ལ་བསམ་བློ་གཏོང་དུས་སེམས་ནང་དངངས་སྐྲག་སྐྱེ་དགོས་པའི་གནས་སྟངས་ཤིག་ཏུ་འགྱུར་བཞིན་འདུག་སྙམ། ངས་དེ་འདྲའི་བརྗོད་དུས་རི་བོང་གནམ་རྡིབ་ཀྱི་སེམས་ཁྲལ་བྱེད་ཀྱི་འདུག་སྙམ་པའི་དགོངས་པ་འཁོར་མཁན་ཡོད་སྲིད། གང་ལྟར་ང་ཚོ་ལུང་པ་མེད་པའི་བཙན་བྱོལ་བ་ཞིག་ཡིན་དུས་དངོས་གནས་མ་འོངས་པར་ང་ཚོ་མི་རིགས་འདི་ཉིད་ཁ་ཕྱོགས་གང་འདྲ་ཞིག་ཏུ་འགྱུར་འགྲོ་ན་བསམ་ནས་སེམས་ཁྲལ་ཡོང་གི་འདུག
གཅིག་བྱས་ན་རང་ཉིད་ཤེས་བྱ་ཡོན་ཏན་དམན་པའི་དབང་གིས་སྐྱོན་ཡིན་སྲིད། དེང་སྐབས་ན་གཞོན་མང་ཆེ་བ་སློབ་གྲྭ་ཁག་ནས་ཐོན་པ་ཤ་སྟག་ཡིན་པས། སློབ་སྦྱོང་ཡོད་མཁན་ལས་སློབ་སྦྱོང་མེད་མཁན་རེ་ཟུང་ལས་མེད། སྔོན་དུས་ཡིན་ནའང་རྒན་རབས་དེ་དག་ལ་དེང་དུས་སློབ་སྦྱོང་མེད་ནའང་སྙིང་རུས་ཆེ་ཞིང་། སྤྱི་སེམས་ཆེ་བ་དང་། རང་ཉིད་ལས་གཞན་གཙོ་བོར་འཛིན་ནས་ཕྱག་ལས་གནང་གི་ཡོད། དེང་སྐབས་དེ་དག་ལས་ཡོངས་སུ་ལྡོག་སྟེ་ཨང་དང་པོ་རང་ཉིད་གཙོ་བོར་འཛིན་ནས་ལས་དོན་གནང་གི་ཡོད་པར་མཐོང་གི་འདུག་ཅིང་། རང་ལས་གཞན་གཅེས་ཞེས་པའི་ཚིག་དེ་དག་གྱང་ངོས་དང་། ཤོག་ཐོག་ཏུ་བཀོད་པ་དང་ངག་ནས་བརྗོད་པ་ཙམ་ལས་ལག་ལེན་བསྟར་མཁན་ཧ་ཅང་དཀོན་པོ་ཡོད་པ་ཞིག་ཏུ་མཐོང་། དེ་དག་ང་ཚོའི་སློབ་གྲྭ་ཁག་ཏུ་ཤེས་ཡོན་སྤྲོད་སྟངས་མ་འགྲིག་པའི་འཐུས་ཤོར་ཡིན་ནམ། ཁྱིམ་ཚང་གི་སློབ་གསོས་མ་འདང་བ་ཡིན་ནམ། གང་ལྟར་ན་གཞོན་གསོ་སྐྱོང་ལ་འཐུས་ཤོར་ཆེན་པོ་ཞིག་ཕྱིན་འདུག་སྙམ།
གཙོ་ཆེ་ཤོས་ནི་རྒྱལ་ཞེན་གྱི་ལྟ་བ་དེ་རེད། དེང་སྐབས་རྒྱལ་ཞེན་གྱི་ལྟ་བ་ཉམས་ཆགས་སུ་འགྲོ་བཞིན་ཡོད་པ་མངོན་འོང་གི་འདུག་ཅིང་། རྒྱལ་ཞེན་གྱི་ལྟ་བ་མེད་སོང་ན། མི་རིགས་ཤིག་གི་འཐབ་རྩོད་གང་འདྲ་གནས་དགོས་པ་རེད་དམ། ང་ཚོའི་ངེས་པར་དུ་རྒྱལ་ཞེན་གྱི་ལྟ་བ་ཡོང་ཐབས་ལ་ན་གཞོན་རྣམས་ལ་སློབ་གསོ་གང་འདྲ་ཞིག་གནང་དགོས་ཀྱི་འདུག་སྙམ་པའི་འབྲེལ་ཡོད་ཚོས་དགོངས་པ་བཞེས་པའི་དུས་ལ་བབ་འདུག་སྙམ།
དེང་སྐབས་འགའ་ཤས་ཀྱིས་ཆབ་སྲིད་ཅེས་གླེང་ཡོང་དུས་མགོ་གཡུག་བཞིན་འདུག་ཅིང་། ང་ཚོ་ཆབ་སྲིད་པའི་སྐྱབས་བཅོལ་པ་ཞིག་ཡིན་པ་ལས། ང་ཚོའི་རྒྱབ་ཏུ་གྱོན་རྒྱུ་མ་རག་པ་དང་། ཁ་ལ་བཟའ་རྒྱུ་མ་རག་ནས་བཙན་བྱོལ་དུ་ཡོང་བ་ཞིག་མ་རེད། ང་ཚོའི་གཅེས་པའི་ཕ་ཡུལ་གཞན་གྱིས་བཙན་འཕྲོག་བྱས་ནས་ལ་ལུང་དུ་མ་ཞིག་བརྒྱབ་ནས་མི་འདོད་བཞིན་དུ་བཙན་བྱོལ་དུ་ཡོང་དགོས་བྱུང་བ་རེད། ང་ཚོའི་གཅེས་པའི་ཕ་ཡུལ་རྒྱ་དམར་གྱི་ལག་ཏུ་ཤོར་ནས་མི་ལོ་དྲུག་ཅུ་རེ་དྲུག་ལྷག་འགྲོ་བཞིན་ཡོད། ལོ་ངོ་དེ་དག་ནང་གཞིས་ལུས་སྤུན་ཟླ་རྣམས་ཁྲག་དང་མིག་ཆུའི་འོག་ཏུ་འཚོ་བ་རོལ་དགོས་ཐུག་ཡོད། ཡིན་ནའང་སྙིང་སྟོབས་མ་ཞུམ་པའི་ཐོག་ནས་མུ་མཐུད་བདེན་པར་འཐབ་རྩོད་གནང་དང་གནང་བཞིན་ཡོད།
ད་ནི་ང་ཚོ་ཞལ་ནས་སྙིང་རྗེ་པོ་བཤད་བསྡད་པའི་དུས་ཚོད་ཅིག་མ་རེད། དེ་ལས་ཀྱང་ང་ཚོས་རྒྱལ་ཁབ་ཡོད་པ་ནང་བཞིན་དཔོན་ཉམས་སྟོན་པའི་དུས་ཚོད་དེ་ལས་ཀྱང་མ་རེད། ང་ཚོ་ག་ཚོད་ཅིག་ཡིན་ལབ་པ་ཡིན་ནའང་ཐོད་པར་སྐྱབས་བཅོལ་བ་ཞེས་བྲིས་ཡོད། ཇི་སྲིད་བར་དུ་བོད་ལ་རང་དབང་གི་ཉི་མ་མ་ཤར་བར་དེ་སྲིད་བར་དུ་ཐོད་པར་སྐྱབས་བཅོལ་ཞེས་གནས་ཀྱི་རེད། རྒྱུ་མཚན་དེ་དག་ལ་བརྟེན་རང་ཉིད་སྐྱབས་བཅོལ་བ་ཞིག་ཡིན་སྙམ་པའི་ཐོག་ནས་བོད་ཀྱི་རྩ་དོན་ཐོག་ཏུ་ལས་དོན་གནང་དགོས་པ་ཞིག་རེད། སྐབས་རེར་ལས་གཞི་མང་པོ་མགོ་བརྩམས་ནས་ང་ཚོ་སྐྱབས་བཅོལ་བ་ཞིག་ཡིན་པ་བརྗེད་ཀྱི་མེད་དམ་སྙམ། ང་ཚོ་ནི་མིའི་ལུང་པར་མགྲོན་པོ་ཞིག་ཡིན་པ་ལས་གཏན་དུ་སྡོད་མཁན་ཞིག་མ་རེད།
བོད་མི་རིགས་ཞེས་པའི་མིང་འདི་ཉིད་སའི་གོ་ལའི་ཐོག་ནས་རྩ་མེད་བཟོ་ཆེད་དུ་རྒྱ་དམར་གྱིས་རིག་གསར་བརྗེ་ཞེས་པའི་ལས་འགུལ་གདུག་རྩུབ་ཅན་སྤེལ་ནས། བོད་རིགས་རྒྱལ་ཞེན་ཅན་དུ་མ་དམར་བསད་བཏང་བ་དང་། བཙོན་ཁང་དུ་བཅུག་ནས་སྡུག་སྦྱོང་མནར་གཅོད་སྣ་ཚོགས་བཏང་བ། མེས་དཔོན་གོང་མ་ཚོས་ངལ་བ་བརྒྱ་ཕྲག་དྭང་དུ་བླངས་ནས་བཞེངས་སྐྲུན་གནང་བའི་དགོན་སྡེ་བྱིན་ཅན་དུ་མ་གཏོར་བཤིག་བཏང་བ་དང་། རྩ་ཆེན་རྒྱལ་བའི་གསུང་རབ་དུ་མ་ཞིག་མེར་བསྲེགས་པ། ཆུར་བསྐྱུར་བ་སོགས་ལས་འགུལ་ཐབས་སྡུག་དུ་མ་ཞིག་སྤེལ་བ་ཙམ་དུ་མ་ཟད། བོད་མི་རིགས་རྣམས་བཙན་དབང་ཐོག་ནས་རྒྱལ་ཞེན་གྱི་བསམ་བློ་མེད་པ་བཟོ་ཐབས་བྱས་ཡོད་ཀྱང་ལམ་ལྷོང་བྱུང་མེད། དེ་བཞིན་རང་རིགས་ན་གཞོན་རྣམས་བློ་འགུག་ཐབས་སུ་བོད་ཀྱི་སྤྱི་ཚོགས་རྙིང་པ་སྡུག་པ་ཡིན་རབས་དང་། བཀས་བཀོད་རྒྱུད་འཛིན་ལམ་ལུགས་ཡིན་རབས། བོད་མི་རིགས་ལ་སྡུག་པོ་བཏང་རབས་སོགས་ཀྱི་བོད་མི་རིགས་ཀྱི་ལོ་རྒྱུས་ནང་དུ་བྱུང་མ་མྱོང་བའི་འཁྱོག་བཤད་སྣ་ཚོགས་ཤིག་གི་སློབ་གསོ་བརྒྱབ་ཡོད། དེ་ལྟ་ནའང་རང་རིགས་ན་གཞོན་རྣམས་རྒྱ་གཞུང་གི་མགོ་བསྐོར་འོག་ཏུ་ཚུད་ཐུབ་མེད། རྒྱ་གཞུང་གིས་བསམ་བློ་གཉིས་པ་ཞིག་བཏང་ནས་ཕྱི་ཡི་རྣམ་པའི་ཐོག་ལ་བོད་ནང་སྲིད་ཇུས་གུ་ཡངས་བཏང་ཡིན་ཚུལ་བསྒྲགས་པ་དང་བསྟུན། གཞིས་ལུས་བོད་མིས་སྙིང་སྟོབས་ཆེན་པོའི་ཐོག་ནས་དེ་སྔོན་གཏོར་བཤིག་བཏང་བའི་དགོན་སྡེ་དེ་དག་མ་བསྐུལ་དང་བླངས་ཀྱིས་བསྐྱར་བཞེངས་མཛད་ཡོད། རྒྱ་དམར་གུང་ཁྲན་ཧོན་འཐོར་དགོས་པ་བཟོས་ཡོད།
དེང་སྐབས་རྒྱ་དམར་སྲིད་གཞུང་གིས་བོད་མི་རིགས་ཀྱི་ཆོས་དང་རིག་གཞུང་རྩ་མེད་བཟོ་ཆེད་དུ། བོད་ཀྱི་ཆོས་རིག་ཐོག་ཏུ་ཕྱག་ལས་རླབས་ཆེན་མཛད་མཁན་གྱི་བླ་སྤྲུལ་ཁག་དང་། ཤེས་ལྡན་མི་སྣ་ཁག་ལ་མ་ཉེས་ཁ་གཡོགས་བྱས་ནས་བཙོན་ཁང་དུ་བཅུག་སྟེ་སྡུག་སྦྱོང་མནར་གཅོད་སྣ་ཚོགས་བཏང་བ་དང་། ཁྲིམས་ཆད་ལོ་དུས་ཚང་ནས་གློད་གྲོལ་བཏང་རྗེས་ནང་དུ་སླེབས་དུས་རིག་འཚོ་མ་ཟིན་པ་བཟོ་བཞིན་ཡོད།
རྒྱ་གཞུང་གིས་གང་ལྟར་རྒྱལ་ཁབ་དང་མི་རིགས་ཀྱི་ལྟ་བ་ཡོད་མཁན་བོད་རིགས་ཤེས་ལྡན་པ་རྣམས་རྒྱ་དམར་གྱིས་མེད་པ་བཟོ་ཐབས་ཀྱི་ལས་འགུལ་ཐབས་སྡུག་དེ་འདྲ་ཞིག་སྤེལ་བཞིན་ཡོད། དེ་ཡང་ཉེ་སྔོན་བོད་ཀྱི་དུས་བབ་ཀྱིས་སྤྲུལ་སྐུ་ཧཱོུཾ་ཀར་རྡོ་རྗེ་མཆོག་གི་སྐོར་ལ་གནས་ཚུལ་སྤེལ་བའི་ནང་། “རིན་པོ་ཆེ་མཆོག་ནས་རྒྱ་ནག་གཞུང་གིས་ངོས་འཛིན་བྱས་པའི་རྒྱལ་མཚན་ནོར་བུ་མགོ་ལོག་ཁུལ་དུ་བསླེབས་སྐབས་རྒྱ་གཞུང་གི་འདོད་བློ་ལྟར་སྣེ་ལེན་མ་གནང་བ་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་དད་གུས་ཤུགས་ཆེན་ཞུས་པ། དེ་བཞིན་བོད་ཀྱི་སྐད་ཡིག་སྲུང་སྐྱོབ་ཐོག་ཕྱག་ལས་གནང་བ་བཅས་ལ་ནག་ཉེས་བཙུགས་ཏེ། རིན་པོ་ཆེ་མཆོག་རྒྱ་ནག་གི་རྒྱལ་མཚམས་ལས་བརྒལ་ཏེ་ཉེན་གཡོལ་དུ་ཕེབས་ཡོད་ཀྱང་། ཝི་ཏི་ནམ་ནང་སྐུ་བཀྲོངས་པ་གསལ་པོ་ཡིན་ཡང་།” ཞེས་དང་། ཡང་རིན་པོ་ཆེ་མཆོག་གིས་མ་ཡུལ་ལ་ཕུལ་བའི་འཕྲིན་ལས། “ཉིན་རེ་ཉིན་རེར་རྔོན་པའི་ཚོགས་དང་ཐག་ཇེ་ཉེ་རུ་ཕྱིན་པ་དང་། ཉིན་རེ་ཉིན་རེར་འཇིགས་པ་ཆེ་རུ་ཕྱིན། རྔོན་པ་ཚོས་ས་གནས་ཀྱི་རྔོན་པ་གཞན་པ་ཚོར་གསེར་གྱི་རྔན་པ་སྤྲད་ནས།” ཞེས་གསལ་དོན་ལྟར་རྒྱ་དམར་གྱིས་སྐུ་བཀྲོངས་པ་གསལ་པོ་ཡིན་པ་བརྗོད་མི་དགོས་པ་ཞིག་རེད། དེ་འདྲའི་བྱས་རྗེས་ཆེ་བའི་རིན་པོ་ཆེ་ཁོང་རྒྱལ་མཚམས་ལས་བརྒལ་ཏེ་སྐུ་བཀྲོངས་པ་རེད། དེ་ལས་བློ་ཕམ་ཆེ་བ་གང་ཞིག་ཡོད།
དེ་བཞིན་དེང་སྐབས་བོད་ནང་གི་སློབ་གྲྭ་ཁག་ཏུ་བཙན་དབང་ཐོག་ནས་བོད་ཀྱི་སྐད་ཡིག་སློབ་ཁྲིད་ཉུང་དུ་གཏོང་བཅུག་གི་ཡོད་ལ། དེ་དག་ཉན་འཇོག་མ་བྱས་ཚེ་སློབ་གྲྭ་སྒོ་བརྒྱབ་ཏུ་བཅུག་པ་དང་། སློབ་གྲྭའི་འགན་འཁུར་བ་རྣམ་པ་ཚོར་ཁ་བྲལ་གྱི་ཉེས་མིང་སྣ་ཚོགས་བཏགས་ནས་བཙོན་འོག་ཏུ་བཅུག་སྟེ་སྡུག་སྦྱོང་སྣ་ཚོགས་བཏང་དང་གཏོང་བཞིན་ཡོད། བོད་ནང་གི་ཞིང་འབྲོག་གི་བུ་ཕྲུག་ལོ་ཆུང་རྣམས་གཏན་འཇགས་སློབ་གྲྭ་ཁག་ཏུ་བཏང་བཅུག་སྟེ་བོད་མི་རིགས་ཀྱི་སྐད་ཡིག་དང་། ཡ་རབས་བཟང་པོའི་གོམས་གཤིས་སོགས་དྲི་མ་ཙམ་ཡང་མེད་པ་བཟོ་ཐབས་བྱེད་ཀྱི་ཡོད། དེ་ནི་ཧ་ཅང་ཉེན་ཁ་ཆེན་པོའི་བྱ་ཐབས་ཤིག་ཡིན། མདོར་ན་དོན་དག་ཡང་སྙིང་བོད་མི་རིགས་དང་བོད་མི་རིགས་ཀྱི་སྐད་ཡིག་མེད་པ་བཟོ་ཐབས་སུ་ཇུས་ངན་གཏིང་གི་ཡོད་པ་ནི་བརྗོད་དགོས་པའི་གནས་སྟངས་ཤིག་ཡིན།
རྒྱུ་མཚན་དེ་དག་ལ་བརྟེན་བཙན་བྱོལ་ནང་གི་སློབ་གྲྭ་ཁག་གི་ནང་བོད་ཡིག་ཁྲིད་གནང་གི་ཡོད་ནའང་ད་དུང་སྔར་ལྷག་བོད་ཀྱི་སྐད་ཡིག་ཐོག་ཏུ་དོ་སྣང་དང་ནུས་ཤུགས་སྤུངས་དགོས་པའི་དུས་ལ་སླེབས་འདུག་སྙམ་ལ། རྒྱ་ཆེ་མང་ཚོགས་ཀྱིས་ཀྱང་བོད་ཀྱི་སྐད་ཡིག་ཐོག་ཏུ་དོ་སྣང་དང་འབད་བརྩོན་གནང་དགོས་ཀྱི་འདུག དེ་བཞིན་མང་ཚོགས་ཀྱི་ནུས་ཤུགས་གཅིག་ཏུ་སྤུངས་ནས་རྒྱ་དམར་ལ་གདོང་ལེན་གནང་དགོས་པ་ཞིག་ལས། ང་ཚོ་ནང་ཁུལ་དུ་ཕན་ཐོགས་མེད་པར་ང་དང་ཁྱེད་ཅེས་རྩོད་གླེང་གནང་བསྡད་ན་ཕན་པ་ལས་གནོད་ཆེ་བ་ཞིག་ལས་གཞན་པ་གང་ཡང་མེད།
མཐའ་དོན་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་༧རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བརྟན་ཞིང་། ཐུགས་བཞེད་ལྷུན་གྱིས་འགྲུབ་པའི་སྨོན་འདུན་ཤུགས་དྲག་དང་བཅས།
སྨྲས་པ།
རང་གི་སེམས་ནང་གང་ཞིག་འཆར་བ་རྣམས། །
གཞན་ལ་ཕན་བསམ་ཡི་གེ་ཐོག་ཏུ་ཕབ། །
རང་གི་སེམས་དང་མ་མཐུན་ཡོད་པ་ན། །
དགོངས་པ་མ་ཚོགས་ཞུ་རྒྱུ་ལས་མ་འདས། །
