༧སྐུའི་གོ་སྟོན་དང་འབྲེལ་བའི་རིག་གཞུང་བགྲོ་གླེང་ཞིག་འཚོགས་སོང་།

བཞུགས་སྒར་ཀིརྟིའི་བྱེས་པ་གྲྭ་ཚང་དུ་༧གོང་ས་མཆོག་གི་མཛད་པ་འཕྲིན་ལས་དང་འབྲེལ་བའི་བརྗོད་གཞི་བཞིའི་ཐོག་མཁས་པའི་རིག་གཞུང་བགྲོ་གླེང་ཞིག་འཚོགས་སོང་།

དེ་རིང་སྔ་དྲོའི་ཆུ་ཚོད་ ༩ པ་ཙམ་ལ་བཞུགས་སྒར་ཀིརྟིའི་བྱེས་པ་གྲྭ་ཚང་དུ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་༧སྐུའི་གོ་སྟོན་དང་འབྲེལ་བའི་རིག་གཞུང་བགྲོ་གླེང་ཞིག་འཚོགས་སོང་། ཚོགས་ཐོག་ཏུ་ཀིརྟིའི་བྱེས་པ་གྲྭ་ཚང་གི་མཁན་རིན་པོ་ཆེ་སློབ་དཔོན་ཆེན་མོ་དཀོན་མཆོག་རྒྱ་མཚོ་མཆོག་དང་། མཁན་ཟུར་ཨ་ལགས་མཁན་པོ་ཕུན་ཚོགས་བསྟན་འཛིན་རྒྱ་མཚོ་མཆོག མཁན་ཟུར་ཨ་ལགས་རྗེ་སྤྲུལ་བློ་གྲོས་ཆོས་བཟང་མཆོག ༧སྐྱབས་རྗེ་ཀིརྟི་རིན་པོ་ཆེ་མཆོག་གི་དྲུང་ཡིག་སློབ་དཔོན་དཀོན་མཆོག་འཇིགས་མེད་ལགས། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་གསུང་རྩོམ་ཕྱོགས་སྒྲིག་པ་སློབ་དཔོན་ཆེན་མོ་རེ་མདོ་སེང་གེ་ལགས། དེ་བཞིན་ཀིརྟི་བྱེས་པ་གྲྭ་ཚང་གི་འདུས་མང་ཡོངས་བཅས་འཛོམས་འདུག

ཐེངས་འདིའི་བགྲོ་གླེང་སྐོར་ལ་མཁན་རིན་པོ་ཆེ་སློབ་དཔོན་ཆེན་མོ་དཀོན་མཆོག་རྒྱ་མཚོ་མཆོག་གིས་འདི་གའི་གསར་འགོད་པར། འདས་ལོའི་ཕྱི་ཟླ་དང་པོའི་ནང་རྒྱ་གར་རྡོ་རྗེ་གདན་དུ། ཀིརྟིའི་དགེ་རྩ་ཚོགས་པ་དང་ཀིརྟིའི་བྱེས་པ་གྲྭ་ཚང་གཉིས་ཀྱི་གོ་སྒྲིག་འོག ༧གོང་ས་རྒྱལ་རིན་པོ་ཆེ་མཆོག་གི་ཞབས་བརྟན་སྨོན་ལམ་དང་དགེ་ལུགས་སྨོན་ལམ་ཆེན་མོ་འཕར་མ་འཚོག་བཞིན་པའི་སྐབས་སུ། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་འདི་ལོ་༧སྐུའི་གོ་སྟོན་དང་འབྲེལ་བའི་ཐོག་བྱམས་བརྩེ་ལོར་སྲུང་གཙི་ཞུ་བཞིན་ཡོད་པར་བརྟེན། དགོན་པ་དང་གྲྭ་ཚང་ཁག་ནས་ལས་རིམ་གང་ཡོད་མེད་ཐོག་བཀའ་ཡིག་ཕེབས་ཡོད་པ་བཞིན། ཀིརྟིའི་བྱེས་པ་གྲྭ་ཚང་གི་ངོས་ནས་ཚན་པ་གསུམ་དུ་དབྱེ་ནས་སྲུང་གཙི་ཞུ་བཞིན་ཡོད། དེ་རིང་༧སྐུའི་གོ་སྟོན་དང་འབྲེལ་བའི་རིག་གཞུང་བགྲོ་གླེང་ནི་གྲྭ་ཚང་རང་དུ་གོ་སྒྲིག་ཞུས་པ་རེད། ཕྱི་ལོ་ ༢༠༢༦ ལོའི་ཟླ་དང་པོའི་ནང་སྨོན་ལམ་འཕར་མ་ཞིག་འཚོག་འཆར་ཡོད་ཅིང་། དེའི་སྐབས་སུ་༧སྐྱབས་རྗེ་ཟམ་གདོང་རིན་པོ་ཆེ་མཆོག་གདན་འདྲེན་ཞུས་ཏེ་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་ཐོག་བགྲོ་གླེང་ཞུ་འཆར་ཡོད། དེ་དང་མཉམ་དུ་༧རྗེ་ཙོང་ཁ་པ་དང་༧གོང་ས་རྒྱལ་བ་རིན་པོ་ཆེ་མཆོག་རྣམ་གཉིས་ཀྱི་ཆོས་ཕྱོགས་ཀྱི་མཛད་རྣམ་ཞིག་རྩོམ་སྒྲིག་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།

མཁན་ཟུར་ཨ་ལགས་མཁན་པོ་ཕུན་ཚོགས་བསྟན་འཛིན་རྒྱ་མཚོ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་གསུང་ཐུགས་ཀྱི་མཛད་པ་ལས་འཕྲོས་བའི་གཏམ་ཐོག་བགྲོ་གླེང་གནང་བའི་སྐོར་འདི་གའི་གསར་འགོད་པར། ངའི་བརྗོད་གཞི་ནི་༧གོང་ས་མཆོག་གི་སྐུ་གསུང་ཐུགས་ཀྱི་མཛད་པ་ཆ་ཚང་རེད། མཛད་པའི་ནང་ནས་གལ་ཆེ་ཤོས་དེ་གསུང་གི་མཛད་པ་རེད། གསུང་གི་མཛད་པའི་ནང་དུ་འཆད་རྩོད་རྩོམ་གསུམ་ཡོད། འཆད་པའི་ཆ་ནས་དུས་འཁོར་དབང་ཆེན་སུམ་ཅུ་སོ་བཞི་དང་། ལམ་རིམ་གྱི་མཚོན་པའི་ཧ་ཅང་རྒྱ་ཆེན་པོ་རེད། གསུང་རྩོམ་ལ་དངོས་སུ་གསུངས་པ་དང་མ་གསུངས་པ་སོགས་ཡོད་ལ། དུས་རབས་ཉེར་གཅིག་པའི་སྟོན་པ་ཞེས་ཞུ་བཞིན་ཡོད་པ་ལྟར། ༧གོང་ས་མཆོག་གི་གསུང་ལའང་དུས་རབས་ཉེར་གཅིག་པའི་བཀའ་འགྱུར་ཞེས་ཞུས་ཀྱང་འགྲིག་གི་འདུག་བསམ་གྱི་འདུག  བརྗོད་བྱ་ཡང་ཆོས་ལུགས་དང། ཆབ་སྲིད། དཔལ་འབྱོར་སོགས་འདུལ་བྱར་གང་ལ་གང་འདོད་ལྟར་རྒྱ་ཆེན་པོ་རེད། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་པ་ལས་གལ་ཆེན་པོ་ཞིག་ཏུ་མཐོང་གི་ཡོད། གསུང་གི་རྟེན་ས་ཐུགས་ཀྱི་ཡོན་ཏན་རེད། དེ་དག་ཆ་ཚང་གི་མཛད་པ་བསྐྱངས་ཐུབ་པ་དེ་སྐུ་ལ་རག་ལས་ཡོད། སྐུ་འཁྲུངས་པ་ནས་ད་ལྟ་བར་དུ་མཛད་པ་བསྐྱངས་ཡོད། ༧རྒྱལ་བ་ཡིད་བཞིན་ནོར་བུ་ཞེས་པ་དེ་མཚན་དོན་མཚུངས་པ་ཞིག་ཡིན་པ་དེ། མཛད་པ་ཆ་ཚང་ཐོག་ནས་ཤེས་པ་ཞིག་རེད། ཅེས་འགྲེལ་བརྗོད་གནང་བྱུང་།

༧སྐྱབས་རྗེ་ཀིེརྟི་རིན་པོ་ཆེ་མཆོག་གི་དྲུང་ཡིག་སློབ་དཔོན་དཀོན་མཆོག་འཇིགས་མེད་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིིན་ལས་མངོན་པའི་བོད་ཀྱི་སྐད་ཡིག་གི་རིན་ཐང་ཐོག་བགྲོ་གླེང་གནང་བར་འདི་གའི་གསར་འགོད་པར། ད་ལྟའི་ཆར་བོད་ཕྱི་ནང་གཉིས་སུ་བོད་ཀྱི་སྐད་ཡིག་གནས་སྟངས་དེ་ཉམས་ཆག་ལ་འགྲོ་བའི་ཉེན་ཁ་ཆེན་པོ་ཞིག་གི་མཚམས་སུ་བསླེབས་ཡོད། བོད་ཀྱི་སྐད་ཡིག་ནི་བོད་མི་རིགས་ཀྱི་སྲོག་རྩ་དང་། ཆོས་དང་རིག་གཞུང་གི་རྩ་བ་ཡིན་ཞེས་སྲུང་སྐྱོབ་བྱེད་དགོས་བཤད་བཞིན་ཡོད་པ་དེ། སྐབས་སུ་བབ་པ་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་དང་སྦྱར་ནས་བཤད་ན། ༧གོང་ས་མཆོག་ནས་བོད་ཀྱི་སྐད་ཡིག་ཐོག་ཡོད་པའི་ནང་པའི་ཆོས་ལ་ཉམས་ལེན་མཛད་ཡོད་པར་བརྟེན་ནས། མཛད་པ་འཕྲིན་ལས་རྒྱ་ཆེར་རྒྱས་ཏེ་འཛམ་གླིང་གི་དད་གུས་བྱེད་སའི་དབུ་ཁྲིད་ཅིག་ཏུ་གྱུར་ཡོད། དེ་ནི་བོད་ཀྱི་སྐད་ཡིག་ནང་དུ་ཡོད་པའི་ནང་ཆོས་ཀྱི་ཉམས་ལེན་ལ་བརྟེན་ནས་བྱུང་བ་ཡིན་དུས། གཞུང་གང་ལ་བརྟེན་སའི་སྐད་ཡིག་དེ་རང་བཞིན་གྱི་རྩ་ཆེན་ཞིག་ཆགས་ཡོད་པ་དང་།  དེ་སྲུང་སྐྱོབ་བྱ་དགོས་པ་ཞིག་ཡིན་པ་ཤེས་དགོས་ཀྱི་ཡོད་པ་རེད། བོད་ཀྱི་སྐད་ཡིག་སྲུང་སྐྱོབ་བྱ་རྒྱུ་དེ་བོད་ཀྱི་མི་རིགས་ཀྱི་ཞེན་ཁོག་ཙམ་མིན་པར། ནང་པའི་ཆོས་ཀྱི་རིག་གཞུང་དང་འབྲེལ་ཡོད་པས། འཛམ་གླིང་གི་འགྲོ་བ་ཡོངས་ཀྱི་སེམས་ཀྱི་བདེ་སྐྱིད་ཀྱི་རྩ་བ་ཆགས་ཡོད། བོད་ཀྱི་སྐད་ཡིག་རིན་ཐང་ཤེས་པའི་ཐོག་གཞུང་དང་སྒེར་སུ་ཡིན་རུང་སྲུང་སྐྱོང་བྱ་དགོས། ཞེས་འགྲེལ་བརྗོད་གནང་བྱུང་།

༧སྐྱབས་རྗེ་ཀིརྟི་རིན་པོ་ཆེ་མཆོག་གི་གསུང་རྩོམ་ཕྱོགས་སྒྲིག་པ་སློབ་དཔོན་ཆེན་མོ་རེ་མདོ་སེང་གེ་ལགས་ཀྱིས་བཙན་བྱོལ་བོད་མིའི་སྤྱི་ཚོགས་ཁྲོད་ཤེས་ཡོན་སློབ་སྦྱོང་རྒྱ་ཁྱབ་ཏུ་དར་སྤེལ་མཛད་པའི་ཐོག་བགྲེ་གླེང་གནང་བར་འདི་གའི་གསར་འགོད་པར། བོད་མ་ཤོར་བའི་སྔོན་དུ་བོད་ཀྱི་ཆབ་སྲིད་དང་ཤེས་ཡོན་གྱི་གནས་སྟངས་ཧ་ཅང་སྐྱོ་བོ་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་དུ་ཕེབས་རྗེས་བོད་ཀྱི་གནས་སྟངས་ལྡབ་མང་པོ་ཡར་རྒྱས་བཏང་ཐུབ་ཡོད། དེ་ཡང་ཕྱི་ལོ་ ༡༩༥༩ ལོར་བཙན་བྱོལ་དུ་འབྱོར་བ་ནས་བཟུང་མི་རབས་གསར་བ་རྣམས་བོད་པ་ཚུལ་ལྡན་གྱི་ངོ་བོར་སྐྱེད་སྲིང་ཐུབ་པ་དང་། བོད་ཀྱི་གནས་སྟངས་དེ་རྒྱུ་མཚན་དང་གནས་ལུགས་ཀྱི་ཐོག་ནས་འཐབ་རྩོད་བྱ་ཐུབ་པ། བོད་ཀྱི་ཆོས་དང་རིག་གཞུང་རྒྱུད་འཛིན་བྱ་ཐུབ་པ། མ་འོངས་བར་འཛམ་གླིང་དང་མཉམ་དུ་འགྲོ་ཐུབ་པའི་དཔུང་སྡེ་གསོ་སྐྱོང་ཐུབ་པའི་གལ་གནད་བཅས་ཀྱི་དགོངས་གཞི་རླབས་ཆེན་པོ་རེད། སྔོན་མ་བོད་ནང་གི་དགོན་པ་ཁག་ཏུ་ཞུགས་རྗེས་ནང་ཆོས་སྦྱངས་པ་མ་གཏོགས། སྔོན་འགྲོ་སོགས་ཀྱི་འཛིན་གྲྭ་རིགས་ཡོད་པ་མ་རེད། ཕྱི་ལོ་ ༡༩༦༠ ནང་དུ་༧གོང་ས་མཆོག་ནས་དགོན་སྡེ་ཁག་ཏུ་སོ་སོའི་དགོན་པའི་འགྲོ་ལུགས་ཙམ་མིན་པར་ཐུན་མོང་དང་ཐུན་མོང་མ་ཡིན་པའི་རིག་གཞུང་ཆ་ཚང་ལྡན་པའི་མི་རབས་ཤིག་གསོ་སྐྱོང་བྱེད་ཐུབ་ཚེ། མ་འོངས་བར་དགོན་པའི་བསྟན་པར་འོད་སྣང་འབར་ཡོང་བའི་བཀའ་སློབ་མང་པོ་བསྩལ་བ་བཞིན། ཕྱི་ལོ་ ༡༩༧༠ སྨད་དང་ཕྱི་ལོ་༡༩༨༠ ནང་དུ་ཆོས་བརྒྱུད་རིས་མེད་ཀྱི་ཐོག་དགོན་པའི་ནང་སློབ་གྲྭ་མང་པོ་བཙུགས་པ་རེད། ད་ལྟའི་ཆར་དགོན་པའི་ནང་གི་གྲྭ་བ་མང་ཤོས་སློབ་སྦྱོང་བྱེད་མཁན་ཆགས་ཡོད། ༧གོང་ས་མཆོག་ནས་སྐབས་དང་དུས་ལ་གཟིགས་ཏེ་ཆོས་དང་རིག་གཞུང་དེ་དུས་རབས་དང་འགལ་ཟླར་མི་འགྲོ་བའི་དགོངས་པ་བཞེས་ཀྱི་ཡོད། དེང་སང་ཚན་རིག་གི་དུས་རབས་ཤིག་ཡིན་པས། ང་ཚོའི་རིག་གཞུང་དེ་ཚན་རིག་དང་མཉམ་དུ་གནས་ཚེ། ང་ཚོའི་སྤྱི་ཚོགས་སུ་ཚན་རིག་སློབ་སྦྱོང་སྤེལ་དགོས་པ་དང་། སོ་སོའི་སྐད་ཡིག་གི་བརྒྱུད་ལམ་ཐོག་ནས་སྤེལ་བ་རེད། དེ་ཡང་ཚན་རིག་གི་སློབ་སྦྱོང་གཅིག་པུ་མིན་པར། ང་ཚོའི་སྐད་ཡིག་གིས་མ་འདང་བའི་སྟོང་ཆ་མང་པོ་ཞིག་ལ། ༧གོང་ས་མཆོག་གི་མཛད་པ་འཕྲིན་ལས་ལ་བརྟེན་ནས་ཁ་སྐོང་བྱེད་ཐུབ་ཡོད་པ་རེད། ཅེས་འགྲེལ་བརྗོད་གནང་བྱུང་།

མཁན་ཟུར་ཨ་ལགས་རྗེ་སྤྲུལ་བློ་གྲོས་ཆོས་བཟང་མཆོག་གིས་བོད་བརྒྱུད་ནང་བསྟན་དེ་བླ་མའི་ཆོས་ལུགས་མ་ཡིན་པ་གསལ་སྟོན་གནང་བའི་མཛད་པའི་ཐོག་བགྲོ་གླེང་གནང་བར་འདི་གའི་གསར་འགོད་པར། བོད་ནང་དར་བའི་ནང་པ་སངས་རྒྱས་བའི་ཆོས་ལ་ཕྱི་རྒྱལ་བ་དང་ནང་པའི་གྲས་ནས་ཀྱང་བླ་མའི་ཆོས་ལུགས་ཞེས་མིང་བཏགས་ཏེ་ངོས་འཛིན་བྱས་པ་རེད། ཕྱི་ལོ་ ༡༩༦༠ ལོར་རྒྱ་གར་རྡོ་རྗེ་གདན་དུ་༧གོང་ས་མཆོག་ནས་བོད་དུ་དར་བའི་ནང་པ་སངས་རྒྱས་པའི་ཆོས་དེ་བླ་མའི་ཆོས་ལུགས་མ་ཡིན་པའི་ལམ་སྟོན་བཀའ་སློབ་མང་པོ་གནང་ཡོད་པ་རེད། ཕྱི་ལོ་ ༡༩༦༢ ལོར་༧གོང་ས་མཆོག་གིས་ཕྱག་དཔེ་ངོས་ཀྱི་ཡུལ་དང་ངོས་ཀྱི་མི་མང་ལྗགས་རྩོམ་གནང་ཡོད་ཅིང་། དེའི་ཁ་སྣོན་གྱི་ས་བཅད་གཉིས་ནང་བོད་ཀྱི་ནང་པ་སངས་རྒྱས་པའི་གནས་སྟངས་དང་ཆོས་ལུགས་དར་སྟངས་སྐོར་བཀའ་སློབ་རྒྱས་པ་ཡོད། ཕྱི་ལོ་ ༡༩༦༣ ལོར་ལེགས་བཤད་བློ་གསལ་མིག་འབྱེད་ལྗགས་རྩོམ་གནང་། དེའི་ནང་བོད་བརྒྱུད་ནང་བསྟན་དེ་བླ་མའི་ཆོས་ལུགས་མ་ཡིན་པའི་སྐོར་གསུངས་ཡོད། ༧གོང་ས་མཆོག་ནས་ཕྱག་དཔེ་དེ་གཉིས་ཀྱི་ནང་དུ་རྒྱུ་མཚན་གསུམ་དང་དཔེ་གཅིག་གི་སྒོ་ནས་བོད་བརྒྱུད་ནང་བསྟན་དེ་བླ་མའི་ཆོས་ལུགས་མ་ཡིན་པ་གསལ་སྟོན་གནང་ཡོད། ཕྱི་ལོ་ ༡༩༦༧ དང་༡༩༧༢ ལོར་༧གོང་ས་མཆོག་ཐའེ་ལན་ཌི་ལ་ཐེངས་གཉིས་ཕེབས་ཏེ་གནས་བརྟན་སྡེ་བའི་དགེ་སློང་དང་མཉམ་དུ་བགྲོ་གླེང་གནང་ཡོད་པ་རེད། དེ་བཞིན་བོད་ཀྱི་ཆོས་བརྒྱུད་ཁག་གི་ཁུངས་པཎ་གྲུབ་བཅུ་བདུན་ཡིན་པ་གསལ་སྟོན་བྱས་ཡོད། དེ་བཞིན་ཕྱི་ལོ་ ༢༠༡༤ ལོར་རྒྱལ་སྤྱིའི་འདུལ་བའི་བགྲོ་གླེང་ཐོག་༧གོང་ས་མཆོག་ནས་བཀའ་སློབ་ལམ་སྟོན་གནང་ཡོད། ༧གོང་ས་མཆོག་ནས་བོད་བརྒྱུད་ནང་བསྟན་དེ་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་ཡིན་གསུངས་བཞིན་པའི་གནད་འགག་དེ་ལ་ཐུག་ཡོད། ཅེས་འགྲེལ་བརྗོད་གནང་བྱུང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།