འདས་ལོར་རྒྱ་ནག་གི་སློབ་གྲྭ་ཁག་ཏུ་སློབ་སྦྱོང་བྱེད་མཁན་གྱི་བོད་པའི་སློབ་མ་ཁྲི་གཅིག་ལྷག་བྱུང་བ་དང་དེ་ནི་ད་སྔ་བར་གྱི་གྲངས་འབོར་མང་ཤོས་ཤིག་ཡིན་སྐོར་རྗོད་ཀྱིན་འདུག་ལ། རྒྱ་ནག་ཏུ་སློབ་སྦྱོང་བྱེད་པར་འགྲོ་བ་ནི་རྒྱ་བསྒྱུར་གྱི་ལམ་ཁར་ཞུགས་ཀྱི་ཡོད་པ་ཉམས་ཞིབ་པས་བརྗོད་བྱུང་།
ཉེ་ལམ་གཞིས་ཀ་རྩེ་གྲོང་ཁྱེར་སྲིད་གཞུང་གིས་བསྒྲགས་པའི་གནས་ཚུལ་ལྟར་ན། འདས་ལོ་སྟེ། ཕྱི་ལོ་ ༢༠༢༥ ལོར་བོད་ས་ཡོངས་ནས་རྒྱ་ནག་གི་ཞིང་ཆེན་རིམ་པའི་གྲོང་ཁྱེར་འདྲ་མིན་གྱི་སློབ་གྲྭ་ཁག་ཏུ་བཙུགས་ཡོད་པའི་བོད་ལྗོངས་འཛིན་གྲྭ་ཞེས་པར་ཐོ་འགོད་བྱེད་མཁན་གྱི་བོད་པའི་སློབ་མ་ཁྱོན་ ༡༠༥༠༠ ཙམ་བྱུང་ཡོད་ཅིང་། དེ་ནི་ད་སྔ་བར་བོད་ལྗོངས་འཛིན་གྲྭ་ཞེས་པར་ཐོ་འགོད་མཁན་མང་ཤོས་ཀྱི་ཟིན་ཐོ་གསར་པ་ཞིག་ཆགས་ཡོད་སྐོར་བསྒྲགས་འདུག
བོད་རང་སྐྱོང་ལྗོངས་སློབ་གསོ་ལྷན་ཁང་ནས་ཕྱི་ལོ་ ༢༠༢༥ ལོར་བོད་ལྗོངས་འཛིན་གྲྭར་འཛུལ་ཞུགས་ཐོ་འགོད་བྱས་པའི་གྲངས་ཐོའི་ནང་། བོད་ལྗོངས་འཛིན་གྲྭའི་དམའ་འབྲིང་འཛིན་གྲྭར་སློབ་མ་ ༢༠༠༠ དང་འཛིན་གྲྭ་ ༡༥༠ ཁ་སྣོན། མཐོ་འབྲིང་འཛིན་གྲྭར་སློབ་མ་ ༤༥༠༠ བསྡུ་ལེན་དང་འཛིན་གྲྭ་ ༢༠༥ མང་དུ་བཏང་། ཡང་འབྲིང་རིམ་ལས་རིགས་ལག་རྩལ་སློབ་གྲྭར་ཁྱོན་སློབ་མ་ ༤༠༠༠ དང་འཛིན་གྲྭ་ ༢༢༣ ཇེ་མང་དུ་བཏང་ཞིང་། དེའི་ཁོངས་སུ་བོད་རང་སྐྱོང་ལྗོངས་ནས་སློབ་མ་ ༣༢༡༥ དང་མཚོ་སྔོན་ནས་སློབ་མ་ ༧༨༥ ཚུད་ཡོད་སྐོར་སོགས་བརྗོད་འདུག་ལ། འདས་ལོར་རྒྱ་ནག་ཏུ་སློབ་སྦྱོང་བྱེད་མཁན་བོད་པའི་སློབ་མ་ཁྱོན་ ༡༠༥༠༠ དང་འཛིན་གྲྭ་ ༥༧༨ འཆར་འགོད་བྱས་ཡོད་འདུག
འདི་གའི་གསར་འགོད་པས་ཁ་པར་བརྒྱུད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་བ་ཟླ་བ་ཚེ་རིང་ལགས་སུ་གནད་དོན་སྐོར་ནས་བཀའ་འདྲི་ཞུས་པར་ཁོང་གིས། རྒྱ་ནག་གཞུང་གིས་བོད་མི་རྣམས་ཆོས་ལུགས་ལ་མགོ་འཁོར་བསྡད་པ་ཡིན་ན་བོད་པ་རྗེས་ལུས་ཡིན་རབས་སོགས་བཤད་ནས་ལོ་བཅུ་གྲངས་ནས་ཉི་ཤུ་ཡས་མས་ཀྱི་བོད་པའི་སློབ་མ་རྣམས་རྒྱ་ནག་ཏུ་འཁྲིད་ཀྱི་ཡོད། རྒྱ་ནག་ཏུ་འཁྲིད་རྗེས་ཁོང་ཚོའི་བོད་མི་རིགས་ཀྱི་ཞེན་ཁོག་བརླག་གི་མེད་ཀྱང་། རྒྱ་ནག་གི་སློབ་གསོའི་ཁོར་ཡུག་ཏུ་རྒྱའི་རིག་གཞུང་དང་ལྟ་གྲུབ་གཞིར་བཞག་གིས་སློབ་གསོ་སྤྲད་དེ། ཕྱིར་ཕ་ཡུལ་དུ་ལོག་པར་བཀག་འགོག་ཡུན་རིང་བྱེད་ཀྱི་ཡོད་ལ། རྒྱ་ནག་གིས་དེང་རབས་ལ་ཁ་ཕྱོགས་ནས་ཡར་རྒྱས་འགྲོ་དགོས་པ་དང་ལྷག་པར་དུ་ཚན་རིག་དང་དངོས་པོའི་ཡར་རྒྱས་འགྲོ་དགོས་པ་སོགས་བཤད་ནས་རྒྱའི་སློབ་གསོ་སྤྲོད་པའི་དམིགས་ཡུལ་བཟུང་ཡོད། གཉིས་རྒྱ་ནག་ཏུ་སློབ་སྦྱོང་བྱེད་མཁན་གྱི་བོད་པའི་སློབ་མ་ཚོ་སློབ་མཐར་ཕྱིན་རྗེས། རྒྱ་ནག་གཞུང་གིས་ཕྱིར་བོད་པའི་སྤྱི་ཚོགས་ནང་དུ་མངགས་ཏེ་ལས་ཀ་དང་གོ་གནས་སྤྲོད་ཀྱི་ཡོད་ལ། ཁོང་ཚོ་བོད་མི་ཡིན་པ་དང་སློབ་སྦྱོང་ཡོད་པ། ད་དུང་མི་རིགས་ཀྱི་ཞེན་ཁོག་ཡོད་སྟབས། གཅིག་ནས་བོད་མི་ཚོས་ཁོང་ཚོར་ཡིད་ཆེས་བྱེད་པ་དང་བོད་པའི་སྤྱི་ཚོགས་ནང་གི་མིག་དཔེ་ལྟ་ས་ཆགས་ཀྱི་རེད་བསམ་གྱི་ཡོད། ཕྱོགས་གཞན་ནས་ཁོང་ཚོའི་ལས་ཀ་བྱེད་སྟངས་ཚང་མ་རྒྱའི་རིག་གཞུང་དང་འབྲེལ་བསྡད་ཡོད་པས། བོད་མི་རྣམས་རྒྱ་བསྒྱུར་བྱེད་པའི་དམིགས་ཡུལ་བཟུང་ཡོད་ཅེས་གསུངས་སོང་ལ། འདི་གའི་གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། རྒྱ་ནག་གཞུང་གིས་བོད་པའི་སློབ་མ་རྩེ་ཕུད་ཀྱི་རིགས་རྒྱ་ནག་ཏུ་འཁྲིད་ནས་རིན་མེད་ཐོག་རྒྱ་བསྒྱུར་སློབ་གསོ་སྤྲོད་ཀྱི་ཡོད་པ་མ་ཟད། སྡོད་ཁང་དང་ཟ་མ་སོགས་ཀྱི་མཐུན་རྐྱེན་ཡག་པོ་བསྐྲུན་པའི་ཐོག གུང་སེང་སྐབས་རྒྱ་ནག་གི་གྲོང་ཁྱེར་ཆེ་ཁག་ཏུ་འཁྲིད་པ་སོགས་བྱས་ཏེ་བོད་ཀྱི་སྐད་ཡིག་དང་རིག་གཞུང་དང་ཁ་ཐག་རིང་དུ་གཏོང་གི་ཡོད་འདུག
རྒྱ་ནག་གཞུང་གིས་ཕྱི་ལོ་ ༢༠༢༣ ལོ་ནས་བོད་ལྗོངས་འཛིན་གྲྭའི་སློབ་བསྡུ་ལས་གཞི་རྒྱ་ཆེ་རུ་བཏང་སྟེ། ཕྱི་ལོ་ ༢༠༢༥ བར་ལོ་གསུམ་བསྟུད་མར་ལོ་རེའི་སློབ་མ་འཕར་ཚད་བརྒྱ་ཆའི་ ༩།༩ ཟིན་ཡོད་པ་དང་། དེའི་ནང་གི་སློབ་མ་བརྒྱ་ཆའི་ ༧༠ ལྷག་བོད་ཀྱི་ཞིང་འབྲོག་དང་མཐའ་མཚམས་ཁུལ་གྱི་བོད་ཕྲུག་ཡིན་འདུག ཕྱི་ལོ་ ༡༩༨༤ ལོར་རྒྱ་ནག་གཞུང་གིས་བོད་ཁུལ་གྱི་སློབ་གསོའི་བྱ་བ་རྗེས་ལུས་དང་ཤེས་ལྡན་མི་སྣ་ཉུང་ཉུང་ཡིན་པ་སོགས་རྒྱུ་མཚན་དུ་བྱས་ནས། བོད་ཀྱི་ཤེས་ཡོན་གོང་འཕེལ་ལ་ཁ་གཡར་ནས་བོད་ལྗོངས་འཛིན་གྲྭ་ཟེར་བ་གཉེར་རྒྱུའི་ཐག་གཅོད་བྱས་པ་ལྟར། སྐབས་དེར་ཞིང་ཆེན་དང་གྲོང་ཁྱེར་ ༡༦ ནང་འཛིན་གྲྭ་གཉེར་བའི་ལས་དོན་མགོ་བཙུགས་པ་དང་། འདས་པའི་ལོ་ངོ་ ༤༠ རིང་བོད་ལྗོངས་འཛིན་གྲྭའི་སློབ་སྦྱོང་གི་གཞི་རྒྱ་རྒྱུན་མཐུད་ངང་ཆེ་རུ་ཕྱིན་ཏེ། ད་ལྟ་རྒྱ་ནག་རྒྱལ་ཡོངས་ཀྱི་ཞིང་ཆེན་ ༢༣ དང་གྲོང་ཁྱེར་ ༦༠ ནང་གི་སློབ་གྲྭ་ ༡༢༩ ལ་ཁྱབ་ཡོད་ཅིང་། ད་ལྟ་སློབ་སྦྱོང་བྱེད་བཞིན་པའི་སློབ་མ་ཁྲི་ ༢།༥ དང་ད་བར་སློབ་མ་ཁྱོན་ཁྲི་ ༡༨ ཙམ་གསོ་སྐྱོང་ཐུབ་ཡོད་པ་མ་ཟད། སློབ་མ་དེ་དག་ནི་བོད་ཀྱི་ལས་རིགས་ཁག་གི་སྲོག་ཤིང་དུ་གྱུར་ཡོད་པ་དང་། དཔལ་འབྱོར་དང་སྤྱི་ཚོགས་གོང་འཕེལ་ལ་མཁོ་བའི་མི་སྣ་གལ་ཆེན་མཁོ་འདོན་བྱས་ཡོད་སྐོར་སོགས་རྒྱ་ནག་གཞུང་གིས་བརྗོད་འདུག
ཕྱི་ལོ་ ༡༩༩༦ ལོར་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་རྒྱ་ནག་པེ་ཅིན་དང་ཐེན་ཅིན། ཧྲང་ཧེ། ཧུའུ་པེ། ལོའུ་ལིན། ཅང་སུའུ། ཀྲི་ཅང་། ཧྥུ་ཅན། ཧྲན་ཏུང་། ཧའེ་ནན། ཧུའུ་ནན། ཧུའུ་པའེ། ཀང་ཏུང་། སི་ཁྲོན། ཧྲན་ཞི། ཁྲུང་ཆིན་སོགས་ཞིང་ཆེན་དང་གྲོང་ཁྱེར་ ༡༦ ཏུ། ནང་ལོགས་ཀྱི་བོད་ལྗོངས་འཛིན་གྲྭའམ་སློབ་གྲྭ་དང་འབྲེལ་བའི་ཡིག་ཆ་<<关于内地西藏班（校）扩大规模有关问题的请示》ཞེས་པ་གཏན་འབེབས་བྱས་ཡོད་པ་དང་། ཡིག་ཆ་དེའི་སྔོན་གླེང་ནང་དུ། ལས་དོན་འདི་ནི་ཆབ་སྲིད་ཀྱི་ལས་འགན་ཞིག་ཡིན་ལ། ཚད་མཐོའི་དོན་གཉེར་དང་སྒྲིག་འཛུགས་དོ་ནན། རྒྱབ་སྐྱོར་ཤུགས་ཆེན་བྱས་ཏེ་ལས་དོན་ལེགས་འགྲུབ་དགོས་ཞེས་བཀོད་འདུག
གསར་འགོད་པ། སྐལ་བཟང་སྦྱིན་པ།
