བོད་ནང་གི་བཅའ་སྡོད་སློབ་གྲྭའི་ལམ་ལུགས་མཚམས་འཇོག་དགོས་པའི་འབོད་སྐུལ་ཞུ་ཡིག་ཕུལ།

དབྱིན་ཇིའི་སྲིད་བློན་སི་ཊེར་མར་ལགས་སུ་བོད་ནང་གི་བཅའ་སྡོད་སློབ་གྲྭའི་ལམ་ལུགས་མཚམས་འཇོག་ཡོང་བར་རྒྱ་ནག་གཞུང་ལ་འབོད་སྐུལ་ཞུ་དགོས་པའི་ཞུ་ཡིག་ཕུལ་འདུག

British Prime Minister Keir Starmer with Chinese President Xi Jinping. Image source – X/@EuroPostAgency

དེ་རིང་དབྱིན་ཇིའི་སྲིད་བློན་སི་ཊེར་མར་ (Keir Starmer)ལགས་རྒྱ་ནག་ཏུ་བསྐྱོད་དེ། ཞི་ཅིན་ཕིན་དང་དངོས་སུ་ཐུག་འཕྲད་བྱེད་བཞིན་ཡོད་པ་དང་འབྲེལ་ནས། བོད་དོན་ལས་འགུལ་བསྟི་གནས་ཁང་གིས། དབྱིན་ཇིའི་སྲིད་བློན་སི་ཊེར་མར་ལགས་ནས་བོད་ནང་གི་བཅའ་སྡོད་སློབ་གྲྭའི་ལམ་ལུགས་གཙོས་བོད་ཡུལ་རྒྱ་བསྒྱུར་བྱེད་བཞིན་པའི་སྲིད་ཇུས་སོགས་མཚམས་འཇོག་ཡོང་བར་འབོད་སྐུལ་ཞུ་དགོས་པའི་ཞུ་ཡིག་ཕུལ་འདུག

དེ་འབྲེལ་བོད་དོན་ལས་འགུལ་བསྟི་གནས་ཁང་གི་འགན་འཛིན་ལྷ་སྒྲོན་བཀྲས་མཐོང་ལགས་ཀྱིས། ཁྱེད་ཀྱིས་རྒྱ་ནག་ཏུ་གཞུང་འབྲེལ་འཚམས་གཟིགས་ཐོག་མ་མ་གནང་གོང་། ཁྱེད་ཀྱིས་དབྱིན་ཇིའི་བཟང་སྤྱོད་དང་ཕྱི་འབྲེལ་གྱི་རྩ་དོན་བརྟན་པོ་བཟུང་ནས་དབྱིན་ཇི་དང་རྒྱ་ནག་གི་སྐབས་དོན་གྱི་འབྲེལ་ལམ་གལ་ཆེན་ཞིག་ལ་གདོང་ལེན་བྱེད་པར་རེ་སྐུལ་ཞུ་བཞིན་ཡོད། ལྷག་པར་དུ་ངས་གུས་བཀུར་ཆེན་པོས། ཁྱེད་ཀྱིས་སྲིད་འཛིན་ཞི་ཅིན་ཕིན་་དང་མཇལ་འཕྲད་སྐབས་རྒྱ་ནག་གཞུང་གིས་ལག་བསྟར་བྱེད་བཞིན་པའི་བོད་ནང་གི་བཅའ་སྡོད་སློབ་གྲྭའི་ལམ་ལུགས་དེ་གླེང་སློང་ཡོང་བའི་རེ་བ་ཞུ་བཞིན་ཡོད། ཅེས་བརྗོད་འདུག

བོད་དོན་ལས་འགུལ་བསྟི་གནས་ཁང་གི་རེ་སྐུལ་ཞུ་ཡིག་ལྟར་ན། ད་ལྟ་བོད་པའི་བྱིས་པ་ས་ཡ་གཅིག་ཙམ་རྒྱ་ནག་གིས་བཙུགས་པའི་བཅའ་སྡོད་སློབ་གྲྭར་བཅུག་ཡོད་པ་དང་། སློབ་གྲྭ་དེ་དག་གི་ནང་ཁོང་ཚོར་རང་གི་སྐད་ཡིག་དང་། རིག་གཞུང་། ཆོས་ལུགས་བཅས་སྦྱོང་སའི་ཁོར་ཡུག་མེད་ཅིང་། སློབ་གྲྭ་དེ་དག་གི་དམིགས་ཡུལ་ནི་བོད་པའི་བྱིས་པ་ཚོ་བོད་པའི་ངོ་བོ་དང་ཁ་བྲལ་དུ་གཏོང་རྒྱུ་དེ་ཡིན་པ་མ་ཟད། རྒྱ་ནག་དམར་ཤོག་ཚོགས་པས་བོད་དེ་རྒྱ་བསྒྱུར་བྱེད་པའི་གཡོ་ཇུས་ཤིག་ཡིན་པ་རེད།

ཞུ་ཡིག་དེའི་ནང་དུ། དབྱིན་ཇིའི་གཞུང་གིས་བོད་མི་ཚོར་རྒྱབ་སྐྱོར་བྱས་པ་དེས་དབྱིན་ཇིའི་ཁེ་ཕན་ལ་ཐད་ཀར་ཕན་པ་མ་ཟད། རྒྱ་ནག་གཞུང་ལ་དབྱིན་ཇིའི་གལ་གནད་ཆེ་བའི་འགྲོ་བ་མིའི་ཐོབ་ཐང་སོགས་ཀྱི་ལངས་ཕྱོགས་བརྟན་པོ་ཡིན་པའི་བརྡ་ལན་གཏོང་གི་ཡོད། གཞུང་འཛིན་ཚོགས་པས་ལོན་ཌོན་དུ་རྒྱ་ནག་གཞུང་ཚབ་ཁང་ལ་ཆོག་མཆན་སྤྲད་པ་དང་མངོན་འདོད་གསལ་པོ་ཤེས་ཐུབ་པ་ལྟར། དབྱིན་ཇིའི་གཞུང་གིས་རྒྱ་ནག་དང་མཉམ་དུ་དགེ་མཚན་ལྡན་པའི་འབྲེལ་བ་བྱེད་རྒྱུའི་འདུན་པ་ཡོད་ཚེ། དབྱིན་ཇི་རྒྱལ་ཁབ་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་མཉམ་དུ་མིག་རྒྱང་རིང་པོའི་འབྲེལ་བ་ཞིག་འཛུགས་དགོས་ན། དེ་ནི་རྒྱལ་ཁབ་ཀྱི་སྟོབས་ཤུགས་དང་རིན་ཐང་ལ་གཞི་བཅོལ་དགོས། ཁྱེད་ཀྱིས་ཡང་ནས་ཡང་དུ་དབྱིན་ཇི་རྒྱལ་ཁབ་ཀྱིས་རྒྱ་ནག་ལ་ཐེ་ཚོམ་མེད་པའི་ཐོག་ནས་གདོང་ལེན་བྱ་རྒྱུ་ཡིན་ཞེས་བརྗོད་ཡོད། དེར་བརྟེན། དབྱིན་ཇིས་རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཐད་སྐད་ཆ་མི་ཤོད་པ་ནི་མི་འོས་པ་ཞིག་རེད། རྒྱ་ནག་གཞུང་གིས་བོད་ནང་ཆབ་སྲིད་ཀྱི་དབང་སྒྱུར་བརྟན་པོ་བྱས་ཏེ། ཨེ་ཤ་ཡའི་ས་ཁམས་ཆབ་སྲིད་ཀྱི་ཡུན་རིང་གི་ཁེ་ཕན་ལ་དམིགས་བཞིན་ཡོད་ལ། རྒྱ་ནག་གིས་བོད་ནང་མི་སེར་སྤེལ་བའི་ལས་འགུལ་འདིའི་ནང་དུ་བོད་ཀྱི་བྱིས་པ་མི་རབས་གཅིག་ལ་བཅའ་སྡོད་སློབ་གྲྭ་བརྒྱུད་ནས་ལམ་ལུགས་ལྡན་པའི་བསམ་བློའི་བཅོས་སྒྱུར་བྱེད་བཞིན་པ་དང་། ༸གོང་ས་ཏ་ལའི་བླ་མའི་ཡང་སྲིད་ཀྱི་བརྒྱུད་རིམ་ལ་ཐེ་ཇུས་བྱེད་བཞིན་པ། བོད་ཀྱི་ལྷོ་ཕྱོགས་ས་མཚམས་ཁག་ཏུ་དམག་དོན་གྱི་སྒྲིག་འཛུགས་རྒྱ་སྐྱེད་བཞིན་པ་སོགས་ཚུད་ཡོད། ཅེས་གསལ་འདུག

ཞུ་ཡིག་གི་མཇུག་ཏུ། རྒྱ་ནག་གཞུང་གིས་བོད་དེ་ཨེ་ཤ་ཡའི་ས་ཁམས་ཆབ་སྲིད་ཀྱི་ལག་ཆར་བཀོལ་སྤྱོད་བྱས་ཏེ། ཁྱིམ་མཚེས་རྒྱལ་ཁབ་ཁག་ལའང་གནོད་ཤུགས་སྤྲོད་བཞིན་ཡོད་པ་དང་། ལྷག་པར་རྒྱ་ནག་གིས་འཛམ་གླིང་ནང་ཤིན་ཏུ་དཀོན་པའི་བོད་ཀྱི་རང་བྱུང་གཏེར་རིགས་བཀོལ་སྤྱོད་བྱས་ཏེ། ཨེ་ཤ་ཡ་དང་འཛམ་གླིང་ནང་ཆབ་སྲིད་དང་ཚོང་། དམག་མཚོན་སོགས་ཀྱི་དབང་ཤུགས་སྐྱེད་ཐབས་བྱེད་བཞིན་ཡོད་སྟབས། དེས་དབྱིན་ཇིའི་གཞུང་ལའང་གནོད་ཤུགས་ཐེབས་ཀྱི་ཡོད་པར་ངོས་འཛིན་བྱེད་གལ་ཆེ་བ་དང་། དམིགས་བསལ་གྱིས་ད་རེས་དབྱིན་ཇིའི་སྲིད་བློན་སི་ཊེར་མར་ལགས་ནས་དབྱིན་ཇིའི་དམངས་གཙོའི་མངོན་འདོད་དང་སྙིང་བོར་གྱུར་བའི་འགྲོ་བ་མིའི་ཐོབ་ཐང་སོགས་གླེང་སློང་བྱེད་པའི་འགན་འཁྲི་ཡོད་སྟབས། རྒྱ་ནག་གཞུང་ལ་བོད་ཀྱི་བྱིས་པ་ས་ཡ་གཅིག་ཙམ་ཕ་མ་དང་ཁ་བྲལ་ཏུ་བཏང་བའི་ཚབས་ཆེའི་གནད་དོན་གླེང་སློང་བྱེད་པའི་འབོད་སྐུལ་ཞུས་འདུག

དབྱིན་ཇིའི་སྲིད་བློན་སི་ཊེར་མར་ལགས། དེ་རིང་ཕྱི་ཚེས་ ༢༨ ནས་ ༣༠ བར་ཉིན་གསུམ་རིང་རྒྱ་ནག་ཏུ་རྒྱལ་འབྲེལ་སྐོར་སྐྱོད་ཆེད་འབྱོར་ཡོད་ཅིང་། ཐེངས་འདིའི་དབྱིན་རྒྱ་གཉིས་ཀྱི་མགོ་ཁྲིད་ཐུག་འཕྲད་ཁྲོད་གཙོ་བོ་ཚོང་འབྲེལ་གླེང་སློང་བྱ་རྒྱུ་ཡིན་པ་དང་། དམིགས་བསལ་ཉེ་ལམ་དབྱིན་ཇིའི་གཞུང་གིས་རྒྱ་ནག་ལ་དབྱིན་ཡུལ་ནང་རྒྱ་ནག་གཞུང་ཚབ་ཁང་གསར་རྒྱག་གི་ལས་གཞིར་ཆོག་མཆན་སྤྲད་ཡོད་སྟབས། ད་རེས་རྒྱལ་ཁབ་གཉིས་བར་ཚོང་འབྲེལ་གྱི་ཐད་ནས་འབྲེལ་ལམ་ཡག་པོ་འབྱུང་སྲིད་ནའང་། སྲིད་བློན་སི་ཊེར་མར་ལགས་ཀྱིས། ངས་འགྲོ་བ་མིའི་ཐོབ་ཐང་གི་གནད་དོན་དུས་རྒྱུན་དུ་གླེང་གི་ཡོད་ལ། ད་ལན་ཡང་དགོས་ངེས་ཅན་གྱི་རིགས་གླེང་གི་ཡིན། ཞེས་གསར་འགོད་པར་བརྗོད་འདུག

གསར་འགོད་པ། སྐལ་བཟང་སྦྱིན་པ།