དེ་རིང་བོད་ཀྱི་གསོ་བ་རིག་པའི་ལྷན་ཚོགས་ཀྱི་རྒྱུན་ལས་སྐབས་བརྒྱད་པ་གསལ་བསྒྲགས་དང་འབྲེལ་འདི་ལོའི་གཡུ་ཐོག་གཟེངས་རྟགས་དེ་སྨན་པ་རྡོ་རྗེ་དགྲ་འདུལ་ལགས་སུ་ཕུལ་སོང་།
དེ་རིང་སྔ་དྲོའི་ཆུ་ཚོད་ ༡༠ སྟེང་འགྲོ་ཕན་བོད་ཀྱི་སྨན་རྩིས་ཁང་གི་ཚོགས་ཁང་དུ་བོད་ཀྱི་གསོ་བ་རིག་པའི་ལྷན་ཚོགས་སྐབས་བདུན་པ་དང་བརྒྱད་པའི་རྩིས་སྤྲོད་རྩིས་ལེན་དང་གཡུ་ཐོག་གཟེངས་རྟགས་སྤྲོད་པའི་མཛད་སྒོ་བཅས་དུས་གཅིག་ཏུ་འཚོགས་སོང་བ་དང་། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་བྱམས་པ་ཕུན་ཚོགས་ལགས་དང་སྨན་རྩིས་ཁང་གི་འགན་འཛིན་བསྟན་འཛིན་བཟང་པོ་ལགས། སྐུའི་བླ་སྨན་པ་ཚེ་དབང་རྟ་མགྲིན་ལགས། སྐབས་བདུན་པའི་གསོ་རིག་ལྷན་ཚོགས་ཀྱི་འགན་འཛིན་སྨན་པ་རྡོ་རྗེ་དགྲ་འདུལ་ལགས། དེ་བཞིན། སྨན་རྩིས་ཁང་གི་སྨན་པ་རྣམས་དང་ལས་བྱེད། སློབ་ཕྲུག གསར་འགོད་པ་བཅས་འཛོམས་འདུག
མཛད་སྒོའི་སྟེང་སྐབས་བདུན་པའི་གསོ་རིག་ལྷན་ཚོགས་ཀྱི་ཚོགས་གཙོ་རྡོ་རྗེ་དགྲ་འདུལ་ལགས་ཀྱིས་ལོ་གསུམ་རིང་གི་ལས་བསྡོམས་སྙིང་བསྡུས་ཤིག་སྙན་སྒྲོན་ཞུས་གྲུབ་མཚམས། འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས་ཀྱིས། བོད་ཀྱི་གསོ་བ་རིག་པའི་ལྷན་ཚོགས་འདི་བོད་མི་མང་སྤྱི་འཐུས་ལྷན་ཚོགས་ཀྱིས་དགོས་དབང་ཆེན་པོར་གཟིགས་ཏེ་གཏན་འབེབས་ཀྱིས་བཙུགས་པ་ཞིག་རེད། འདི་ལ་བོད་མི་སྤྱི་བོ་གནམ་བསྟན་ཡོངས་ཀྱིས་རྒྱབ་སྐྱོར་བྱ་རྒྱུ་ནི་རང་བཞིན་འགན་འཁྲི་ཆགས་ཡོད། ཅེས་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་བོད་ཀྱི་གསོ་བ་རིག་པའི་ལྷན་ཚོགས་བཙུགས་པ་ནས་བཟུང་བོད་མིའི་འཕྲོད་བསྟེན་དང་འབྲེལ་ནས་གསོ་རིག་གི་ལས་དོན་ཚང་མར་རྒྱབ་སྐྱོར་ཞུས་ཡོད་པ་དང་། མ་འོངས་པར་ཡང་བོད་ཀྱི་གསོ་བ་རིག་པའི་ལས་དོན་ཐོག་འཕྲོད་བསྟེན་ལས་ཁུངས་ཀྱི་ངོས་ནས་རྒྱབ་སྐྱོར་ལྷོད་མེད་གནང་རྒྱུ་ཡིན་སྐོར་སོགས་གསུངས་སོང་།
མཛད་སྒོའི་སྟེང་བོད་ཀྱི་གསོ་བ་རིག་པའི་ལྷན་ཚོགས་ཀྱི་སྐབས་བརྒྱད་པའི་ཚོགས་མི་ ༡༧ འོས་འདེམས་བྱུང་བ་ཡོངས་བསྒྲགས་དང་སྐབས་བདུན་པའི་རྒྱུན་ལས་རྣམས་ལ་ཆེ་བསྟོད་ཕྱག་འཁྱེར་དང་། སྨན་པ་རྡོ་རྗེ་དགྲ་འདུལ་ལགས་སུ་ཕྱི་ལོ་ ༢༠༢༦ ལོའི་གཡུ་ཐོག་གཟེངས་རྟགས་ཕུལ་སོང་། གཡུ་ཐོག་གཟེངས་རྟགས་དེ་ཕྱི་ལོ་ ༢༠༠༩ ལོར་བཙན་བྱོལ་བོད་མིའི་བོད་ཀྱི་གསོ་བ་རིག་པའི་ལྷན་ཚོགས་ནས་བོད་ཀྱི་གསོ་བ་རིག་པའི་གཟེངས་ཐོན་མི་སྣར་འབུལ་མགོ་བཙུགས་པ་ཞིག་ཡིན་པ་དང་། གཟེངས་རྟགས་དེ་ནི་བོད་ཀྱི་གསོ་བ་རིག་པའི་ལས་དོན་ཐོག་དམིགས་བསལ་ཧུར་བརྩོན་དང་བྱས་རྗེས་ཅན་གྱི་མི་སྣ་རྣམས་ངོས་འཛིན་དང་། བོད་ཀྱི་གསོ་བ་རིག་པའི་རྒྱུད་འཛིན་སྨན་པ་གཞན་རྣམས་ལ་མིག་དཔེ་དང་སེམས་ཤུགས་བསྐྱེད་ཐབས་སོགས་ཀྱི་ཆེད་དུ་དམིགས་པ་ཞིག་ཡིན་འདུག་ལ། ལོ་གསུམ་རེའི་མཚམས་སུ་འབུལ་སྲོལ་ཡོད་པ་རེད་འདུག
ཕྱི་ལོ་ ༢༠༡༠ ཟླ་ ༣ ཚེས་ ༡༥ ཉིན་ྋགོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་གཡུ་ཐོག་གཟེངས་རྟགས་ཕུལ་ཡོད། ཕྱི་ལོ་ ༢༠༡༠ ལོར་བླ་སྨན་བསྟན་འཛིན་ཆོས་གྲགས་ལགས་སུ་ཐེངས་དང་པོའི་གཡུ་ཐོག་གཟེངས་རྟགས་ཕུལ་བ་དང་། ཕྱི་ལོ་ ༢༠༡༢ ལོར་བླ་སྨན་ཡེ་ཤེས་དོན་ལྡན་མཆོག ཕྱི་ལོ་ ༢༠༡༦ ལོར་ཁྲོ་རུ་ཚེ་རྣམ་རིན་པོ་ཆེ་མཆོག ཕྱི་ལོ་ ༢༠༡༩ ལོར་བླ་སྨན་ཚེ་དབང་རྟ་མགྲིན་མཆོག ཕྱི་ལོ་ ༢༠༢༢ ལོར་བླ་སྨན་སྤེན་པ་ཚེ་རིང་མཆོག་དང་འདི་ལོའི་གཟེངས་རྟགས་དེ་ནི་སྐབས་དྲུག་པ་ཆགས་ཀྱི་འདུག
ཕྱི་ལོ་ ༢༠༢༦ ལོའི་གཡུ་ཐོག་གཟེངས་རྟགས་ཐོབ་པའི་སྨན་པ་རྡོ་རྗེ་དགྲ་འདུལ་ལགས་ནི་རྒྱ་གར་བྱང་ཐང་ལ་དྭགས་སུ་ཕྱི་ལོ་ ༡༩༦༥ ཟླ་ ༧ ཚེས་ ༡ ཉིན་འཁྲུངས་ཤིང༌། ཆུང་དུས་བོད་ཕྲུག་ཁྱིམ་སྡེར་གཞི་རིམ་སློབ་སྦྱོང་གནང་། ཕྱི་ལོ་ ༡༩༨༨ ལོར་དྷ་རམ་ས་ལའི་བོད་ཀྱི་སྨན་ རྩིས་ཁང་གི་སློབ་ཐོན་སྐབས་དྲུག་པའི་ཁོངས་ནས་སྨན་པ་དཀའ་བཅུ་བ་ཐོན། ཕྱི་ལོ་ ༡༩༩༦ ལོ་ནས་ཝཱ་རཱ་ཎ་སཱི་དབུས་བོད་ཀྱི་གཙུག་ལག་སློབ་གཉེར་ཁང་གི་གསོ་བ་རིག་པའི་སྡེ་ཚན་དུ་སློབ་དགེའི་ལས་འཁུར་ཞུས་དང་ཞུ་མུས་ཡིན་ཞིང་། ཁོང་གིས་འདས་པའི་མི་ལོ་ཧྲིལ་པོ་སུམ་ཅུ་ལྷག་ཙམ་རིང་ཤེས་ཡོན་སྡེ་ཁག་འདྲ་མིན་ནང་དགེ་རྒན་དང་། ལས་ཞོར་དུ་གསོ་བ་རིག་པའི་རྒྱུད་བཞིའི་འགྲེལ་པ་དེབ་ཕྲེང་བཅུ་གཉིས་ཙམ་རྩོམ་སྒྲིག་དང་དཔར་སྐྲུན་ཞུས་ཟིན་འདུག
