སྲིད་དོན་ཁ་ལ་འཁྱེར་བའི་མི་བུ་འགས་འཕྲལ་ཕུགས་རྒྱང་གསུམ་གྱི་གནད་ལ་ཞིབ་འཇུག་ དང་རྒྱུས་ལོན་མེད་པར། རང་ཉིད་ཀྱི་འདོད་པ་དང་དགོས་འདུན་གཞི་རྩར་ཉར་པའི་ཐོག་ནས་བཤད་རྐྱང་གི་སྤྱོད་ ཚུལ་འདིས་གཞི་རྩའི་ལྷག་བསམ་ལ་སྐྱོན་མེད་ཀྱང༌། དེ་འོས་འཚམས་ཡིན་མིན་དང་ཕན་འབྲས་ཐོན་མིན། དུས་བབ་ཡིན་མིན་སོགས་ལ་མ་ལྟས་པར་བསམ་བློའི་ནང་གང་དྲན་དེ་ཁ་ནས་བཤད་རྐྱང་བྱ་ རྒྱུ་ཤིན་ཏུ་ནས་ཉེན་ཁའི་གནས་ཤིག་ཡིན།

དམ་པ་གང་ཞིག་ཡིན་ནའང་ཁོང་ཉིད་མ་འདས་པའི་སྐབས་རང་ཉིད་ཀྱི་སྤྲུལ་སྐུ་སྟེ་སྐུ་ཚབ་རང་ཉིད་ཀྱིས་འཇོག་པའམ་མང་མོས་ཐོག་འོས་འཆར་ཡོད་པའི་སྤྲུལ་སྐུ་ཞིག་ཡོང་ཐུབ་ཚེ་ད་གཟོད་ང་ཚོར་མང་གཙོའི་ལམ་ནས་རྙེད་པའི་སྤྲུལ་སྐུ་འཁྲུངས་པ་རེད་ལ། ཕན་ཀྱང་ཐོགས་ངེས་ཤོག་ཡིན་པ་ལས། ཟན་རིལ་དང་དབང་འོག་ནས་བཞག་པའི་སྤྲུལ་སྐུ་ཤི་བོ་དེ་ཚོ་དང་མི་མཚུངས་པའི་རེ་བ་དང་ཡིད་ཆེས་ཡོད།

ད་རེས་ཀྱི་ཚོགས་འདུ་འདི་ཕྱོགས་གཅིག་ནས་ཉེ་བའི་ཚུན་གྱི་བོད་ནང་གི་ཛ་དྲག་དང་ གྲོས་མོལ་ལམ་ལྷོང་འབྱུང་གི་མེད་པའི་ཐད་བོད་མིའི་ནང་བསམ་ཚུལ་བསྡུ་ལེན་བྱེད་ ཡས་ཡིན་ལ། དེ་ལས་གལ་ཆེ་བ་ནི་༧གོང་ས་མཆོག་སྐུ་འཚོ་ཞུགས་སྐབས་བོད་མིའི་སྤྱི་ཚོགས་དང་ བོད་གཞུང་གཉིས་རང་འཚོ་རང་ཚུགས་ལྡན་པའི་ཐོག་ནས་བོད་ཀྱི་འཐབ་རྩོད་རྒྱུན་མཐུད་ ཐུབ་པའི་གནས་སུ་སླེབས་པར་བྱ་རྒྱུའི་སྦྱོང་བརྡར་ཞིག་ཡིན།
 

གཞིས་བྱེས་བོད་མི་ཡོངས་ཀྱི་རེ་དོན་ཚོགས་ཆེན་འདི་ལ་བཅོལ་ཡོད་པས་ཁ་ཡོད་ལག་ཡོད་ཀྱི་གྲུབ་འབྲས་སོན་པ་ཞིག་མ་བྱུང་ཚེ་ལྷག་བསམ་དང་སྙིང་སྟོབས་ཞུམ་པ་མེད་པའི་གཞིས་ལུས་བོད་མི་རྣམས་ཀྱི་མདུན་སར་ངོ་གནོང་དགོས་པ་ཞིག་དང༌། རྒྱ་དམར་སྲིད་གཞུང་གི་རེ་ཐོག་ལ་རྟ་རྒྱུག་པ་ལྟ་བུ་ཆགས་ཉེན་ཡོད་པས་ཚོགས་ཞུགས་བ་ཡོངས་གྱིས་དེ་དོན་ལ་དགོངས་དཀྱེལ་ཆེ་བཞེས་གནང་སྐྱོང་ཡོང་བའི་རེ་སྐུལ་མི་ཆུང་སེམས་དཀར་གྱི་ཚུལ་དུ་ཞུ་བཞིན་ལགས།