རེབ་གོང་མདོ་བའི་གྲྭ་པ་ཞིག་གིས་རང་སྲོག་བཅད་འདུག

ད་ལྟ་རང་གནས་ཚུལ་འབྱོར་བ་ལྟར་ན། མདོ་སྨད་རེབ་གོང་མདོ་བ་འབྲོག་ནས་ཡིན་པའི་གྲྭ་བཤད་སྒྲུབ་ལོ་ ༤༠ ཡས་མས་ལགས་ཀྱིས་ཉིན་ཤས་སྔོན་རང་སྲོག་བཅད་པའི་གནས་ཚུལ་བྱུང་འདུག

གྲྭ་བཤད་སྒྲུབ་ཀྱིས་རང་སྲོག་གཅོད་དོན་ལ་འབྲེལ་ཡོད་གནས་ཚུལ་མཁོ་གཏོང་བས་འགྲེལ་བཤད་བརྒྱབ་པ་ལྟར་ན། ཕྱི་ལོ་ ༢༠༠༨ ལོར་རེབ་གོང་ནས་ཞི་བའི་ངོ་རྒོལ་སྔ་རྗེས་སྤེལ་བའི་ནང་མཉམ་ཞུགས་ཞུས་པར་བརྟེན། ས་གནས་རྒྱ་གཞུང་གི་ཉེན་རྟོག་པས་འཛིན་བཟུང་བཀག་ཉར་གྱིས་གཅར་རྡུང་ཚད་མེད་བཏང་སྟེ་གློད་འདུག་ནའང༌། ད་ལོའི་གསུམ་བཅུའི་དུས་དྲན་སྔོན་ཙམ་ནས་ཡང་བསྐྱར་འཛིན་བཟུང་བྱ་རྒྱུའི་མིང་གཞུང་ནང་ཚུད་དེ་འཛིན་བཟུང་བྱེད་གཏན་འཁེལ་བར་གཡོལ་བྱོལ་བྱས་འབྲེལ། རི་གསེང་རྫ་གསེང་སོགས་མི་མེད་ལུང་སྟོང་ནས་གབ་ཡིབ་ཀྱིས་བསྡད་ཅིང༌། བར་ལམ་ནས་རི་གསེང་རྫ་གསེང་ནས་ཀྱང་སྡོད་བཟོ་མ་བདེ་བ་བྱུང་སྟབས། ཉིན་བཅུའི་སྔོན་མདོ་བ་འབྲོག་གི་དགོན་པ་ནས་རང་སྲོག་རང་གིས་བཅད་ཡོད་འདུག
འདི་ནས་གནས་ཚུལ་རྒྱུས་ལོན་བྱུང་བར། གྲྭ་བཤད་སྒྲུབ་ལགས་ནི་རྒྱ་གར་ལྷོ་ཕྱོགས་དགའ་ལྡན་ཀླུ་འབུམ་ཁང་ཚན་ནས་ལོ་ངོ་བཅུའི་རིང་སློབ་གཉེར་གྱིས་དབུ་མ་འཛིན་གྲྭའི་མཚམས་ཏེ། ཕྱི་ལོ་ ༢༠༠༦ ལོར་ཕྱིར་ཕ་ཡུལ་དུ་ལོག་ཡོད་པ་དང༌། ཕ་མིང་ལ་སྒྲོལ་མ་སྐྱབས་ཞུ་ཡི་ཡོད་འདུག

གནས་ཚུལ་མཁོ་འདོན་པ། རྡོ་རྗེ་དབང་ཕྱུག