དྲིལ་བསྒྲཊ་ཀྱི་སྐད་ཆ་རྐྱང་རེད།

གཟའ་མིག་དམར་ཉིན་རྒྱ་གཞུང་གིས་རྒྱབ་ཤ་དཀར་པོའི་དེབ་ཅིག་བཏོན་ཏེ། མ་འོངས་པར་རྒྱ་ནག་ཞི་བདེ་ངང་འཕེལ་རྒྱས་ཀྱི་ལམ་དུ་བསྐྱོད་རྒྱུ་ཡིན་སྐོར་བརྗོད་ཡོད་པ་རེད།

ཁ་སང་རྒྱ་གཞུང་གསར་འགྱུར་གཞུང་ལས་ཁང་གི་༼ ཞི་བདེ་འཕེལ་རྒྱས ༽ཞེས་པའི་རྒྱབ་ཤ་དཀར་པོའི་དེབ་ཅིག་པར་འགྲེམས་བྱས་ཏེ། རྒྱ་གཞུང་གི་ཕྱི་འབྲེལ་སྲིད་ཇུས་ནི་འཛམ་གླིང་ཞི་བདེ་སྲུང་སྐྱོང་དང་། སྤྱི་མཐུན་འཕེལ་རྒྱས་ཀྱི་ལམ་ཕྱོགས་སུ་བསྐྱོད་རྒྱུ་ཡིན་སྐོར་དྲིལ་བསྒྲགས་བྱས་འདུག དེབ་དེ་ནི་རྒྱ་གཞུང་གིས་འཛམ་གླིང་ལ་རང་ཉིད་ཀྱི་མ་འོངས་པའི་སྲིད་ཇུས་ལམ་ཕྱོགས་གསལ་འདོན་གྱི་རྣམ་འགྱུར་བསྟན་པ་ཐེངས་གཉིས་པ་དེ་ཆགས་ཡོད། རྒྱབ་ཤ་དཀར་པོའི་དེབ་དེའི་ནང་རྒྱལ་ཁབ་ཀྱི་བདག་དབང་དང་བདེ་འཇགས། རྒྱལ་ཁོངས་ལེགས་འགྲུབ། རྒྱལ་ཁབ་གཅིག་གྱུར། རྒྱའི་བཅའ་ཁྲིམས་ཀྱིས་གཏན་ལ་ཕབ་པའི་ཆབ་སྲིད་ལམ་ལུགས་དང་སྤྱི་ཚོགས་ཁྱོན་ཡོངས་ནས་གཏན་འཇགས། སྤྱི་ཚོགས་དཔལ་འབྱོར་རྒྱུན་མཐུད་འཕེལ་རྒྱས་ཀྱི་གཞི་རྩའི་ཁས་ལེན་བཅས་ནི་རྒྱ་གཞུང་གི་གཙོ་སྙིང་ཁེ་ཕན་ ༦ ཡིན་སྐོར་འཛམ་གླིང་ལ་ཁྱབ་བསྒྲགས་བྱས་ཡོད་པ་རེད།  ཡིན་ནའང་། ཆབ་སྲིད་དབྱེ་ཞིབ་པ་དག་གིས་ཉེ་བའི་ལོ་འགའི་རིང་གི་རྒྱ་ནག་གི་བྱ་སྤྱོད་ཀྱི་རྐྱེན་པས།   ཡིག་ཆ་འདི་ཙམ་གྱིས་ཨེ་ཤ་ཡའི་མཐའ་འབྲེལ་རྒྱལ་ཁབ་ཁག་གིས་རྒྱ་ནག་ཞི་བདེ་འཕེལ་རྒྱས་ཀྱི་ལམ་ཕྱོགས་སུ་བསྐྱོད་རྒྱུར་ཡིད་ཆེས་ཡོང་ཐབས་བྲལ་བ་བརྗོད་འདུག

ཕྱི་ཚེས་ ༦ ཉིན་གྱི་གསར་འགོད་ལྷན་ཚོགས་ཐོག་རྒྱ་ནག་གི་ཕྱི་འབྲེལ་མགྲིན་ཚབ་པ་ཅང་ཡིས་ཀྱིས།  དེང་སྐབས་རྒྱ་ནག་མགྱོགས་མྱུར་འཕེལ་རྒྱས་འགྲོ་བཞིན་པ་དང་བསྟུན་ཏེ། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལམ་ཕྱོགས་གང་འདྲ་ཞིག་ཏུ་བསྐྱོད་རྒྱུ་ཡིན་མིན་དང་། རྒྱ་ནག་གི་འཕེལ་རྒྱས་ཀྱིས་མ་འོངས་པར་འཛམ་གླིང་ལ་ཤུགས་རྐྱེན་ག་འདྲ་ཞིག་འབྱུང་མིན་ཐད་དོ་སྣང་བྱེད་བཞིན་ཡོད་པས། རྒྱ་གཞུང་གིས་ཞི་བདེ་འཕེལ་རྒྱས་ཞེས་པའི་རྒྱབ་ཤ་དཀར་པོའི་དེབ་དེ་འགྲེམས་སྤེལ་བྱས་ཏེ། རྒྱལ་སྤྱིའི་སྤྱི་ཚོགས་ཀྱི་དོ་སྣང་དང་དོགས་སློང་སྣ་ཚོགས་ལ་ལན་འདེབས་གསལ་བཤད་བྱས་ཡོད་སྐོར་དང་།  རྒྱབ་ཤ་དཀར་པོའི་དེབ་དེའི་ནང་རྒྱ་གཞུང་སྐྱོད་བཞིན་པའི་ལམ་བུ་དང་། འཚོལ་སྙེགས་ཀྱི་དམིགས་ཡུལ། ཕྱི་ནང་ཆབ་སྲིད་ཀྱི་ལམ་ལུགས། འཛམ་གླིང་གི་འབྲེལ་བ་ཐག་གཅོད་སྟངས་སོགས་བསྐྱར་དུ་རྒྱལ་སྤྱིའི་སྤྱི་ཚོགས་ལ་གསལ་སྟོན་བྱས་ཡོད་ཚུལ་བརྗོད་འདུག 

འདས་པའི་ལོ་ ༡༠ ནང་རྒྱ་གཞུང་གིས་ཕྱི་འབྲེལ་སྲིད་ཇུས་ཐད་༼ ཞི་བདེ་ངང་འཕེལ་རྒྱས ༽ཞེས་པའི་སྐད་ཆ་སྙན་མོ་བཤད་དེ། རྒྱ་ནག་ཞི་བདེ་ངང་འཕེལ་རྒྱས་ཀྱི་ལམ་དུ་བསྐྱོད་རྒྱུ་ཡིན་སྐོར་དྲིལ་བསྒྲགས་བྱས་ཡོད། ཡིན་ནའང་། ཉེ་བའི་ལོ་གཉིས་ཀྱི་ནང་རྒྱ་གཞུང་གི་རྣམ་འགྱུར་དང་བྱ་སྤྱོད་སྟོན་སྟངས་དེ་ཡིས། རྒྱ་ནག་གི་མ་འོངས་འཕེལ་རྒྱས་ཐད་མཐའ་འབྲེལ་རྒྱལ་ཁབ་ཁག་གཙོས་པའི་འཛམ་གླིང་རྒྱལ་ཁབ་མང་པོར་དོགས་གཞི་དང་ཐེ་ཚོམ་སྐྱེ་རུ་བཅུག་ཡོད། དཔེ་མཚོན་གསལ་ཤོས་ཤིག་ནི་རྒྱ་ནག་གི་ལྷོ་ཕྱོགས་མཐའ་འདབས་ཞི་བདེ་རྒྱ་མཚོའི་མངའ་ཁོངས་བདག་དབང་ཐད་རྒྱ་གཞུང་གི་བྱ་སྤྱོད་དང་རྣམ་འགྱུར་སྟོན་སྟངས་དེ་ཆགས་ཡོད། 

ཨ་རིའི་ཁེ་ལས་ཞིབ་འཇུག་ཁང་གི་ཉམས་ཞིབ་པ་མཱ་ཛ་(Michael Mazza)ལགས་ཀྱིས་རྒྱ་གཞུང་གི་དེབ་དེའི་ནང་དོན་གྱི་ཕྱེད་ཀ་དྲིལ་བསྒྲགས་ཀྱི་སྐད་ཆ་རྐྱང་ཡིན་པ་ཙམ་ལས། རྒྱ་ནག་དཔོན་རིགས་ཚོའི་ཆབ་སྲིད་ལངས་ཕྱོགས་གསལ་མེད་པ་དང་། ལྷག་པར་དུ་བདེ་འཇགས་གླེང་གཞིའི་ཐད་ནས་བམ་བཤད་ཙམ་མ་གཏོགས་གནས་ཚུལ་གཞན་ཅི་ཡང་བཀོད་མེད་པས། འཛམ་གླིང་མི་མང་གིས་རྒྱ་ནག་གི་མ་འོངས་འཕེལ་རྒྱས་ཐད་ཡིད་ཆེས་རྙེད་དཀའ་བའི་སྐོར་བརྗོད་འདུག་ལ། ཁོང་གིས་“ རྒྱལ་སྤྱིའི་བདེ་འཇགས་དང་འབྲེལ་བའི་ཕྱོགས་ནས། རྒྱབ་ཤ་དཀར་པོའི་དེབ་ནང་བཀོད་པའི་བརྗོད་བྱ་དྲང་བདེན་མེད་པ། རྒྱ་ནག་གི་བྱ་སྤྱོད་ཐད་ནས་གསལ་འདོན་བྱས་པ་དོན་དངོས་དང་མཐུན་ཀྱི་མི་འདུག  སྤྱིར་རྒྱལ་སྤྱིའི་སྒང་གནས་ཚུལ་གླེང་སློང་བྱ་རྒྱུ་གལ་ཆེན་པོ་རེད། ཡིན་ནའང་བྱ་བ་སྤྱོད་སྟངས་ནི་དེ་བས་ཀྱང་གལ་ཆེན་པོ་ཆགས་ཡོད། ཡིག་ཆ་དེའི་ནང་ནས་ངས་འཛམ་གླིང་མི་མང་ཡིད་ཆེས་འབྱུང་བྱེད་ཀྱི་གནས་ལུགས་གཅིག་ཀྱང་རྙེད་མ་སོང ” ཅེས་བརྗོད་འདུག 

ཕྱི་ལོ་ ༢༠༠༩ ལོར་ཨ་རྒྱ་གཉིས་ཀྱི་འཐབ་ཇུས་དང་དཔལ་འབྱོར་གྲོས་མོལ་སྐབས། རྒྱ་གཞུང་གིས་གཙོ་སྙིང་ཁེ་ཕན་གསུམ་བཏོན་ཡོད་མོད་རྒྱབ་ཤ་དཀར་པོའི་དེབ་དང་གཙོ་སྙིང་ཁེ་ཕན་དྲུག་ཏུ་འཕར་འདུག  

གསར་འགོད་པ། ཚེ་རིང་རྒྱལ།