དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ལས་ཉིན་གསུམ་པའི་སྔ་དྲོར། སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་གི་གསལ་བཤད་ཁག་ཅིག་གནང་སྐབས། སྨན་རྩིས་ཁང་དབུ་བརྙེས་ནས་ལོ་ ༡༠༠ འཁོར་བའི་མཛད་སྒོའི་ཐོག་༧གོང་ས་མཆོག་ནས་ཉམ་ཐག་དང་ནད་རིགས་སྔོན་འགོག་བཅས་སྤྱི་ཡོངས་འཕྲོད་བསྟེན་གྱི་ཐོག་བཀའ་སློབ་ནན་པོ་ཕེབས་པ་ལྟར། བཀའ་ཤག་ནས་གལ་ཆེན་པོར་བརྩིས་ཏེ་ཆེད་འཛུགས་ཚོགས་ཆུང་གཉིས་བཙུགས་ཡོད་པ་དང་། ཉེ་ཆར་ཕྱི་ཟླ་ ༧ ཚེས་ ༧ ཉིན་ཉམ་ཐག་སྐོར་གྱི་ཞིབ་འཇུག་ཚོགས་ཆུང་དེས་སྙན་ཐོ་འབྱོར་ཡོད་པ་དང་། དེ་བཞིན་འཕྲོད་བསྟེན་སྤྱི་དང་གཙོ་བོ་ནད་རིགས་སྔོན་འགོག་སྐོར་གྱི་ཞིབ་འཇུག་ཚོགས་ཆུང་གི་སྙན་ཐོ་དེའང་ཕྱི་ཟླ་ ༩ ཚེས་ ༡༦ ཉིན་འབྱོར་ཡོད་ཅིང་། ཉམ་ཐག་ཚོགས་ཆུང་གི་སྙན་ཐོ་དེ་གཏིང་ཟབ་པོ་དང་དོན་ལ་ཕན་པ་ཞིག་ཡོད་པ་དང་། དེ་བཞིན་འཕྲོད་བསྟེན་སྐོར་གྱི་ཞིབ་འཇུག་ཚོགས་ཆུང་གིས་བོད་མིའི་གཞིས་ཆགས་༢༠ ལྷག་ཙམ་ནང་ཕེབས་ཏེ། ཞིབ་འཇུག་ཧ་ལས་བ་གཏིང་ཟབ་པོ་གནང་ཡོད་པ་དང་འབྲེལ། སྙན་ཐོའི་ནང་ཞིབ་འཇུག་གནང་མཁན་ཁོ་རང་ཚོར་དགོངས་ཚུལ་ག་རེ་བྱུང་བའང་བཀོད་ཡོད་པ་དང་། སྙན་ཐོ་འབྱོར་བ་གཞིར་བཟུང་ལས་རིམ་བང་སྒྲིག་སྟེ་འགྲོ་མུས་ཡིན་སྐོར་གསུངས་སོང་།
ཡང་ཁོང་གིས་ཉེ་ཆར་ཡུ་རོབ་ནང་ཚོགས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་སྐོར་ལ་གསལ་བཤད་གནང་དོན། རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༧ པའི་ཐོག རྒྱལ་ཁབ་ ༥༠ ནས་ཚོགས་བཅར་བ་ ༢༥༠ ཕེབས་ཡོད་པ་དང་། དེའི་ནང་རྒྱ་རིགས་ ༢༩ དང་། དེ་བཞིན་ཡུ་རོབ་མཉམ་འབྲེལ་གྱི་གནད་ཡོད་མི་སྣ་གཞུང་འབྲེལ་གྱི་ཕྱག་ལས་གནང་མཁན་དང་། དམིགས་བསལ་གྱིས་འགྲོ་བ་མིའི་ཐོབ་ཐང་སྐོར་ལ་ཕྱག་ལས་གནང་མཁན་ཚོ་ཚོགས་ཆེན་གྱི་དབུ་འབྱེད་མཛད་སྒོའི་ཐོག་ཕེབས་ཡོད་པ་དང་། མཇུག་བསྡོམས་མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་གསུང་བཤད་ཞེ་དྲགས་ཡག་པོ་གནང་ཡོད་པ་དང་། དེ་དང་མཉམ་དུ་འཇར་མན་གྲོས་ཚོགས་ཀྱི་ཚོགས་གཙོ་གཞོན་པ་མཆོག་གཞུང་འབྲེལ་གྱི་ཐོག་ནས་ཕེབས་ཏེ་ཆེ་མཐོང་ལྡན་པའི་གསུང་བཤད་གནང་ཡོད་ལ། ད་ལན་གྱི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གཟི་བརྗིད་ལྡན་པ་ཞིག་ཆགས་དགོས་དོན་གཙོ་ཆེ་ཤོས་དེ་༧གོང་ས་མཆོག་དབུ་འབྱེད་མཛད་སྒོའི་ཐོག་ཕེབས་ཡོད་པས་ཡིན་ལ། དབུ་འབྱེད་མཛད་སྒོའི་ཐོག་ཏུའང་ང་ཚོས་ཁོང་ཚོར་བོད་དོན་རྒྱབ་སྐྱོར་ཚོགས་པ་ཞུ་ཡི་ཡོད་ཀྱང་། གཙོ་བོ་ཁོང་ཚོས་༧གོང་ས་མཆོག་ལ་དད་གུས་དང་བརྩི་བཀུར་ཞུ་ཡི་ཡོད་པ་དང་། ༧གོང་ས་མཆོག་གིས་གྲོགས་པོ་ཟེར་ན་འདྲ་ཐག་ཉེ་བོར་བརྩིས་བའི་བཀའ་དྲིན་ལ་བརྟེན་ནས་ད་ལྟ་བར་དུ་རྒྱུན་མ་ཆད་པར་ང་ཚོར་རྒྱབ་སྐྱོར་གནང་གི་ཡོད་པ་ཞུས་ཡོད་ལ། ༧གོང་ས་མཆོག་གི་བཀའ་སློབ་གཞིར་བཞག་པའི་ཐོག་ནས་སེམས་འགུལ་ཐེབས་པ་དང་སེམས་ཤུགས་འཕར་བ་ཞེ་དྲགས་ཡག་པོ་བྱུང་ཡོད་པ་དང་། དམིགས་བསལ་ཚོགས་ཆེན་ཚོགས་དགོས་པ་དེ་གལ་ཆེན་པོ་ཞེ་དྲགས་ཡིན་ཡང་། ཚོགས་ཆེན་འཚོགས་པར་འགྲོ་སོང་ཨ་སྒོར་འབུམ་ ༣ གཏོང་དགོས་ཀྱི་ཡོད་པས་ལས་སླ་བོ་ཞིག་མེད་ལ། ད་ལན་ཚོགས་བཅར་བ་འགའ་ཤས་ཤིག་ལ་ཐོངས་མཆན་གྱི་ཐོག་ནས་དཀའ་ངལ་འཕྲད་པ་མ་གཏོགས་མང་ཆེ་བར་དཀའ་ངལ་འཕྲད་མེད་སྐོར་དང་། ད་ལན་ཚོགས་ཆེན་ཐོག་གི་གསལ་བསྒྲགས་དེ་གང་ལ་གང་འཚམ་ཤུགས་ཆེན་པོ་ཡོད་པ་དང་། དེའི་ནང་ནས་དམིགས་བསལ་གྱིས་དབུ་མའི་ལམ་དང་འབྲེལ་བའི་བོད་རྒྱ་ཞི་མོལ་སྐོར་ལ་ཕལ་ཆེར་ཐེངས་དྲུག་ཙམ་གླེང་ཡོད་པ་དང་། དབུ་མའི་ལམ་ལ་རྒྱབ་སྐྱོར་ཡོད་ཅེས་ཚོགས་ཆེན་ཐོག་གསུངས་ཏེ་ཕྱག་བརྡབས་ནས་རྒྱབ་སྐྱོར་བྱུང་ཡོད་པས་དེ་གལ་ཆེན་པོར་མཐོང་གི་ཡོད་ལ། ཨ་རིའི་གཞུང་ནས་དབུ་མའི་ལམ་ལ་རྒྱབ་སྐྱོར་ཡོད་ཅེས་གསུངས་དུས་ང་ཚོས་ཏན་ཏན་དེ་གལ་ཆེན་པོར་རྩི་དགོས་པ་ལྟར་རྩི་ཡི་ཡོད་སྐོར་སོགས་གསུངས་སོང་།
ཡང་སྲིད་སྐྱོང་མཆོག་གིས་འཛམ་གླིང་ཐོག་ནས་༧གོང་ས་མཆོག་ལ་དད་གུས་བརྩི་བཀུར་ཤུགས་ཆེན་ཞུ་བཞིན་ཡོད་སྐོར་གསུངས་བ་དང་འབྲེལ། བོད་མིའི་ནང་༧གོང་ས་མཆོག་ལ་སྐྱོན་བརྗོད་ཞུ་མཁན་ཉུང་ཤས་ཡོང་བཞིན་ཡོད་པ་དེ་ཚོར་བཀའ་ཤག་ལ་འགན་ཡོད་པ་ལྟར་མཐའ་གཅིག་ཏུ་ངོ་རྒོལ་གནང་རྒྱུ་ཡིན་སྐོར་གསུངས་དོན། ཉེ་སྔོན་སྦེལ་ཇམ་ནང་ཚོགས་པའི་སེམས་དང་སྲོག་གི་བགྲོ་གླེང་ལྷན་ཚོགས་ཐོག་བཅར་བའི་གོ་སྐབས་བྱུང་བ་དང་། ༧གོང་ས་མཆོག་ནས་སེམས་དང་སྲོག་གི་ཚན་རིག་མཁས་པ་ལྷན་དུ་བགྲོ་གླེང་གནང་ཡོང་སྐབས། བགྲོ་གླེང་ཐད་གཏོང་དྲ་རྒྱ་ལ་མི་འབུམ་ ༤ ཡིས་གཟིགས་ཀྱི་ཡོད་པ་རེད་ཟེར་དུས། ནང་ཆོས་ལ་ཆེ་མཐོང་དེ་ཙམ་ཡོད་པ་དང་། འཛམ་གླིང་གིས་དོ་སྣང་དེ་ཙམ་གནང་གི་ཡོད་པ། དམིགས་བསལ་གྱིས་ནང་པ་མིན་པ། ཆོས་ལ་དོགས་ཟོན་བྱེད་མཁན་གྱི་ཚན་རིག་མཁས་པ་ཚོས་དེ་ཙམ་གྱིས་དོ་སྣང་བྱས་ཏེ། ད་ལན་མི་འབུམ་ ༤ ཡིས་བསྟོད་བསྔགས་ཞུ་ཡོང་དུས་འཛམ་གླིང་ནང་༧གོང་ས་མཆོག་ལ་ཆེ་མཐོང་ཅི་ཙམ་ཞུ་ཡི་ཡོད་པ་དེ་གསལ་པོ་ཞེ་དྲགས་ཡིན་སྟབས། བོད་མི་ཚོ་ཧ་ལས་དགོས་པ་ཞིག་དང་དགའ་སྤོབས་བྱེད་དགོས་པའི་གནས་ཚུལ་བཟང་པོ་ཞིག་རེད། ཡིན་ནའང་། ཉེ་ཆར་བོད་མི་གསུམ་གྱིས་༧གོང་ས་མཆོག་ལ་མཚན་སྨད་ཞུས་པ་དེ་ཧ་ལས་བའི་བློ་ཕམ་པའི་གནས་ཚུལ་རེད། དེ་སྔོན་མོན་གྷོ་བོད་མིའི་གཞིས་ཆགས་ཀྱི་འཁྲུངས་སྐར་དུས་ཆེན་དང་ཉེ་སྔོན་དམངས་གཙོའི་དུས་ཆེན་ལའང་དེར་མཐའ་གཅིག་ཏུ་ངོ་རྒོལ་ཞུས་པ་ཡིན། ངོ་རྒོལ་ཞུས་པ་དེར་ཁ་ཤས་ཀྱིས་ཁོ་རང་གིས་ཆེ་མཐོང་སྤྲད་པ་རེད། ངོས་འཛིན་བྱས་པ་རེད་ཅེས་བཤད་ཀྱི་ཡོད་ཀྱང་རྩ་བ་ནས་མིན། ངོ་རྒོལ་བྱེད་དགོས་ས་དེར་མཐའ་གཅིག་ཏུ་ངོ་རྒོལ་བྱེད་དགོས་པ་དེ་བཀའ་ཤག་གི་འགན་རེད། ༧གོང་ས་མཆོག་ལ་འཛམ་གླིང་གིས་དད་གུས་དང་བརྩི་བཀུར་དེ་འདྲ་བྱེད་ཀྱི་ཡོད་པ་རེད། བོད་ལ་༧གོང་ས་མཆོག་ལས་ལྷག་གིས་བཀའ་དྲིན་ཅན་ཞིག་མེད་པ་བརྗོད་མི་དགོས་པ་རེད། དགུང་ལོ་ ༡༦ ནས་བཟུང་ལོ་ ༦༠ ཙམ་རིང་སྐུ་ལས་དེ་འདྲ་བསྐྱོན་ཏེ་བོད་ཟེར་ན་རེད། ནང་ཆོས་ཟེར་ནའང་རེད། རྩ་དོན་ཟེར་ནའང་རེད་རྒྱལ་སྤྱིའི་སྡིངས་ཆའི་ཐོག་ད་ལྟའི་བར་དུ་གནས་ཐུབ་པ་དེ་ཁོང་གི་བཀའ་དྲིན་ཡིན་སྟབས། ཁོང་ལ་སྐྱོན་བརྗོད་ག་འདྲ་ཞིག་སུས་ཞུས་པ་ཡིན་ནའང་བཀའ་ཤག་གིས་མཐའ་གཅིག་ཏུ་ངོ་རྒོལ་ཞུ་ཡི་ཡོད། དེང་སང་ཨ་རིའི་སྲིད་འཛིན་ཨོ་བྷ་མ་ཡིན་ན་རེད། རྒྱ་གར་གྱི་སྲིད་འཛིན་མུ་དྷི་ཡིན་ནའང་སྐྱོན་བརྗོད་བྱེད་ཀྱི་ཡོད་པ་རེད། ང་ཚོས་ག་རེ་བྱས་ནས་སྐྱོན་བརྗོད་བྱེད་མི་ཆོག་པ་རེད་ཟེར་མཁན་ཉུང་ཤས་ཤིག་འདུག་ཀྱང་། དེ་རྩ་བ་ནས་འདྲ་ཡི་མ་རེད། ཨ་རིའི་སྲིད་འཛིན་ཨོ་བྷ་མ་དང་རྒྱ་གར་གྱི་སྲིད་འཛིན་སྲིད་བློན་ཚོས་ང་ལ་འོས་ཤོག་བླུགས་རོགས་བྱོས། ངས་ལས་ཀ་བྱ་རྒྱུ་ཡིན་ཞེས་སོ་སོ་ལངས་ཡོང་གི་ཡོད་པ་དང་། ལས་ཀ་མ་བྱས་ན་ཁོ་ཚོར་སྐྱོན་བརྗོད་བྱས་ན་འགྲིག་གི་ཡོད་པ་རེད། ༧གོང་ས་མཆོག་དགུང་ལོ་ཆུང་བའི་སྐབས་ལ་གདམ་ཀ་མེད་པའི་ཐོག་ནས་སྟག་འཚེར་གྲོང་གསེབ་ནས་ངོས་འཛིན་ཡིན་ཞེས་གདན་འདྲེན་ཞུས་ཏེ། བོད་མི་མང་གིས་དང་དུ་བླངས་ཏེ་ཁྲི་འདོན་བྱས་ནས་དབུ་འཁྲིད་གནང་རོགས་ཞེས་ཡར་ཞུས་བཞག་པ་ཞིག་རེད། དེ་གཅིག་པུས་མི་ཚད་པར་ཉག་ཕྲ་བའི་སྐབས་ལ་ཆབ་སྲིད་ཀྱི་སྐུ་དབང་བཞེས་རོགས་གནང་ཞེས་ཞུས་པ་དང་། དེ་ནས་བཙན་བྱོལ་དུ་འབྱོར་སྐབས་ང་ཚོར་ཅི་ཡང་མེད་པར་རིམ་གྱིས་རིམ་གྱིས་སྐུ་ལས་བསྐྱོན་ཏེ་འཛམ་གླིང་སྒང་ལ་བོད་པ་ཡིན་ཟེར་དུས་གདེང་སྤོབས་ཆེན་པོའི་ཐོག་ནས་འགྲོ་བ་དེ་ཁོང་གི་བཀའ་དྲིན་ཡིན་སྟབས། ཁོང་ལ་སྐྱོན་བརྗོད་ཞུས་པ་དང་སྲིད་འཛིན་གཞན་སུ་ལ་སྐྱོན་བརྗོད་ཞུས་པ་གཉིས་རྩ་བ་ནས་འདྲ་ཡི་མ་རེད། ཡང་འགའ་ཤས་ཀྱིས་གཏམ་བརྗོད་རང་དབང་རེད། གཏམ་བརྗོད་རང་དབང་ཡོད་ན་སྐྱོན་བརྗོད་བྱེད་ཆོག་པ་རེད་ཟེར་མཁན་ཡོད་ཀྱང་། དེའང་འདྲ་ཡི་མ་རེད་ཅེས་དང་། གཏམ་བརྗོད་རང་དབང་གི་ཐོག་ནས་ཡིན་ན་རེད། དམངས་གཙོའི་ཐོག་ནས་བཤད་པ་ཡིན་ནའང་རེད། ༧གོང་ས་མཆོག་ལ་སྐྱོན་བརྗོད་ཞུ་རྒྱུ་ཡོད་པ་མ་རེད་ཅེས་ཞུ་ཡི་ཡོད་ལ། དེ་སྔར་ཞུས་ཡོད། ད་ལན་ཡང་ཞུ་རྒྱུར་སྲིད་སྐྱོང་ལ་རྒྱབ་སྐྱོར་ཡོད་མདོག་མདོག་བྱས་ཏེ་༧གོང་ས་མཆོག་ལ་མཚན་སྨད་ཞུས་པ་ཡིན་ན་འགྲིག་གི་མ་རེད་ལ། སྲིད་སྐྱོང་ལ་སྐྱོན་བརྗོད་བྱས་པ་ཡིན་མདོག་མདོག་བྱས་ཏེ་༧གོང་ས་མཆོག་ལ་མཛད་དཀའ་བཟོས་ནའང་འགྲིག་གི་མ་རེད། སྔོན་མ་ཡིན་ན་ང་ཚོས་རང་བཙན་ཁ་ལ་འཁྱེར་ཏེ་༧གོང་ས་མཆོག་ལ་མཚན་སྨད་ཞུ་ཡི་འདུག་ཟེར་གྱི་ཡོད་པ་རེད་ལ། དེ་འདྲ་ཡོད་པ་རེད། དེང་སང་༧གོང་ས་མཆོག་ཁ་ལ་འཁྱེར་ཏེ་༧གོང་ས་མཆོག་ལ་མཛད་དཀའ་བཟོ་མཁན་ཡང་ཡོད་པ་རེད། ༧གོང་ས་མཆོག་ལ་མཛད་དཀའ་ཞུ་རྒྱུ་ཡོད་པ་མ་རེད་ལ། ༧གོང་ས་མཆོག་ལ་མཚན་སྨད་ཞུ་རྒྱུ་ཡོད་པ་མ་རེད། ང་ཚོ་ཚང་མས་ཁོང་ལ་དད་གུས་བརྩི་བཀུར་ཞུ་དགོས་པ་རེད་མ་གཏོགས་སོ་སོའི་རྩ་ཆེ་བའི་རྩ་བའི་ཆོས་སྲིད་གཉིས་ཀྱི་དབུ་འཁྲིད་ལ་མཚན་སྨད་ཞུས་པ་ཡིན་ན། མཐའ་གཅིག་ཏུ་དེ་སྔ་ནས་བཀའ་ཤག་གིས་ངོ་རྒོལ་ཞུས་ཡོད་ལ། མ་འོངས་པ་ལའང་ཞུ་ཡི་ཡིན། ཞེས་གསུངས་སོང་།
ཡང་གྲོས་ཚོགས་ནང་བཙན་བྱོལ་གྱི་མི་ལོ་ ༦༠ རིང་བོད་དོན་ལས་འགུལ་མང་པོ་སྤེལ་བར་དོན་འབྲས་སྨིན་ཡོད་མེད་ཐད་གླེང་སློང་བྱུང་བ་དེར་སྲིད་སྐྱོང་མཆོག་གིས། མི་ལོ་ ༦༠ རིང་ང་ཚོས་ལས་འགུལ་མང་པོ་སྤེལ་ཡོད་པ་དེར་གྲུབ་འབྲས་སྨིན་ཡོད་པ་རེད་དང་སྨིན་ཡོད་པ་མ་རེད་ཟེར་ན་ཏན་ཏན་སྨིན་ཡོད་པ་དེ་ཞུ་མ་དགོས་པ་རེད། ཡུ་གུར་དང་ནང་སོག་གི་མི་ཚོར་ཐུག་དུས། བོད་པ་ཚོར་ཡོད་པའི་སྒྲིག་འཛུགས་དང་དམངས་གཙོ་འདི་ལྟ་བུ་ཞིག་ཁོ་ཚོར་ཡོད་པ་ཡིན་ན་ཞེ་དྲགས་བྱེད་ས་རེད་ཅེས་བརྗོད་ཀྱི་འདུག་ལ། རྒྱ་ནག་གི་ངོས་ནས་ཀྱང་བོད་ཀྱི་གནད་དོན་ཐོག་རྒྱབ་ཤ་དཀར་པོ་འདོན་སྟངས་དང་། ཤིན་ཅང་གི་ཐོག་ལ་རྒྱབ་ཤ་དཀར་པོ་འདོན་སྟངས། དེ་བཞིན་ནང་སོག་ལ་རྒྱབ་ཤ་དཀར་པོ་འདོན་སྟངས་བཅས་ལ་བལྟས་ན། ནང་སོག་ལ་རྒྱབ་ཤ་དཀར་པོ་གཅིག་དང་ཤིན་ཅང་ལ་གཉིས། བོད་ནང་ལ་བཅུ་གཅིག་བཟོས་ཡོད་པ་དང་། གྲངས་ཉུང་མི་རིགས་ཞེས་རྒྱབ་ཤ་དཀར་པོ་བཏོན་པ་བཅས་བོད་ཀྱི་གནད་དོན་ཐོག་བསྡོམས་པའི་རྒྱབ་ཤ་དཀར་པོའི་དེབ་ ༡༣ བཏོན་ཡོད་པ་དང་། དེས་ག་རེ་སྟོན་གྱི་ཡོད་པ་རེད་ཟེར་ན། བོད་མིའི་སྒྲིག་འཛུགས་དང་བོད་དོན་རྒྱབ་སྐྱོར་ཚོགས་པ། བོད་མི་ཡོངས་ཀྱི་བརྩི་ཤོས་༧གོང་ས་མཆོག་ནས་སྐུ་ལས་བསྐྱོན་པའི་བཀའ་དྲིན་ལ་བརྟེན། རྒྱ་ནག་ཡིན་ནའང་བོད་ལ་ཆེད་དུ་མངགས་ནས་རྒྱབ་ཤ་དཀར་པོའི་དེབ་ ༡༣ བཏོན་དགོས་པ་དེ། ནུས་པ་ཐོན་པར་བརྟེན་ནས་བཟོ་ཡི་ཡོད་པ་རེད་མ་གཏོགས་ནང་སོག་ལྟར་ཡ་མ་བྱས་པར་བཞག་ནའང་འགྲིག་གི་རེད། ང་ཚོས་ལས་འགུལ་སྤེལ་བ་ལ་བརྟེན་ནས་བོད་ནང་གི་བོད་མི་ཚོ་ཡིན་ནའང་བོད་མིའི་སྒྲིག་འཛུགས་ལ་བརྩི་ཡི་ཡོད་པ་རེད་ལ། ང་ཚོས་ཀྱང་དཀའ་ལས་བརྒྱབ་སྟེ་ཕྲ་ལ་ཕྲན་བུ་ཕན་ཐོགས་པའི་གནས་སྟངས་ཤིག་ཆགས་བསྡད་ཡོད་སྐོར་གསུངས་སོང་།
ཉེ་ཆར་བོད་རང་སྐྱོང་ལྗོངས་ཟེར་བའི་མགོ་འཁྲིད་གསར་དུ་བསྐོས་ཡོད་པའི་སྐོར་ལ་ཁོང་གིས། གསར་དུ་བསྐོས་པའི་ཝུ་ཡེན་ཅེ་ག་འདྲ་ཞིག་ཡིན་མིན་ཞིབ་ཕྲ་རིམ་གྱིས་བལྟ་རྒྱུ་རེད་ལ། རྒྱ་ཆེ་ནས་རྒྱ་ནག་སྤྱི་ཡོངས་ཀྱི་ཆབ་སྲིད་འགྱུར་ལྡོག་ལ་བལྟས་པ་ཡིན་ན། ཝུ་ཡེན་ཅེ་དང་མཉམ་དུ་རྒྱ་ནག་གི་མངའ་སྡེ་ལྔ་ཡི་མགོ་འཁྲིད་བརྗེ་བོ་བརྒྱབ་ཡོད་པ་དང་། ཕྱི་ལོ་ ༢༠༡༧ ལོའི་ལོ་མཇུག་ཏུ་རྒྱ་ནག་གི་མགོ་འཁྲིད་ཚོར་འཕོ་འགྱུར་ཆེན་པོ་ཞིག་འགྲོ་ཡི་ཡོད་སྟབས། ནང་ཁུལ་དུ་ཆབ་སྲིད་ཚོགས་པའི་དབང་ཆ་འཐབ་རྩོད་འཁྲུག་པོ་ཞིག་འགྲོ་ཡི་ཡོད་པ་གསལ་པོ་ཡིན་ལ། སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་གཉིས་ཀྱང་འཕོ་འགྱུར་འགྲོ་རྒྱུ་ཡིན་ལུགས་རྗོད་ཀྱི་ཡོད་ལ། རྒྱ་ནག་སྤྱི་ཡོངས་ཀྱི་ནང་འགྱུར་བ་ག་རེ་འགྲོ་ཡོད་པ་དང་། དེས་བོད་ནང་ལ་འགྱུར་བ་ག་རེ་གཏོང་གི་འདུག་ལྟ་དགོས་པ་དེ་གལ་ཆེན་པོ་ཞེ་དྲགས་ཡིན་སྐོར་དང་། བོད་ནང་མེ་འཁོར་ལྕགས་ལམ་མང་པོ་བཟོ་ཡི་ཡོད་པ་དེ་གཏེར་ཁ་སྔོག་འདོན་དང་ཡུལ་མི་དབོར་འདྲེན་སོགས་ཀྱི་ཆེད་དུ་ཡིན་པ་མ་ཟད། ལྕགས་ལམ་གྱི་སྤུས་ཚད་དེ་དམག་ཆས་དབོར་འདྲེན་གྱི་གནས་ཚད་ལྡན་པའི་ཐོག་ནས་བཟོ་ཡི་ཡོད་ལ། དེ་བརྒྱུད་ནས་ག་འདྲ་ཆགས་ཀྱི་ཡོད་མེད་དེ་དྲི་བ་ཆེན་པོ་ཞེ་དྲགས་ཤིག་ཆགས་ཡོད་པ་དང་། རྒྱ་གར་སོགས་ཁྱིམ་མཚེས་རྒྱལ་ཁབ་ཚོ་ལའང་གནོན་ཤུགས་སླེབ་ཡོང་གི་ཡོད་པ་ལྟར། རྒྱ་གར་ནང་ལོགས་ལའང་རང་བཞིན་གྱིས་ཆབ་སྲིད་ཀྱི་འགྱུར་བ་ཡོང་བཞིན་ཡོད་པ་དང་བསྟུན། བོད་དོན་ཐོག་རིམ་གྱིས་དོ་སྣང་ཆེ་རུ་འགྲོ་ཡི་ཡོད་སྐོར་གསུངས་སོང་།
གསར་འགོད་པ། པདྨ་མཚོ།
སྲིད་སྐྱོང་གིས་གསུང་བཤད་ཡག་པོ་གནང་འདུག་ཡི་རངས་ཡོད།
༅༅། སྲིད་སྐྱོང་མཆོག་ནས་མི་གཉིས་གསུམ་ནས་མང་གཙོ་རེད་ཟེར་ནས་༧གོང་ས་མཆོག་ལ་སྐྱོན་བརྗོད་བྱེད་ཆོག་
གི་རེད་ཅེས་བརྗོད་པ་འགྲིག་གི་མ་རེད། མཛད་དཀའ་བཟོས་ན་འགྲིག་གི་མ་རེད་གསུངས་པ་བདེན་པ་རེད། ཨ་རི་དང་རྒྱ་གར་སྲིད་འཛིན་ལ་སྐྱོན་བརྗོད་བྱེད་པ་ལྟ་བུ་དཔེ་བཞག་པ་ནི་
ཨ་ཕོའི་འཁྲབ་པ་དང་། ར་ཕོའི་འཁྲབ་པ་འདྲ་གི་མ་མེད།
ཆུ་འཐུང་བ་དང་འོ་མ་འཐུང་བ་གཉིས་རྩ་བ་ནས་བྲོ་བ་ཁག་ཁག་རེད།
མི་ཤེས་ཤེས་མདོག་དང། མི་འཇོན་འཇོན་མདོག་གི་༧གོང་ས་མཆོག་ལ་མཚན་སྨད་ཞུ་མཁན་ཚོ་སྙིང་རྗེ་།
༧གོང་ས་མཆོག་ལ་མཚན་སྨད་ཞུ་མཁན་གཉིས་རང་རེད་།
གཅིག་ནི་རྒྱ་གུང་བྲན་དང།གཉིས་པ་གུང་བྲན་རྒྱུགས་ཁྱི་དོལ་ཚོགས་ཀླད་ཆུང་ཉུང་ཤས་རེད། ཁག་མེད་ཉིན་ རེའི་འཚོ་བ་དང་ཐུག་ཡོད། ༧གོང་ས་མཆོག་ལ་མཚན་སྨད་ཞུས་ནས་འཚོ་བ་སྐྱེལ་གྱི་ཡོད་སྟབས་་་དེ་ཡང་༧གོང་ས་མཆོག་གི་བཀའ་
དྲན་རེད།
༅༅། སྲིད་སྐྱོང་མཆོག་ནས་སྤྱི་འཐུས་གྲོས་ཚོགས་སུ་གསུང་བཤད་ཡག་པོ་ཞིག་གནང་སོང།
ཐུགས་རྗེ་ཆེ་ཞུ་འདོད་བྱུང།
སྲིད་སྐྱོང་མཆོག་གི་གསུང་བཤད་འདི་ཕེབས་པར། ༧གོང་ས་༧སྐྱབས་མགོན་རིན་པོ་ཆེའི་སྐུ་ཕྱཱ་དང་ཁོང་གི་བཀའ་དྲིན་ཐུགས་ལ་བརྣག་པའི་སྤྱི་ཁག་ཅིག་གིས་རྒྱག་གཅིག་འཆོང་གཅིག་གིས་རྣོ་ངར་ལྡན་པའི་གཏམ་བཤད་དེ་ཚོ་ཉན་པས་སྤྲོ་བ་ཆེ།