བོད་ཀྱི་གཞུང་འབྲེལ་མིན་པའི་ཚོགས་པ་བཞིའི་སྤྱི་ལྷན་གྱི་དཀའ་རྙོག་སེལ་ཐབས་དང་འབྲེལ་བའི་ལས་རིམ་ལ་ནུས་པ་ཐོན་ཐབས་མེད་པའི་གནས་སྟངས་ཤེས་གསལ་ལ་བརྟེན་ནས་ད་ནས་བཟུང་སྤྱི་ལྷན་གྱི་དཀའ་རྙོག་དང་འབྲེལ་བའི་རེ་སྐུལ་གྱི་ལས་རིམ་མཚམས་འཇོག་ཞུ་རྒྱུ་ཡིན་འདུག
དེ་རིང་སྔ་དྲོ་ཆུ་ཚོད་ ༡༡ སྟེང་དྷ་ས་བོད་ཀྱི་ནོར་བུ་གསོལ་མགྲོན་ཁང་དུ། བོད་ཀྱི་གཞུང་འབྲེལ་མ་ཡིན་པའི་ཚོགས་པ་བཞི་ཡིས་གསར་འགོད་ལྷན་ཚོགས་ཤིག་བསྐོངས་ཏེ། ཟླ་འདིའི་ཕྱི་ཚེས་ ༤ ཉིན་ནས་ཚོགས་པ་བཞི་ཡིས་སྤེལ་བའི་བོད་མི་མང་སྤྱི་ལྷན་གྱི་དཀའ་རྙོག་སེལ་ཐབས་ཀྱི་ལས་རིམ་ལ་ནུས་པ་ཐོན་ཐབས་མེད་པ་ཤེས་གསལ་བྱུང་བར་བརྟེན། དེ་རིང་ནས་གཞུང་འབྲེལ་མིན་པའི་ཚོགས་པ་བཞི་ཡིས་བོད་མི་མང་སྤྱི་ལྷན་གྱི་དཀའ་རྙོག་སེལ་ཐབས་དང་འབྲེལ་བའི་རེ་སྐུལ་གྱི་ལས་རིམ་མཚམས་འཇོག་ཞུ་རྒྱུ་ཡིན་པ་ཡོངས་བསྒྲགས་གནང་སོང་།
ཚོགས་པ་བཞི་ཐུན་མོང་གི་ཡོངས་ཁྱབ་བསྒྲགས་གཏམ་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་དང་ལམ་སྟོན་བཟང་པོའི་འོག བོད་མི་མང་ལ་མང་གཙོ་གསོལ་རས་གནང་སྟེ། མི་ལོ་དྲུག་ཅུའི་རིང་གཡས་སྐྱོར་གཡོན་སྐྱོར་གྱིས་གཟིགས་སྐྱོང་མཛད་པའི་ཡང་དག་པའི་མང་གཙོའི་སྒྲིག་འཛུགས་འདི། ད་ལྟའི་ཆར་ལྗིད་མཉམ་སྟངས་འཛིན་གྱི་སྒྲོམ་གཞི་སྦོ་ལུག་ནས། སྐབས་ ༡༧ པའི་སྤྱི་འཐུས་གྲོས་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་སོགས་གྲོས་ཚོགས་ཀྱི་ལས་རིམ་ཡོངས་རྫོགས་འགྲོ་མ་ཐུབ་པའི་གནས་སྟངས་ཐབས་སྡུག་བྱུང་ཡོད་པ་དང་། དེ་ལ་བརྟེན་ནས་བོད་མི་ཡོངས་ཀྱི་ལྟ་བའི་མིག་དང་ཁོག་པའི་སྙིང་ལྟ་བུ་བོད་མིའི་བླ་ན་མ་མཆིས་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་དགོངས་འཁྲུག་གཞི་དང་། གཞིས་བཞུགས་བོད་མི་རྣམས་ཀྱི་སྙིང་སྟོབས་དང་སེམས་ཤུགས་ཉམས་དམས་སུ་འགྲོ་གཞི། དེ་བཞིན་བཙན་བྱོལ་བོད་མི་ནང་ཁུལ་གྱི་མཐུན་སྒྲིལ་ལ་དོ་ཕོག་འགྲོ་གཞི་བཅས་ཀྱིས་སེམས་འཚབ་ཡོད་པར་སོང་ཡོད་སྐོར་དང་། བོད་མི་རིགས་ཀྱི་རྩ་དོན་འཐབ་རྩོད་དང༌། བོད་མིའི་མང་གཙོའི་གཞུང་འདི་ལ་ཤ་ཞེན་དང་སེམས་འཁུར་ཡོད་པའི་བོད་མི་ཡོངས་ལ་ཟས་བཅུད་གཉིད་བྲལ་གྱི་སེམས་ནང་བཟོད་ཐབས་བྲལ་བའི་ཧ་ཅང་བློ་འཚབ་ཡོད་པ་བཞིན། ངེད་ཅག་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་བཞིའི་ཚོགས་པ་སོ་སོའི་དམིགས་ཡུལ་དམ་བཅའ་གཞིར་བཞག་ཐོག་གཞན་གྱི་གནོན་ཤུགས་དང་བརྒྱུད་སྐུལ་ཕྱོགས་ལྷུང་སོགས་ཀྱི་དབང་དུ་མ་སོང་བར་དྲང་ཚུགས་བརྟན་པོའི་ཐོག དབུས་རྒྱུན་རྣམ་ནས་སྤྱི་དོན་ཁོ་ནར་བསམ་ཞིབ་དང་འགན་འཁུར་གྱིས་གང་དགའ་ཅི་ལེགས་ཀྱི་གོ་བསྡུར་སྔ་ཕྱི་རིམ་ཞུས་བྱས་ཡོད།
དམིགས་བསལ་ཕྱི་ལོ་ ༢༠༡༩ ལོ་ནས་རྒྱ་ནད་ཏོག་དབྱིབས་ནད་ཡམས་ཀྱི་རྐྱེན་པས་རྒྱ་གཞུང་ལ་རྒྱལ་སྤྱིའི་ཁྱོན་ཡོངས་ནས་གནོན་ཤུགས་སྤྲོད་བཞིན་པའི་དུས་སྐབས་དང་། འདི་ལོ་རྒྱ་ནག་དམར་ཤོག་ཚོགས་པ་བཙུགས་ནས་ལོ་ ༡༠༠ འཁོར་བའི་དུས་ཆེན་ཟེར་བ། བོད་རང་སྐྱོང་ལྗོངས་དབུ་བརྙེས་ནས་ལོ་ ༧༠ འཁོར་བའི་དུས་ཆེན་ཟེར་བ་སོགས་ལ་ཁ་གཡར་ནས། ད་ལྟའི་ཆར་རྒྱ་དམར་གཞུང་གིས་བོད་ནང་བོད་མི་གང་བྱུང་འཇུ་བཟུང་བཙན་འཁྲིད་ཀྱིས་རིག་གནས་གསར་བརྗེ་གཉིས་པ་ལྟ་བུའི་ཛ་དྲག་གི་གནས་སྟངས་སྔར་ལས་ཇེ་ཆེར་འགྲོ་བཞིན་པ་ཙམ་དུ་མ་ཟད། དགུན་དུས་རྒྱལ་སྤྱིའི་ཨོ་རྩལ་རྩེད་འགྲན་རྒྱ་ནག་གི་རྒྱལ་ས་པེ་ཅིང་དུ་ཚོགས་གཏན་ཁེལ་བ་སོགས་ཀྱི་གནས་སྟངས་ལ་བརྟེན་ནས་བོད་དོན་ལས་འགུལ་སྔར་ལྷག་སྤེལ་དགོས་པའི་སྐབས་འདིར། ང་ཚོ་བོད་མི་ནང་ཁུལ་ཕན་ཚུན་ཤོག་ཁག་སྒྲིལ་རེས་དང་ཚིག་རྩོད་བྱེད་རེས་ལ་དབུ་འཁོར་ནས་སྡོད་ཐབས་ཡེ་ནས་མེད་པར་གཙོ་ཆེ་བོད་དོན་བདེན་མཐའ་གསལ་ཐབས་ཆེད་རྩ་དོན་འཐབ་རྩོད་ཀྱི་ལས་འགུལ་རྒྱུན་སྐྱོང་དང་། ཆོལ་གསུམ་རྡོག་རྩ་གཅིག་སྒྲིལ་གནང་དགོས་པའི་འགན་འཁྲི་མི་མང་གི་འོས་འདེམས་ཞུས་པའི་དབུ་ཁྲིད་ཚོར་ཡོད་པ་གཡོལ་ཐབས་མེད་པ་ཞིག་ཡིན་པར་བརྟེན། བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་མང་གཙོའི་གཞུང་འདི་བཞིན་རྒྱུན་གནས་ཡོང་བའི་ཆེད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་དང་། འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་ཐབས་སུ། ཚོགས་པ་བཞིས་ཕྱི་ལོ་ ༢༠༢༡ ཟླ་ ༨ ཚེས་ ༤ ཉིན་དོན་ཚན་གསུམ་ཅན་གྱི་རེ་སྐུལ་ཞིག་གསར་འགོད་ལྷན་ཚོགས་བརྒྱུད། འབྲེལ་ཡོད་ཕྱོགས་ཚང་མས་སྤྱི་དོན་ལ་དགོངས་བཞེས་ཀྱི་ནང་ཁུལ་ལེ་འགྲིག་ཅིག་གནང་སྐྱོང་ཡོང་བའི་རེ་སྐུལ་ནན་ཞུ་བྱས་ཀྱང་། ངེད་ཅག་གིས་སྟོན་པའི་རེ་སྐུལ་ལ་ནུས་བ་ཐོན་ཐབས་མེད་པའི་གནད་དོན་ཤེས་གསལ་བྱུང་བར་བརྟེན། དེ་རིང་ནས་རེ་སྐུལ་དེ་དག་དང་འབྲེལ་པའི་ལས་རིམ་མཚམས་འཇོག་ཞུ་རྒྱུ་ཡིན། ཞེས་བཀོད་འདུག
མཇུག་ཏུ་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་བཞི་པོ་སོ་སོའི་དམིགས་ཡུལ་གལ་འགངས་ཆེ་ཤོས་ནི་སྤྱི་ནོར་༧གོང་ས་ྋསྐྱབས་མགོན་ཆེན་པོ་མཆོག་གི་དབུ་འོག་དཔུང་འདེགས་དང་ྋརྒྱལ་བའི་༧སྐུ་ཕྱྭའི་ཉེན་སྲུང་བཅས་ཀྱི་འགན་འཁུར་ཞུ་རྒྱུ་དང་། བོད་དོན་བདེན་མཐའ་གསལ་ཐབས་ཆེད་བོད་མིའི་རྩ་དོན་འཐབ་རྩོད་ལས་འགུལ་རྒྱུན་སྐྱོང་སྤེལ་རྒྱུའི་ཆོད་སེམས་བརྟན་པོའི་ཐོག ད་ལྟའི་བོད་ནང་གི་ཛ་དྲག་གནས་སྟངས་ཆེད་ལས་འགུལ་སྔར་ལྷག་སྤེལ་རྒྱུ་ལགས་ན། རྒྱ་ཆེའི་ཆོལ་གསུམ་བོད་རིགས་སྤུན་ཟླ་ཡོངས་རྫོགས་ཟློག་རྩ་ཆིག་སྒྲིལ་གྱིས་རྩ་དོན་ཆེད་སྔར་ལྷག་མཉམ་ཞུགས་དང་མདུན་བསྐྱོད་གནང་སྐྱོང་ཡོང་བའི་འབོད་སྐུལ་ནན་ཏན་ཞུ་ཡི་ཡོད་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རྒྱུ་མཚན་གསལ་བཤད་མེད་པ་མཁྱེན་མཚར་མ་རེད་དམ།
མདོ་སྟོད་དང་ཆོས་ལུགས་སྤྱི་འཐུས་སོགས་ནས་གསན་འཇོག་མེད་པ་ཡིན་ན་དེ་ལྟར་གསལ་དགོས་གནད་ཀྱང་མེད་པས་དེ་མིན་གནས་དོན་གཞན་ལས་ཡིན་སྲིད་པ་ངས་གལ་གནད་ཀྱི་རིམ་འགོད་འགའ་ཤས་ཞུས་ན།
༡༽ ཚོགས་འཐུས་ཁོངས་ནས་ངན་པ་ལག་འབྲེལ་ཡོད་སྲིད་པའི་མི་མང་བསམ་འཆར་དེ་དག་ལག་ཟིན་ནམ་དོག་གཞི་ལས་ནང་ཁུལ་སྤྱི་མཐུན་མེད་པས་ཁ་གྱེལ་ལམ།
༢༽བཅའ་ཁྲིམས་ལྟར་མིན་པའི་ལས་འཆར་ལ་མི་མང་ངོས་ལེན་མེད་པའི་གནད་དོན་ལས་ཡིན་ནམ།
༣༽ཚོགས་སོ་སོའི་ཚོགས་མི་ཁག་ནས་དམིགས་ཡུལ་བཅའ་ཁྲིམས་གཞི་བཟུང་མེད་ཁར་ཚོགས་པ་ནང་ཁུལ་ཡིད་ཆེས་དཀའ་གནས་ལས་ཕྱིར་འཐེན་དགོས་པའི་བསམ་ཚུལ་ལས་མཚམས་འཇོག་ཞུ་དགོས་བྱུང་ཡོད་དམ།
དེ་མིན་རྒྱབ་ཟིན་པའི་མདའ་མོ་ཕྱིོར་སྡུ་དགོས་དོན་མེད་དགོས་མ་རེད་དམ།
འཇོན་གྱིས་མེད་ན་བཞག་ཞོག