བསོད་ནམས་རྡོ་རྗེ་ལགས་ཀྱིས་ཚོགས་དྲུང་ལས་ཁུངས་ཀྱི་དྲུང་ཆེའི་ལས་ཁུར་དབུ་འཛུགས་གནང་།

ཕྱི་ཟླ་ ༡ ཚེས་ ༡༩ ཉིན་བདེ་སྲུང་ལས་ཁུངས་ཀྱི་དྲུང་འཕར་བསོད་ནམས་རྡོ་རྗེ་ལགས་ཚོགས་དྲུང་ལས་ཁུངས་ཀྱི་དྲུང་ཆེར་བསྐོ་གཞག་བྱུང་ཡོད་པ་ལྟར་དེ་རིང་ནས་དངོས་སུ་ལས་ཁུར་དབུ་འཛུགས་ཞུས་ཡོད་པ་རེད།

ཕྱི་ཟླ་ ༡ ཚེས་ ༡༩ ཉིན་བདེ་སྲུང་ལས་ཁུངས་ཀྱི་དྲུང་འཕར་བསོད་ནམས་རྡོ་རྗེ་ལགས་ཚོགས་དྲུང་ལས་ཁུངས་ཀྱི་དྲུང་ཆེར་བསྐོ་གཞག་བྱུང་ཡོད་པ་ལྟར། ཕྱི་ཟླ་ ༢ ཚེས་ ༢༨ ཉིན་གསར་དུ་བསྐོ་གཞག་བྱུང་བའི་བོད་མི་མང་སྤྱི་འཐུས་ཚོགས་དྲུང་ལས་ཁུངས་ཀྱི་དྲུང་ཆེ་བསོད་ནམས་རྡོ་རྗེ་ལགས་དང་དྲུང་ཚབ་དང་དྲུང་འཕར་ཚེ་བརྟན་སྐལ་བཟང་ལགས་གཉིས་བར་རྩིས་སྤྲོད་རྩིས་ལེན་གྲུབ་པ་དང་བསྟུན། བསོད་ནམས་རྡོ་རྗེ་ལགས་ནས་ཚོགས་དྲུང་གི་ལས་ཁུར་དངོས་སུ་དབུ་འཛུགས་ཞུས་ཡོད་པ་རེད།

གསར་དུ་བསྐོ་གཞག་བྱུང་བའི་ཚོགས་དྲུང་ཆེན་མོ་བསོད་ནམས་རྡོ་རྗེ་ལགས་ནི། ཕྱི་ལོ་ ༡༩༦༧ ཟླ་ ༩ ཚེས་ ༡༡ ཉིན་ལྷ་ས་ཉག་རོ་ཁང་སེར་དུ་འཁྲུངས་ཤིང་། ཕྱི་ལོ་ ༡༩༩༣ ཟླ་ ༦ ཚེས་ ༡༥ ཉིན་དྲུང་ལས་གནས་རིམ་ཐོག་ཆོས་རིག་ལས་ཁུངས་སུ་ཚོད་ལྟའི་ལས་བྱེད་དུ་བསྐོ་གཞག་དང་། ལོ་དེའི་ཟླ་ ༨ ཚེས་ ༢ ཉིན་གནས་རིམ་རང་འཇགས་ཐོག་ལས་བྱེད་འདེམས་བསྐོ་ལྷན་ཁང་གི་ཚོད་ལྟའི་ལས་བྱེད་དུ་གནས་སྤོས་བསྐོ་གཞག ཕྱི་ལོ་ ༡༩༩༤ ཟླ་ ༤ ཚེས་ ༢༥ ཉིན་ལས་བྱེད་འདེམས་བསྐོ་ལྷན་ཁང་གི་དྲུང་ལས་གནས་རིམ་ཐོག་ལས་བྱེད་ངོ་མར་བསྐོ་གཞག་བྱུང་། ཕྱི་ལོ་ ༡༩༩༧ ཟླ་ ༥ ཚེས་ ༡ ཉིན་དྲུང་གཞོན་གནས་རིམ་དུ་གནས་སྤར་དང་ལས་འགན་རང་འཇགས། ཕྱི་ལོ་ ༡༩༩༨ ཟླ་ ༡༠ ཚེས་ ༢༦ ཉིན་ནས་ལོ་གཉིས་རིང་ཕོགས་མེད་སློབ་སྦྱོང་དུ་བསྐྱོད་པ་དང་། ཕྱི་ལོ་ ༢༠༠༠ ཟླ་ ༨ ཚེས་ ༡༦ ཉིན་ནས་མུ་མཐུད་ལས་བྱེད་འདེམས་བསྐོ་ལྷན་ཁང་གི་དྲུང་གཞོན། ཕྱི་ལོ་ ༢༠༠༢ ཟླ་ ༨ ཚེས་ ༡ ནས་ཐེ་ཝན་སྐུ་ཚབ་དོན་ཁང་གི་དྲུང་གཞོན་དང་། ཟུང་དྲུང་། དྲུང་འཕར་བཅས་ཀྱི་གནས་རིམ་ཐོག་རིམ་པས་ཕྱག་ལས་གནང་། ཕྱི་ལོ་ ༢༠༢༡ ཟླ་ ༡༡ ཚེས་ ༡ ཉིན་བདེ་སྲུང་ལས་ཁུངས་ཀྱི་དྲུང་འཕར་དུ་བསྐོ་གཞག ཕྱི་ལོ་ ༢༠༢༢ ཟླ་ ༡ ཚེས་ ༡༩ ཉིན་ཚོགས་དྲུང་ལས་ཁུངས་ཀྱི་དྲུང་ཆེར་བསྐོ་གཞག་གནང་ཡོད་འདུག

གསར་འགོད་པ། སྐལ་བཟང་སྦྱིན་པ།