ང་ཚོས་ད་དུང་ཡང་འགན་འཁུར་རྣམས་ྋགོང་ས་མཆོག་གི་སྐུའི་ཕྲག་ཐོག་ལ་མི་གཡུགས་པར། ཚང་མས་རྩ་དོན་ཐོག་འགན་འཁུར་སྔར་ལྷག་འཁྱེར་དགོས་པས། གཞོན་ལྷན་ནས་ཀྱང་གཞུང་འབྲེལ་མ་ཡིན་པའི་སྒྲིག་འཛུགས་ཤིག་གི་ངོས་ནས་བོད་རྒྱལ་ཁབ་དང་གངས་ཅན་པའི་མདུན་ལམ་ཐད། སྔར་ལྷག་འགན་འཁུར་བསྒྲུབ་རྒྱུའི་དམ་བཅའ་ཞུ་རྒྱུ་ཡིན་ཟེར།
ཟླ་འདིའི་ཕྱི་ཚེས་ ༡༤ ཉིན་༸གོང་ས་མཆོག་གིས་གྲོས་ཚོགས་ལ་མང་གཙོ་མདུན་སྐྱོད་དང་། བོད་དོན་སྲ་བརྟན་ཕུགས་འཕེར་བཟོ་ཆེད་གསུང་འཕྲིན་ཕེབས་ཡོད་པའི་ཐད། བོད་ཀྱི་གཞོན་ནུ་ལྷན་ཚོགས་ཀྱིས་སྐབས་བཅུ་བཞི་བའི་སྤྱི་འཐུས་གྲོས་ཚོགས་ཚོགས་དུས་བཅུ་གཅིག་པའི་སྟེང་ལ་གསལ་འདེབས་ཀྱི་སྙན་ཞུ་ཞིག་ཕུལ་ཡོད་འདུག སྙན་ཞུའི་ནང་བསྟན་དོན། སྤྱིར་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་ྋརྒྱལ་དབང་སྐུ་ཕྲེང་རིམ་བྱོན་ནི། བོད་རྒྱལ་ཁབ་དང་བོད་མི་རིགས་ལ་ཧ་ཅང་བཀའ་དྲིན་ཆེན་པོ་ཡིན་པ་མ་ཟད། ལྷག་པར་དགྲ་བོ་རྒྱ་ནག་གིས་བོད་རྒྱལ་ཁབ་ཏུ་བཙན་འཛུལ་གྱི་དུས་ངན་དཀའ་སྡུག་ཁྲོད། ྋརྒྱལ་དབང་སྐུ་ཕྲེང་བཅུ་བཞི་པ་མཆོག་དགུང་གྲངས་ ༡༦ ལས་སོན་མེད་ཀྱང༌། ཐུགས་བསྐྱེད་བཙན་པོས་བོད་རྒྱལ་ཁབ་ཆེན་པོའི་ཆོས་སྲིད་ཟུང་གི་མཛད་འགན་ལྕི་མོ་ཕྲག་ཏུ་བཞེས་ཏེ། བོད་འབངས་ཡོངས་རིས་མེད་ཀུན་སྙོམ་ཆེན་པོས་བྱམས་ཀྱིས་བསྐྱངས་ཤིང༌། བཙན་བྱོལ་དུ་ཕེབས་རྗེས་ཆ་རྒྱུས་དང་བདེན་རྒྱབ་མེད་པའི་གཞན་ཡུལ་དུ་བོད་མི་ཁྲི་ཚོ་དུ་མའི་འཚོ་ཐབས་དང་བོད་དོན་བདེན་རྒྱབ་གསར་འཚོལ། གཞིས་ཆགས་ཁག་གསར་འཛུགས། དེ་བཞིན་བོད་ཀྱི་རིག་གཞུང་གི་ལྟེ་གནས་དགོན་སྡེ་གྲྭ་ཚང་དང༌། སློབ་གྲྭ་གསར་སྐྲུན་གྱིས་བོད་ཕྲུག་རྣམས་འདབ་ཤོག་གཉིས་ལྡན་ཅན་དུ་གསོ་སྐྱོང༌། ལྷག་པར་ཡུན་རིང་ཁ་འཐོར་དུ་ཕྱིན་པའི་གངས་ཅན་པ་རྣམས་ཆོས་སྲིད་གཉིས་ཐད་ནས་ཚད་མཐོའི་ཆིག་སྒྲིལ་རང་བཞིན་དུ་དབུ་ཁྲིད་དང༌། བཙན་འཛུལ་བའི་མཐའ་འབུད་དང་གཞན་ཡུལ་གྱི་དཀའ་སྡུག་ཁྲོད་ནས་བོད་ཀྱི་དམངས་གཙོའི་ལམ་བཟང་གསོལ་སྩལ་གྱིས་གོམ་པ་རིམ་བགྲོད་མདུན་སྐྱོད་གནང་བ་སོགས། མདོར་ན། བོད་ཤི་གསོན་གྱི་མཚམས་ནས་མྱུར་སྐྱོབ་སྣེ་འཁྲིད་གནང་བའི་བཀའ་དྲིན་ནི་གངས་ཅན་པའི་བྱུང་རབས་ནང་སྔར་མ་གྲགས་པའི་ངོ་མཚར་ཅན་གྱི་མཛད་བཟང་ཞིག་དང༌། ནམ་ཡང་ང་ཚོས་བརྗེད་དུ་མི་རུང་བ་ཞིག་ལགས་པ་མ་ཟད། ངེད་བོད་འབངས་རྣམས་ལ་ྋགོང་ས་སྐྱབས་མགོན་ཆེན་པོ་མཆོག་ལས་ལྷག་པའི་དབུ་ཁྲིད་ཅིག་ནམ་ཡང་བརྙེད་དུ་མེད། ཅེས་དང་། ཡང་སྙན་ཞུའི་ནང་། གསུང་འཕྲིན་རིན་པོ་ཆེའི་ནང༌། མདོ་དོན་མང་གཙོའི་ལམ་སྲོལ་གྱི་ངོ་བོའམ་སྙིང་དོན་མཐར་ཐུག་ཆབ་སྲིད་དང་འཛིན་སྐྱོང་གི་ལས་དོན་གང་ཡང་མི་བྱེ་བྲག་པ་གཅིག་ལ་བརྟེན་མི་དགོས་པར། མི་མང་གི་ཆེད་དུ་མི་མང་གིས་བདམས་པའི་མི་མང་གི་འགོ་ཁྲིད་རིམ་པས་མི་མང་གི་འགན་འཁུར་ཆ་ཚང་ཐུབ་པ་བྱེད་རྒྱུ་དེ་ཡིན་སྟབས། ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་འཁུར་མ་དགོས་པར་མི་མང་གིས་འོས་འདེམས་བྱས་པའི་འགོ་འཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་འཁུར་བྱེད་པའི་དུས་ལ་བབས་ཡོད། ཞེས་དང༌། བོད་དོན་བདེན་མཐའ་མ་གསལ་བར་བཙན་བྱོལ་བོད་མིའི་སྒྲིག་འཛུགས་འདི་རྒྱུན་གནས་ཐུབ་པ་དང༌། བོད་མིའི་དྲང་བདེན་གྱི་འཐབ་རྩོད་རྒྱུན་སྐྱོང་ཐུབ་པ་ཞིག་དགོས་གལ་ཤིན་ཏུ་ཆེ་ཞིང༌། ཅི་སྟེ་ད་དུང་ལོ་བཅུ་ཕྲག་འགའ་ཤས་མུ་མཐུད་གནས་དགོས་པ་བྱུང་ན་ངོས་ནས་འགོ་འཁྲིད་བྱེད་མ་ཐུབ་པའི་དུས་ཤིག་ངེས་པར་ཡོང་རྒྱུ་ཡིན་པ་ནི་ཚང་མས་ཤེས་གསལ་དང༌། ད་ལྟ་ངོས་རང་བདེ་ཐང་ཡོད་སྐབས་ནས་བཙན་བྱོལ་བོད་མིའི་སྒྲིག་འཛུགས་ཀྱི་འགན་འཁུར་ཆ་ཚང་ྋརྒྱལ་བ་རིན་པོ་ཆེར་བརྟེན་མི་དགོས་པར་རང་ཚུགས་ཐུབ་པ་ཡོང་རྒྱུའི་གོམས་གཤིས་འཇགས་ཐབས་སུ། ལམ་སྲོལ་འདི་ད་ལྟ་ནས་ལག་བསྟར་བྱེད་རྒྱུ་བྱུང་ན་དཀའ་ངལ་འཕྲད་ཚེ་སེལ་ཐབས་སུ་ངོས་ཀྱིས་མཐུན་འགྱུར་བྱེད་ཐུབ། དེ་མིན་འདི་མུར་ལུས་ཏེ་ནམ་ཞིག་གློ་བུར་ངོས་ཀྱི་འགོ་འཁྲིད་མེད་པའི་དུས་སྐབས་ཤར་ཚེ་ཅི་བྱ་གཏོལ་མེད་ཀྱི་གནས་ཚུལ་ཞིག་ཡོང་སྲིད་པས། དེ་འདྲ་མི་ཡོང་ཆེད་ད་ལྟ་ནས་ངེས་པར་ལག་ལེན་བྱེད་དགོས་པ་དེ་བོད་མི་ཡོངས་ཀྱི་གལ་ཆེའི་ལས་འགན་ཞིག་ཏུ་གྱུར་ཡོད། ཅེས་དང༌། བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ། བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས། ཞེས་དང༌། དེ་བཞིན་གསུམ་བཅུའི་དུས་དྲན་ཐེངས་ང་གཉིས་པའི་ཐོག་བསྩལ་བའི་གསུང་འཕྲིན་ནང༌། ངོས་ཀྱི་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་འཁུར་བྱེད་འདོད་མེད་པའམ། སེམས་ཤུགས་ཆག་པ། བོད་མིའི་བདེན་དོན་གྱི་འཐབ་རྩོད་བློས་བཏང་བ་བཅས་གཏན་ནས་མིན་པར། བོད་མི་རིགས་ཀྱི་འཕྲལ་ཕུགས་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན་ཞེས་བཀའ་གསལ་མཐའ་ནན་དུ་ཕེབས་པ་བཅས་ནི། ཕ་བཟང་པོས་བུ་ལ་མགོ་འདོན་རེ་བཅོལ་གནང་བ་ལྟར། མགོན་པོ་མཆོག་བོད་འབངས་རྣམས་ལ་སྙིང་ནས་བརྩེ་བའི་རླབས་ཆེའི་དགོངས་གཞི་ཟབ་མོ་ཞིག་སྟེ། མདོར་ན། མགོན་པོ་མཆོག་གིས་མི་མང་དང་མི་མང་གིས་བདམས་པའི་བཀའ་བློན་ཁྲི་པ་དང་སྤྱི་འཐུས་ལྷན་ཚོགས་ལ་དམངས་གཙོ་མདུན་སྐྱོད་དང༌། འཐབ་རྩོད་ཀྱི་འགན་འཁུར་ཐད་རང་འགན་རང་འཁུར་དགོས་པའི་ཐུགས་རེ་དང༌། ལམ་སྟོན་ཟབ་མོ་ཞིག་སྟེ། ལོ་རྒྱུས་རང་བཞིན་གྱི་མདུན་སྐྱོད་དང་འགྱུར་བ་རླབས་ཆེན་ཞིག་ལགས་པས། ང་ཚོས་ད་དུང་ཡང་འགན་འཁུར་རྣམས་ྋགོང་ས་མཆོག་གི་སྐུ་ཕྲག་ཐོག་མ་གཡུགས་པར། ཚང་མས་རྩ་དོན་ཐོག་འགན་འཁུར་སྔར་ལྷག་འཁྱེར་དགོས་པས། གཞོན་ལྷན་ནས་ཀྱང་གཞུང་འབྲེལ་མ་ཡིན་པའི་སྒྲིག་འཛུགས་ཤིག་གི་ངོས་ནས་བོད་རྒྱལ་ཁབ་དང་གངས་ཅན་པའི་མདུན་ལམ་ཐད། སྔར་ལྷག་འགན་འཁུར་བསྒྲུབ་རྒྱུའི་དམ་བཅའ་ཞུ་རྒྱུ་ཡིན་ཞིང༌། གྲོས་ཚོགས་འཐུས་མི་རྣམ་པས་ཀྱང་དམངས་གཙོ་མདུན་སྐྱོད་དང༌། བོད་གཞུང་དང་བོད་དོན་འཐབ་རྩོད་སྲ་བརྟན་གོང་འཕེལ་སོགས། བོད་ཀྱི་མ་འོངས་པར་འགན་འཁུར་བའི་ཐོག་ནས་ྋགོང་ས་མཆོག་གི་གསུང་འཕྲིན་རིན་པོ་ཆེའི་དགོངས་དོན་བཞིན། ཚོགས་དུས་འདིའི་ཐོག་ནས་བརྒྱུད་རིམ་དང༌། འཆར་གཞི་རང་བཞིན་གྱི་ཐག་གཅོད་ངེས་གནང་ཡོང་བའི་འབོད་སྐུལ་གསལ་འདེབས་ཞུ་རྒྱུ་ཡིན། ཞེས་འཁོད་ཡོད་པར་མ་ཟད།
ྋགོང་ས་མཆོག་ཕྱེད་བགྲེས་ཡོལ་དང་བགྲེས་ཡོལ་ཆ་ཚང་གང་ཞིག་གནང་ཡང༌། དུས་གཏན་དུ་མགོན་པོ་མཆོག་བོད་རྒྱལ་ཁབ་དང་གངས་ཅན་པའི་སེམས་དབུས་ཀྱི་བླ་ན་མེད་པའི་དབུ་ཁྲིད་ལགས་ཤིང༌། ྋརྒྱལ་དབང་རིམ་བྱོན་ནི། གངས་ཅན་པར་འདས་པའི་བྱུང་རབས་ནང་བཀའ་དྲིན་ཧ་ཅང་ཆེ་བ་བཞིན། མ་འོངས་པར་ཡང་ྋརྒྱལ་དབང་རིམ་ཕེབས་ཀྱིས་བོད་འབངས་རྣམས་ཚེ་རབས་རྗེས་འཛིན་དགོས་པ་ནི། ངེད་གངས་ཅན་པའི་ལས་སྨོན་བཟང་པོ་ཞིག་དང༌། ང་ཚོའི་འགྱུར་བ་མེད་པའི་རྟག་བརྟན་གྱི་རེ་སྨོན་དེ་ཡིན་པ་གསོལ་འདེབས་དང་ནན་བརྗོད་ཞུ་རྒྱུ་ཡིན། ཞེས་གྲོས་ཚོགས་སུ་སྙན་ཞུ་ཕུལ་ཡོད་པ་རེད།
བོད་ཀྱི་གཞོན་ནུ་ལྷན་ཚོགས་ཀྱིས་ལོ་ཤས་གོང་ནས་༸གོང་ས་མཆོག་གིས་ཕྱེད་བགྲེས་ཡོལ་དང་བགྲེས་ཡོལ་ཆ་ཚང་གནང་རྒྱུའི་བཀའ་ཡང་ཡང་ཕེབས་པའི་ཐད། ཕྱེད་བགྲེས་ཡོལ་ལས་དེ་མིན་བགྲེས་ཡོལ་མི་མཛད་པ་མཁྱེན་ཞེས་མཚན་འཁོད་སྙན་ཞུ་ཕུལ་ཡོད་པ་དང་། ཐེངས་འདིར་བོད་མི་མང་སྤྱི་འཐུས་ལྷན་ཚོགས་དང་སྐུར་སྒེར་ཡིག་ཚང་། བཀའ་ཤག་ལྷན་རྒྱས་བཅས་ལ་སྙན་ཞུ་ཕུལ་ཏེ། ྋགོང་ས་མཆོག་གི་གསུང་འཕྲིན་རིན་པོ་ཆེའི་དགོངས་དོན་བཞིན། ཚོགས་དུས་འདིའི་ཐོག་ནས་བརྒྱུད་རིམ་དང༌། འཆར་གཞི་རང་བཞིན་གྱི་ཐག་གཅོད་ངེས་གནང་ཡོང་བའི་འབོད་སྐུལ་གསལ་འདེབས་ཞུས་ཡོད་པ་རེད།
གསར་འགོད་པ། དོན་གོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
༸གོང་ས་མཆོག་བགྲེས་ ཡོལ་དུ་འདོད་མཁན་ཤོག་ཁག་གཉིས་འདུག་སྙམ།
གཅིག་ནི། བཙན་བྱོལ་སྤྱི་ཚོགས་ས་བརྟན་སླད་དུ་དང་། ༸གོང་ས་མཆོག་མཛད་འཕྲིན་སྔར་ལྷག་ཏུ་རྒྱས་པའི་ཆེད་དུ་སྟེ། ང་ཡང་དེ་ལྟར་བསམས་ཤིང་རེ་བཞིན་ཡོད།
ཡང་ཤོག་ཁག་གཅིག་ནི། དམར་གཞུང་ལྟར། སྤྱི་ཚོགས་རྙིང་པ་དང་། དེའི་རྒྱུན་དང་བཅས་པ་མི་དགའ་ཞིང་། མཐོ་རྒྱལ་བ་རིན་པོ་ཆེས་དབུ་འཁྲིད་པ་དང་། ཆོས་ལ་ཡང་། མི་དགའ་མཁན་རིགས་གཅིག་ཡོད། དེ་དག་གི་ལག་ཏུ་བོད་པའི་ཆབ་སྲིད་ཤོར་བ་ཡིན་ན། དེ་ནས་ག་འདྲ་ཞིག་ཆགས་འགྲོ་ཡོད་དམ་ངས་ནི། མི་ཤེས་སོ། །
གང་ལྟར་ཡང་སྤྱི་འཐུས་བཟང་ དུ་གཏོང་དགོས་པ་དང་། བཀའ་ཁྲི་འཇོན་དུ་འགྲོ་དགོས་པ་ནི། གནད་ཁག་ཆེ་ཤོས་དེ་རེད་གདའ། ༸གོང་ས་མཆོག་གི་དགོངས་དོན་ལྷུན་གྲུབ་ཤོག ། བོད་རྒྱལ་ལོ། །
ཡང་གཞོན་ནུས་ཆབ་སྲིད་ཁྲབ་སོང་ཧའ་ཧའ་དངོས་ནས་གཞོན་ནུས་རང་བཙན་ལེན་ཐབས་ཡག་པོ་རེད་འོན་ཀྱང་ཐབས་ལམ་གང་ཡང་མེད་རྒྱ་ཡི་དཔོན་རིགས་ལ་ངོ་བརྒོལ་བྱ་རྒྱུ་ཅིག་པོས་རང་བཙན་ག་ལ་ལེན་ཐུབ་ཐབས་ལམ་ཡག་པོ་ཞིག་མགོ་བརྩམས་དང་ནས་མཇུག་འཁྱོལ་བ་བྱེད་དང་རང་བཙན་དགོས་ངེས་རེད་
ད་གཞོན་ལྷན་ལ་གཏོང་རྒྱུ་ཞོག་རྒྱུ་ཡོད་ན་དུས་ལ་བབས་སོང།
རྒྱལ་ཁབ་འདྲ་མིན་ནང་དུ་གོང་ས་མཆོག་གི་སྐུ་ཡི་འཚབ་ཡོད་པ་རྣམས་བོད་གཞུང་ངམ་བཙན་བྱོལ་གཞུང་ལས་སོགས་གང་གི་སྐུ་འཚབ་དུ་ཇི་ལྟར་བསྒྱུར་ཐུབ་བམ
དང་པོ་བཙན་བྱོལ་གཞུང་ཞེས་ངོས་ལེན་བྱེད་མཁན་ཞིག་དགོས།
DALAI་་LAMA་ADMINSTRATION་
ཞེས་པའི་དོད་དུ་ཇི་ལྟར་འཇོག་དགོས་སམ།
དེ་ཚོ་ལ་དཀའ་ངལ་རིམ་པ་ཞིག་འཕྲད་སྲིད་སྙམས།