མོ་ཏཱི་ཡི་གཞུང་ལ་སྐྱོན་བརྗོད་བྱེད་པའི་ལག་ཆར་འགྱུར་རྒྱུ་རེད།

ཨ་རིར་བརྟན་གཞི་བྱེད་པའི་རྒྱ་རིགས་དམངས་གཙོ་དོན་གཉེར་བའི་ཚོགས་པ་ཞིག་དང་དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཁག་ཅིག་གིས་མཉམ་དུ་གོ་སྒྲིག་བྱེད་འཆར་ཡོད་པའི་རྒྱ་ནག་གི་དམངས་གཙོའི་སྐོར་གྱི་ཚོགས་འདུར་བཅར་མཁན་ཁག་ཅིག་གི་ཐོངས་ཆེན་རྒྱ་གར་གཞུང་གིས་ཕྱིར་འཐེན་བྱས་པ་གླེང་གཞི་ཆེན་པོ་ཆགས།

རྒྱ་གར་གྱིས་སྙན་གྲགས་ཅན་གྱི་རྒྱ་རིགས་དམངས་གཙོ་དོན་གཉེར་བ་ལུའུ་ཇིང་ཧཱ་(Lu Jinghua)དང་། ཧོང་ཀོང་དམངས་གཙོ་འཐབ་རྩོད་པ་རེས་ཝོང་(Ray Wong)གཉིས་དྷ་རམ་ས་ལར་འཚོགས་རྒྱུའི་ ༼རྒྱ་ནག་གི་དམངས་གཙོར་དམིགས་པའི་ལྷན་ཚོགས།༽(China-focussed conference on democracy) ཞེས་པའི་ཚོགས་འདུར་བཅར་རྒྱུའི་ཐོངས་མཆན་དེ་སྔོན་སྤྲད་ཟིན་པ་ཕྱིར་འཐེན་བྱས་ཡོད་པ་རེད། ཐོངས་མཆན་ཕྱིར་འཐེན་བྱས་པའི་གནས་ཚུལ་དེ་ནི་ཇར་མན་དུ་རྟེན་གཞི་བྱས་པའི་ཡུ་གུར་རང་དབང་འཐབ་རྩོད་པ་སྐུ་ཞབས་ཌོལ་ཀུན་ཨི་སཱ་(Dolkun Isa)ཡི་ཐོངས་མཆན་ཕྱིར་འཐེན་བྱས་པའི་ཉིན་ཤས་རྗེས་བྱུང་བ་ཞིག་ཡིན་པ་དང་། ཁོང་ཡང་ལྷན་ཚོགས་དེར་བཅར་འཆར་ཡོད་པ་ཞིག་རེད། རྒྱ་གར་དྷ་རམ་ས་ལའི་ཚོགས་འདུ་དེའི་དབུ་འབྱེད་གསུང་བཤད་བོད་ཀྱི་བླ་ན་མེད་པའི་དབུ་ཁྲིད་༸གོང་ས་མཆོག་གིས་གནང་འཆར་ཡོད་པ་ཞིག་རེད།

ཡུ་གུར་རང་དབང་འཐབ་རྩོད་པ་སྐུ་ཞབས་ཨི་སཱ་ནི་རྒྱ་ནག་གཞུང་གིས་དྲག་སྤྱོད་པར་ངོས་འཛིན་བྱེད་ཀྱི་ཡོད་པ་དང་། རྒྱལ་སྤྱིའི་སྐོར་སྲུང་ལྷན་ཚོགས་ Interpol ཀྱིས་དོ་སྣང་སྤྲོད་པའི་མི་ཞིག་ཀྱང་ཡིན། ལུའུ་ཇིང་ཧཱ་ནི་ ༡༩༨༩ ལོ་གནམ་སྡེ་སྒོ་མོ་ཆེར་ངོ་རྒོལ་བྱེད་སྐབས་ཀྱི་མི་སྣ་གཙོ་གྲས་ཡིན་པ་དང་། རྒྱ་གཞུང་གིས་ནག་ཉེས་ཆེ་བའི་མི་སྣར་ངོས་འཛིན་བྱེད་པའི་གྲས་སུ་ཚུད་ཡོད། ལུའུ་ཇིང་ཧཱ་ཡིས་རང་ཉིད་ཀྱི་ཐོངས་མཆན་ཕྱིར་འཐེན་བྱས་པའི་སྐོར་ཕྱི་ཟླ་ ༤ ཚེས་ ༢༥ ཉིན་ནེའུ་ཡོག་ནས་ལྡི་ལིར་ཕྱོགས་ཐོན་བྱེད་པའི་གནམ་གྲུར་སྡོད་ལ་ཉེ་བའི་སྐབས་གཞི་ནས་ཤེས་རྟོག་བྱུང་བ་ཞིག་ཡིན་སྐོར་བཤད་ཡོད། ཧོང་ཀོང་དམངས་གཙོ་འཐབ་རྩོད་པ་རེས་ཝོང་གི་ཐོངས་མཆན་ཡང་སྐབས་ཐོག་དེར་ཕྱིར་འཐེན་བྱས་ཡོད་པ་རེད།

ད་ལྟའི་ཆར་ཨ་རིའི་མི་སེར་ཆགས་ཟིན་པའི་ལུའུ་ཇིང་ཧཱ་ཡིས་ནེའུ་ཡོག་ནས་ཧིན་དྷུ་སི་ཐན་དུས་བབ Hindustan Times ཀྱི་དྲི་བར་ལན་འདེབས་གནང་སྐབས། རྒྱ་གར་གཞུང་གིས་ཁོ་མོ་རྒྱ་གར་དུ་ཐོན་ཁར་ཐོངས་མཆན་ཕྱིར་འཐེན་བྱས་པར་ཁོང་ཁྲོ་ཆེན་པོ་ལངས་སྐོར་བརྗོད་ཡོད་པ་མ་ཟད། ལོ་ན་ ༥༤ ལ་སོན་པའི་དམངས་གཙོ་འཐབ་རྩོད་པ་ལིའི་ཡིས་ཐོངས་མཆན་ཕྱིར་འཐེན་བྱས་པའི་གནད་དོན་དང་འབྲེལ་ཏེ། ཁོ་མོས་རྒྱ་གར་གཞུང་ཚབ་ནས་ཐོངས་མཆན་ཞུ་སྐབས། ལས་ཁུངས་ལོགས་ཀ་ཞིག་ཏུ་འགྲོ་སྡོད་དགོས་པ་སོགས་དོ་བདག་ལ་བརྡབ་གསིག་ཆེན་པོ་བཏང་ཚུལ་བརྗོད་དོན་ “ང་གནམ་ཐང་དུ་འཛུལ་ཡོང་བ་དང་། གནམ་གྲུའི་ནང་སྡོད་ལ་ཉེ་བའི་སྐབས། གློ་བུར་དུ་གནམ་ཐང་གི་ལས་བྱེད་ཅིག་གིས་ང་རེ་ཞིག་སྒུག་དགོས་པར་བཤད་བྱུང་།”ཞེས་བརྗོད་པ་དང་། གནམ་ཐང་གི་ལས་བྱེད་པ་དེས་རྒྱང་རིང་གི་ཁ་པར་འགའ་བཏང་རྗེས་ཁོ་མོ་གནམ་གྲུར་སྡོད་མི་ཆོག་ཚུལ་བཤད་འདུག

ལུའུ་ཡིས་བརྗོད་དོན། “ང་སྒུག་འཇུག་པའི་སྐབས། མི་རྣམས་ཀྱིས་ང་ལ་ཡ་མཚན་ངང་ལྟ་གི་འདུག སྐབས་དེར་ང་ནི་ངོ་ཚ་བ་དང་ཧོན་ཡང་འཐོར་དགོས་པ་བྱུང་། ངས་རྒྱུ་མཚན་དྲིས་ཀྱང་ལས་བྱེད་པ་དེས་ལན་འདེབས་བྱེད་ཀྱི་མི་འདུག” ཅེས་དང་། “རྒྱ་གར་གྱི་བྱེད་ལུགས་དེས་ང་ལ་བློ་ཕམ་ཆེན་པོ་བྱུང་། ཕྱི་ཟླ་ ༡ ནང་ཐའེ་ཝན་དུ་འགྲོ་སྐབས་ཀྱང་དཀའ་ངལ་དེ་འདྲ་གང་ཡང་མ་བྱུང་། རྒྱ་གར་གྱིས་ངའི་ཐོངས་མཆན་ཕྱིར་འཐེན་བྱེད་དོན་གང་ཡིན་ནམ། གལ་ཏེ་རྒྱ་ནག་གཞུང་གིས་དེ་ལྟར་བཀག་པ་ཞིག་ཡིན་ན་ངས་བསམ་ཤེས་བྱེད་ཐུབ་པ་ཞིག་རེད།” ཅེས་སོགས་བརྗོད།

རྒྱ་གར་གཞུང་འབྲེལ་ཐོག་ལུའུ་ཇིང་ཧཱ་ཡི་ཐོངས་མཆན་ཕྱིར་འཐེན་བྱེད་པའི་རྒྱུ་མཚན་ནི། ཁོ་མོའི་འབྲེལ་ཡོད་ཡིག་ཆའི་འོས་ཆོས་མ་ཚང་བ་དང་། རྒྱ་གར་དུ་ཡོང་བའི་དམིགས་ཡུལ་ཁ་གསལ་མེད་ལུགས་བརྗོད་ཡོད་པ་རེད། རེས་ཝོང་གི་གནད་དོན་དེ་ནི་ཁོ་པའི་ཡིག་ཆའི་ནང་གི་ཟླ་ཚེས་སོགས་རེའུ་མིག་ཁ་སྐོང་གསལ་པོ་མེད་ལུགས་ཀྱི་རྒྱུ་མཚན་བརྗོད་ཡོད།

རྒྱ་མཚན་དེ་དག་ལས་ཀྱང་ཐ་དད་པ་ཞིག་ནི། རང་ཉིད་ཀྱི་མིང་བརྗོད་འདོད་མེད་པའི་གཞུང་འབྲེལ་མི་སྣ་ཞིག་གིས། རྒྱ་ནག་གཞུང་ལ་རྒྱབ་གཏོད་བྱེད་མཁན་ལ་རྒྱ་གར་གཞུང་གིས་ཐོངས་ཆེན་སྤྲོད་མི་སྲིད་པ་དང་། རྒྱ་ནག་གཞུང་ལ་ངོ་རྒོལ་གྱི་ལས་གཞི་དང་འབྲེལ་བར་དབུས་གཞུང་གིས་ཐེ་ཇུས་བྱེད་པ་དེ་ནི། ལྡི་ལི་སྲིད་གཞུང་དང་པེ་ཅིན་གཞུང་གཉིས་བར་གྱི་སྲིད་ཇུས་ལ་དོ་ཕོག་འགྲོ་གཞིར་ངོས་འཛིན་བྱེད་ཀྱི་ཡོད།

“སྲིད་ཇུས་དེ་ནི་རྒྱ་དཀར་ནག་གཉིས་ཀྱིས་ལོ་མང་རིང་ལག་ལེན་བྱས་དང་བྱེད་མུས་ཤིག་ཡིན། དེའི་རྒྱུ་མཚན་གྱིས་རྒྱ་གར་ནང་གི་བཙན་བྱོལ་བོད་མིས་རྒྱ་ནག་གཞུང་ལ་ངོ་རྒོལ་བྱེད་སྐབས་ཀྱང་དམ་དྲག་ཤུགས་ཆེན་བྱེད་ཀྱི་ཡོད།” ཅེས་གཞུང་འབྲེལ་མི་སྣ་དེས་ཨེ་ཤ་ཡའི་སྟོབས་ཆེན་རྒྱལ་ཁབ་གཉིས་ཀྱི་ཚོར་རྐྱེན་རྣོ་བའི་རང་བཞིན་གྱི་གནད་དོན་དང་འབྲེལ་ལམ་སྐོར་ལ་དེ་ལྟར་བརྗོད་འདུག

གྲངས་ཚད་བརྗོད་པར་དཀའ་བའི་མི་མང་དང་། གཙོ་ཆེར་མཐོ་རིམ་སློབ་མས་གནམ་སྡེ་སྒོ་མོ་ཆེར་རྒྱ་ནག་གི་ཁྲིམས་ལུགས་ལ་བཅོས་སྒྱུར་དགོས་པའི་གཞི་རྒྱ་ཆེ་བའི་ངོ་རྒོལ་ལས་འགུལ་བརྩམས་པར། རྒྱ་ནག་གཞུང་གིས་ཡ་ང་སྙིང་རྗེ་མེད་པར་དྲག་གནོན་དང་དམར་གསོད་བཏང་བ་རེད། ངོ་རྒོལ་བ་མི་ཉུང་བ་ཞིག་དྲག་གནོན་དེའི་རྗེས་བྲོས་བྱོལ་དུ་འགྲོ་ཐུབ་པ་བྱུང་བ་ལས་ལུའུ་ཇིང་ཧཱ་དེ་དག་ཁྲོད་ཀྱི་གཅིག་ཡིན། ཁོ་མོ་ནི་ད་ལྟའི་ཆར་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་ཞིག་ཡིན།

རྒྱ་ནག་གཞུང་གིས་གནམ་སྡེ་སྒོ་མོ་ཆེའི་དོན་རྐྱེན་དང་འབྲེལ་བའི་མི་སྣ་དང་གནད་དོན་ཇི་འདྲ་ཞིག་ཡིན་རུང་དོ་སྣང་དང་སུན་སྣང་ཆེན་པོ་བྱེད་ཀྱི་ཡོད། ལོ་ལྟར་ཕྱི་ཟླ་ ༦ པའི་ནང་རྔམ་སྟོན་ངོ་རྒོལ་དུས་དྲན་གྱི་སྔ་ཕྱི་བར་གསུམ་དུ་པེ་ཅིན་གཙོས་རྒྱལ་ཁབ་ཀྱི་སྲུང་སྐྱོབ་ལ་དམ་བསྒྲགས་ཤུགས་ཆེ་བྱེད་ཀྱི་ཡོད་པ་རེད།

དྷ་རམ་ས་ལར་འཚོགས་པའི་ལྷན་ཚོགས་དེ་ནི་ཟླ་ ༤ པའི་ཚེས་ ༢༨ ནས་ཕྱི་ཟླ་ ༥ པའི་ཚེས་ ༡ བར་ཡིན་པ་དང་། ལྷན་ཚོགས་དེ་ནི་ཨ་མི་རི་ཀར་རྟེན་གཞི་བྱས་པའི་རྒྱ་ནག་ཆེད་མི་སེར་གྱི་ནུས་པ་ Citizen Power for China ཞེས་པའི་ཚོགས་པའི་གོ་སྒྲིག་འོག་སྐོང་འཚོགས་བྱེད་ཀྱིན་ཡོད་པ་རེད། ཚོགས་པ་དེ་ནི་ཡང་ཅན་ལི་ཡིས་དབུ་ཁྲིད་པ་ཞིག་ཡིན་པ་དང་། ཁོང་རང་ཡང་ ༡༩༨༩ ལོའི་གནམ་སྡེ་སྒོ་མོ་ཆེའི་ངོ་རྒོལ་ལས་འགུལ་ནང་མཉམ་ཞུགས་གནང་མཁན་ཞིག་ཡིན།

གཟའ་འཁོར་གཅིག་གི་རིང་ཐོངས་མཆན་གསུམ་ཕྱིར་འཐེན་བྱས་པ་དེ་ནི་རྒྱ་ནག་གི་རེ་འདོད་བཞིན་བྱས་པ་མངོན་གསལ་དོད་པོ་ཡིན་སྟབས། མོ་ཏཱི་ Narendra Modi གཞུང་ལ་སྐྱོན་བརྗོད་བྱེད་པའི་ལག་ཆར་འགྱུར་རྒྱུ་ཧ་ལམ་ངེས་པ་ཞིག་རེད། ཉེ་སྔོན་རྒྱ་གར་གཞུང་གིས་ཨི་སཱ་ལ་ཐོངས་མཆན་སྤྲད་པར་རྒྱ་ནག་གཞུང་གིས་ཁོང་ཁྲོའི་རྣམ་འགྱུར་གསལ་པོ་བསྟན་ཡོད་པ་རེད།

རྒྱ་གར་གཞུང་གིས་ཁོང་གི་ཐོངས་མཆན་ཕྱིར་འཐེན་བྱེད་སྐབས། ཁོང་ལ་རྒྱལ་སྤྱིའི་སྲུང་སྐྱོབ་ལྷན་ཁང་གིས་དམིགས་བཀར་དོ་སྣང་བྱ་ཡུལ་དང་། ཐོངས་མཆན་སྙན་ཞུའི་ནང་དོན་དང་དམིགས་ཡུལ་ཕྱིན་ཅི་ལོག་ཚུལ་འགྲེལ་བརྗོད་བྱས་པ་རེད། རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པས་“ཨི་སཱ་ཡིས་ཐོག་མར་ཡུལ་སྐོར་སྤྲོ་འཆམ་པའི་ཐོངས་མཆན་ཞུས་པ་རེད། ཐོངས་མཆན་ཐོབ་པ་དང་རང་ཉིད་ལྷན་ཚོགས་དེར་འགྲོ་རྒྱུའི་སྐོར་ཁྱབ་བསྒྲགས་བྱས་འདུག དེར་བརྟེན་ཡུལ་སྐོར་སྤྲོ་འཆམ་པའི་ཐོངས་མཆན་ཐོག་ལས་དོན་དེ་འདྲ་བའི་དམིགས་ཡུལ་བཅངས་པ་ནི་མི་ཆོག་པ་ཞིག་རེད།” ཅེས་འགྲེལ་བརྗོད་བྱས།

ཨི་སཱ་ནི་རྒྱལ་སྤྱིའི་ཡུ་གུར་ཚོགས་པའི་མགོ་ཁྲིད་ཡིན་པ་དང་། རྒྱ་ནག་གཞུང་གིས་ཁོང་ལ་ཤིན་ཅང་ཁུལ་དུ་དྲག་སྤྱོད་ཀྱི་ལས་འགུལ་དང་མི་གསོད་དོན་རྐྱེན་དང་འབྲེལ་བའི་ནག་ཉེས་སྐྱོན་འཛུགས་བྱས་ཡོད་པ་ཞིག་ཡིན། ཡུ་གུར་ཚོགས་པ་ནི་རྒྱ་ནག་གི་ཕྱི་ཕྱོགས་སུ་གྲུབ་པའི་ཚོགས་པ་ཞིག་ཡིན།

སྐལ་ལྡན་གྱིས་རྒྱ་གར་དུས་བབ་ལས་ཕབ་སྒྱུར་བྱས། http://www.hindustantimes.com/world/india-cancels-visas-for-two-more-chinese-activists/story-sta4io7yU54Z4l9xv2q2kK.html